ភ្នំពេញ៖ ឯកឧត្តម ខៀវ កាញារីទ្ធ រដ្ឋមន្រ្តីក្រសួងព័ត៌មាន នឹងរៀបចំពិធីបុណ្យសាសនាជូន សពឯកឧត្តម ឆាំង សុង ដែលជាអតីតរដ្ឋមន្រ្តី ក្រសួងព័ត៌មាន និងឃោសនាការក្នុងជំនាន់សាធារណរដ្ឋខ្មែរ។ កម្មវិធីសាសនានេះ នឹងប្រព្រឹត្តទៅនៅថ្ងៃទី ១៧ និង ១៨ ខែ កុម្ភៈឆ្នាំ ២០២៣ ដោយនឹងមានថ្នាក់ដឹកនាំជាច្រើនចូលរួមផងដែរ។

ឯកឧត្តម ខៀវ កាញារីទ្ធ រដ្ឋមន្រ្តីក្រសួងព័ត៌មាន នឹងរៀបចំពិធីបុណ្យទក្ខិណានុប្បទាន ជូនសព ឯកឧត្តម ឆាំង សុង ជាឥស្សរជនមួយរូប ដែលធ្លាប់ជាអតីតរដ្ឋមន្រ្តី ក្រសួងព័ត៌មាន និង​ឃោសនាការ​ក្នុងជំនាន់សាធារណរដ្ឋខ្មែរ។ ឯកឧត្តម ឆាំង សុង បានទទួលមរណភាពក្នុងជន្មាយុ ៨៥ ឆ្នាំ ​កាលពីថ្ងៃទី ២១ ខែ សីហា ឆ្នាំ ២០២២ នៅប្រទេសអាមេរិក។

ការបញ្ជាក់ពីការ រៀបចំពិធីសាសនាជូនសព ឯកឧត្តម ឆាំង សុង ​នេះធ្វើឡើងក្នុងឱកាស លោកជំទាវភរិយា ឯកឧត្តម ខៀវ កាញារីទ្ធ ​និងថ្នាក់ដឹកនាំក្រសួងព័ត៌មាន ចុះមកសួរសុខទុក្ខ​លោកស្រី ស៊ុ រុន ជាភរិយា ឯកឧត្តម ឆាំង សុង នៅរសៀលថ្ងៃទី ៣១​ ខែមករា ឆ្នាំ២០២៣។ ពិធីបុណ្យនឹងរៀបចំឡើងរយៈពេល ២ថ្ងៃ ​ដោយថ្ងៃទី ១៧ ខែកុម្ភៈ នឹងមានការរៀបចំពីធីបុណ្យ​នៅវត្តស្វាយដង្គំ រាជធានីភ្នំពេញ ដើម្បីធ្វើការគោរពវិញ្ញាណក្ខន្ធ រីឯថ្ងៃទី ១៨ ខែកុម្ភៈជាការដង្ហែធាតុ ឯកឧត្តម ឆាង សុង ទៅវត្តព្រៃល្វា ក្នុងស្រុកព្រៃកប្បាស ខេត្តតាកែវ ជាស្រុកកំណើតរបស់​ឯកឧត្តម។

ការរៀបចំពិធីបុណ្យសាសនាជូនសព ឯកឧត្តម ឆាំង សុង គឺដើម្បីរម្លឹកដល់គុណបំណាច់ ការ​លះបង់របស់ឯកឧត្តម តាមរយៈក្រសួងព័ត៌មាន ​និងឃោសនាការ​ ក្នុងគ្រាអតីតកាល។

ឯកឧត្តម ឆាំង សុង បានកើតនៅឆ្នាំ ១៩៣៧ ក្នុងឃុំព្រៃល្វា ស្រុកព្រៃកប្បាស​ ខេត្តតាកែវ។ ពាក់ព័ន្ធនឹងប្រវត្តិការងារ ឯកឧត្តម ក្នុងឆ្នាំ ១៩៦៨ -១៩៦៩ បានចូលបម្រើការក្នុងខុទ្ទកាល័យ​ព្រះបរមរតនាកោដ្ឋ ទទួលបន្ទុកអ្នកសារព័ត៌មាន។ ឆ្នាំ១៩៧0-១៩៧៥ ឯកឧត្តម ឆាំង សុង បាន​បម្រើការជាអ្នកនាំពាក្យក្រសួងការពារជាតិ និងជារដ្ឋមន្រ្តីក្រសួងព័ត៌មាននិងឃោសនាការ​របស់​រដ្ឋាភិបាលសាធារណរដ្ឋខ្មែរ។ នៅឆ្នាំ ១៩៨៦ ឯកឧត្តមបានចូលមកគាំទ្ររដ្ឋាភិបាលសាធារណរដ្ឋ​ប្រជាមានិតកម្ពុជា។ ចំពោះទសវត្សរ៍ឆ្នាំ ៩០ វិញ ឯកឧត្តមត្រូវបានតែងតាំងជាសមាជិកព្រឹទ្ធសភា និង​ជាទីប្រឹក្សារាជរដ្ឋាភិបាលនៃព្រះរាជាណាចក្រកម្ពុជា៕អត្ថបទ៖ គឹមហុក