សៀមរាប៖ មជ្ឈមណ្ឌលសកម្មភាពកម្ចាត់មីនកម្ពុជា (ស៊ីម៉ាក់) នៅថ្ងៃទី១ ខែកុម្ភៈ ឆ្នាំ២០២៣នេះ បានប្រកាសបើកប្រតិបត្តិការបោសម្អាតមីនក្នុងគម្រោងមូលនិធិកម្ពុជាគ្មានមីនឆ្នាំ២០២៥ ដែល​នឹងអនុវត្តក្នុងខេត្តកំពង់ធំ ប៉ៃលិន ព្រះវិហារ ពោធិ៍សាត់ និងខេត្តសៀមរាប ជាមួយនឹងផែនការរំដោះផ្ទៃដីចំនួន១ម៉ឺនហិកតា។

ក្នុងពិធីប្រកាសបើកគម្រោងបោសសម្អាតមីនបន្តទៀត នៅឯខេត្តសៀមរាប ឯកឧត្ដម ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយកមជ្ឈមណ្ឌលសកម្មភាពកម្ចាត់មីនកម្ពុជា (CMAC) បានឱ្យដឹងថា កម្លាំងប្រតិបត្តិការក្នុងគម្រោងមូលនិធិកម្ពុជាគ្មានមីនឆ្នាំ២០២៥ នឹងអនុវត្តក្នុង​ខេត្តកំពង់ធំ ប៉ៃលិន ព្រះវិហារ ពោធិ៍សាត់ និងខេត្តសៀមរាប ជាមួយនឹងផែនការរំដោះផ្ទៃដីចំនួន​ជាង ១ម៉ឺហិកតា និងមានកម្លាំងជំនាញនានារបស់អង្គភាពស៊ីម៉ាក់ ​ចំនួនជិត៦០០នាក់ ក្នុងនោះ​មានសុនខហិតមីន ចំនួន១៣ក្រុម កងអនុសេនាតូចគ្រឿងចក្រ ចំនួន២១កង និងក្រុមស្រាវជ្រាវ និងបោសសម្អាតមីន ចំនួន៣៦ក្រុម។

ឯកឧត្ដម បានថ្លែងអំណរគុណយ៉ាងជ្រាលជ្រៅបំផុតចំពោះសម្តេចតេជោ ហ៊ុន សែន នាយករដ្ឋមន្រ្ដី នៃកម្ពុជា ដែលបានបង្កើតមូលនិធិកម្ពុជាគ្មានមីនឆ្នាំ២០២៥ និងបានអនុម័តកញ្ចក់​ថវិកាផ្តល់មក​អង្គភាពស៊ីម៉ាក់ ដើម្បីធ្វើការបោសសម្អាតមីនលើផ្ទៃដីដែលរងផលប៉ះពាល់ដោយសារគ្រាប់មីន ដើម្បីធ្វើយ៉ាងណាឱ្យសម្រេចបានគោលដៅកម្ពុជាអស់មីនឆ្នាំ២០២៥ និងប្រែក្លាយទឹកដីសុវណ្ណភូមិ​មួយនេះឱ្យរួចចាកផុតពីគ្រាប់មីន និងសំណល់យុទ្ធភណ្ឌសង្គ្រាម និងថ្លែងអំណរគុណដល់ថ្នាក់​ដឹកនាំ​អាជ្ញាធរមីន ​ដែលបានសម្របសម្រួល និងគាំទ្រកិច្ចប្រតិបត្តិការរបស់អង្គភាពស៊ីម៉ាក់ ៕ អត្ថបទ៖ ឈិត សាវី