កំពង់ចាម៖ ប្រជាកសិករដាំដំណាំបន្លែសុវត្ថិភាព ក្នុងសហគមន៍​សំបួរមាស​ នៃខេត្តកំពង់ចាម បានសម្ដែងក្ដីសប្បាយរីករាយ ​និងអបអរសាទរ ​ចំពោះខណៈ​គោលនយោបាយរបស់​គណបក្សប្រជាជន​កម្ពុជា នាអាណត្តិក្រោយ នឹងផ្ដោតជាអាទិភាពមួយ ក្នុងការ​លើកកម្ពស់​វិស័យកសិកម្ម ។

កសិករ បានលើកឡើងថា ចំពោះការដឹកនាំរបស់រាជរដ្ឋាភិបាលសព្វថ្ងៃនេះ​ គឺបានជួយកសិករ​មួយផ្នែកខ្លះហើយ ពិសេសគឺបច្ចេកទេសដាំដុះ តែពេលដែលឮថា គណបក្សប្រជាជនកម្ពុជា ត្រៀមដាក់អ្នកជំនាញបច្ចេកទេសកសិកម្មនៅតាមមូលដ្ឋានទៀត ​ដើម្បីជួយបណ្ដុះបណ្ដាល និង​ផ្ដល់ការប្រឹក្សាដល់ប្រជាកសិករ ​គឺជាគោលនយោបាយ​ ដែលល្អខ្លាំងណាស់ ស្របទៅតាមអ្វីដែល​កសិករចង់បាន។

ប្រជាកសិករ រំពឹងថា គោលនយោបាលថ្មីនេះ​ នឹងជួយលើកស្ទួយជីវភាពរបស់ពួកគេកាន់​តែល្អ​ប្រសើរឡើង​ថែមមួយកម្រិតទៀត។

ក្រោយបិទបញ្ចប់មហាសន្និបាតវិសាមញ្ញតំណាងទូទាំងប្រទេស​ រយៈពេល២ថ្ងៃ កន្លងទៅនេះ​ គណបក្ស​ប្រជាជនកម្ពុជា ​បានដាក់ចេញគោល​នយោបាយ​ជាអាទិភាពលើវិស័យកសិកម្ម ដោយ​ក្នុងនោះគណបក្ស ​នឹងត្រៀមកញ្ចប់ថវិកា ​ដើម្បីជួយដល់ប្រជាកសិករនៅ​តាមមូលដ្ឋាន​ ក្រោយ​ពេលដែលគណបក្សប្រជាជនកម្ពុជា​ ឈ្នះការបោះឆ្នោតថ្នាក់ជាតិ ​នៅថ្ងៃទី២៣ ខែកក្កដា ឆ្នាំ២០២៣ នេះ ៕ អត្ថបទ៖ ថុង សីហា