​មីយ៉ាន់ម៉ា៖ សារព័ត៌មាន​រដ្ឋ​បាន​រាយការណ៍​ថា របប​សឹក​មី​យ៉ាន់​ម៉ា​ដែល​បាន​ដាក់​រដ្ឋ​ក្នុង​គ្រាអាសន្ន​រយៈពេល ​២​ឆ្នាំ​រួច​ទៅហើយនោះ ត្រូវ​បាន​បន្ថែម​ពេលវេលា​ចំនួន ​៦​ខែ​ទៀត​កាលពី​ថ្ងៃ​ពុធតាម​សំណើ​របស់​ប្រមុខ​យោធា​លោក Min Aung Hlaing។

​ការប្រកាស​បន្ថែម​ពេលវេលា​នេះ​បាន​កើតឡើង​ ស្របគ្នា​នឹង​ការប្រកាស​ដាក់ទណ្ឌកម្ម​ថ្មីៗ​ពី​សំណាក់​សហរដ្ឋអាមេរិក និង​សម្ព័ន្ធមិត្ត​របស់​ខ្លួន​ប្រឆាំង​នឹង​របប​សឹក​មួយ​នេះ​។ ​ការ​បន្ថែម​ពេល​វេលា​ដាក់​ប្រទេស​ក្នុង​គ្រាអាសន្ន​នេះ ​ត្រូវបាន​សម្រេច​ដោយ​ក្រុមប្រឹក្សាសន្តិសុខ និង​ការពារជាតិ ចំ​ថ្ងៃ​ខួប ២​ឆ្នាំ​នៃ​រដ្ឋប្រហារ​យោធា ដែល​បាន​ទម្លាក់​រដ្ឋាភិបាល​ស៊ីវិល​របស់​ប្រទេស​នេះ និង​បាន​ឈាន​ដល់​ការ​ចាប់ខ្លួន​មេដឹកនាំ​ស៊ីវិល​លោកស្រី Aung San Suu Kyi​។ ​ប្រធានាធិប​តី​ស្ដីទី​លោក Myint Swe ត្រូវ​បាន​ដកស្រង់​សម្ដី​ដោយ​និយាយ​ថា អំណាច​អធិបតេយ្យ​របស់​រដ្ឋ​ត្រូវ​បាន​ផ្ទេរ​ទៅ​ឲ្យ​អគ្គ​មេបញ្ជាការ​ជាថ្មី ដោយ​បន្ថែម​ថា ការ​ដាក់​រដ្ឋ​ក្នុង​គ្រាអាសន្ន​នឹង​ត្រូវ​បន្ថែម​រយៈពេល​ ៦​ខែ​ទៀត​ចាប់ផ្ដើម​ពីថ្ងៃ​ទី​១ ​ខែ​កុម្ភៈ ​ឆ្នាំ​២០២៣ ​នេះ​តទៅ​។

សារព័ត៌មាន​រដ្ឋ​ខាងលើ​ក៏បាន​រាយការណ៍​ពី​លោក Min Aung Hlaing ផង​ដែរ​ដោយ​និយាយ​ថា រដ្ឋាភិបាល​របស់​យើង​នឹង​ធ្វើការ​ដើម្បី​រៀបចំ​ការបោះឆ្នោត​នៅ​គ្រប់​ផ្នែក​របស់​ប្រទេស​នេះ ទើប​ប្រជាពលរដ្ឋ​នឹង​មិន​បាត់​បង់​សិទ្ធិ​ប្រជាធិបតេយ្យ​របស់​ពួកគេ​។ ចំណែក​អង្គការសហប្រជាជាតិ​កាលពី​ថ្ងៃ​ពុធ​ក៏បាន​ព្រមាន​ផង​ដែរ​ថា ការបោះឆ្នោត​ដែល​បាន​សន្យា​ទំនងជា​នឹង​ពុំ​មាន​ភាព​សេរី និង​យុត្តិធម៌​ទេ​៕

អត្ថបទ៖ សុខមាន