មីយ៉ាន់ម៉ា៖ យោងតាមសេចក្ដីថ្លែងការណ៍មួយចេញផ្សាយ ដោយក្រសួងរតនាគារអាមេរិកកាលពីថ្ងៃអង្គារសប្ដាហ៍នេះ ទីក្រុងវ៉ាស៊ីនតោនរួមជាមួយសម្ព័ន្ធមិត្ត កាណាដា ចក្រភពអង់គ្លេស និងអូស្ត្រាលីជាដើម បានដាក់ទណ្ឌកម្មបន្ថែមលើក្រុមមន្ត្រីគណៈកម្មការរៀបចំការបោះឆ្នោត សហគ្រាសរ៉ែ និងថាមពល និងមន្ត្រីផ្សេងទៀតដែលជាប់ពាក់ព័ន្ធនឹងរដ្ឋាភិបាលយោធា។
ក្រោយប្រកាសដាក់ទណ្ឌកម្មជុំថ្មីមុនខួប ២ឆ្នាំនៃរដ្ឋប្រហារ របបសឹកសហភាពមីយ៉ាន់ម៉ាបានរិះគន់ការដាក់ទណ្ឌកម្មជុំថ្មីនេះ។ សេចក្ដីថ្លែងការណ៍នេះនិយាយថា នេះជាលើកដំបូងដែលសហរដ្ឋអាមេរិកបានដាក់គោលដៅលើក្រុមមន្ត្រីសហគ្រាសប្រេង និងឧស្ម័ន ប្រធាន និងអនុប្រធានគ្រប់គ្រងការងារនេះ។ សហគ្រាសមួយនេះគឺជាសហគ្រាសគ្រប់គ្រងដោយរដ្ឋ ដែលជាប្រភពប្រាក់ចំណូលដ៏ធំបំផុតតែមួយគត់របស់ប្រទេសនេះ។ សហគ្រាសរ៉ែឈរនៅលំដាប់លេខ១ និងលេខ២ ដែលសហគ្រាសទាំង២ សុទ្ធតែជាក្រុមហ៊ុនគ្រប់គ្រងដោយរដ្ឋ ព្រមទាំងគណៈកម្មការរៀបចំការបោះឆ្នោតក៏ត្រូវបានរងទណ្ឌកម្មពីទីក្រុងវ៉ាស៊ីនតោនដែរ។
ប្រទេសកាណាដាបានដាក់ទណ្ឌកម្មលើបុគ្គលចំនួន ៦រូប និងហាមប្រាមការនាំចេញ លក់ ផ្គត់ផ្គង់ ឬការដឹកជញ្ជូនប្រេងសម្រាប់ចាក់យន្តហោះ។ ប្រទេសអូស្ត្រាលីបានដាក់ទណ្ឌកម្មលើសមាជិករបបយោធាមួយចំនួន និងក្រុមហ៊ុនមួយដែលដំណើរការដោយយោធា។ ចក្រភពអង់គ្លេសបានចាត់ទុកក្រុមហ៊ុនចំនួន២ និងបុគ្គល ២នាក់ពីបទជួយដល់ការផ្គត់ផ្គង់កងកម្លាំងអាកាសរបស់មីយ៉ាន់ម៉ា នូវឥន្ធនៈសម្រាប់ចាក់យន្តហោះដើម្បីបង្កើតយុទ្ធនាការទម្លាក់គ្រាប់បែក។ គួររម្លឹកផងដែរថា ទណ្ឌកម្មទាំងនេះបានកើតឡើង ស្របពេលយោធាសហភាពមីយ៉ាន់ម៉ាបានបើកការវាយប្រហារតាមអាកាស និងការវាយប្រហារផ្សេងទៀត ដាក់គោលដៅលើកងកម្លាំងគាំទ្រលទ្ធិប្រជាធិបតេយ្យប្រឆាំងរបបសឹកនេះ៕ អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
