ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រី នៅតែរំលឹកជាប្រចាំថា ដើម្បីការអភិវឌ្ឍលើគ្រប់វិស័យជាពិសេសរាល់ជោគជ័យណាក៏ដោយគឺយើងមិនត្រូវមើលរំលងអំពីកត្តាសន្តិភាពបានទេ។

សម្តេចតេជោ ប្រមុខរាជរដ្ឋាភិបាលនៅតែរំលឹកឱ្យចៅៗជំនាន់ក្រោយ និងជនរួមជាតិមិនត្រូវមើល​រំលងពីកត្តាសន្តិភាពដើម្បីយើងទទួលបានការរីកចម្រើនជា​បន្តបន្ទាប់នោះត្រូវបានធ្វើឡើង​ក្នុង​ពេលសម្តេចអនុញ្ញាតឱ្យសិស្សដែលទទួលបាននិទ្ទេសAនៅក្នុងសម័យប្រលងកាលថ្ងៃទី៥ធ្នូឆ្នាំ២០២២ចំនួន ១,០៤៩ នាក់នៅទូទាំងប្រទេស បានជួបសំណេះសំណាលនិងផ្តល់ជូន​រង្វាន់នៅ​មជ្ឈមណ្ឌល​សន្និសីទ និងពិព័រណ៍អន្តរជាតិជ្រោយចង្វា នាព្រឹកថ្ងៃទី២កុម្ភៈនេះ។

ជាមួយនឹងការកោតសរសើរ និងវាយតម្លៃខ្ពស់ដល់កិច្ចខិតខំប្រឹងប្រែងរបស់ជ័យលាភី អាណាព្យាបាល មាតា បិតាក៏ដូចជាផ្នែកពាក់ព័ន្ធតាំងពីថ្នាក់ជាតិរហូតដល់ថ្នាក់ក្រោមជាតិ អាជ្ញាធរ​គ្រប់​ជាន់​ថ្នាក់ដែលធ្វើឱ្យកំណែទម្រង់វិស័យអប់រំទទួលបានជោគជ័យដ៏ល្អជាបន្តបន្ទាប់ សម្តេចតេជោ នៅតែរំលឹកថា ដើម្បីបន្តទទួលបានការរីកចម្រើនលើគ្រប់វិស័យនោះ​សម្តេចថា ជោគជ័យណាក៏ដោយមិនត្រូវមើលរំលងពីកត្តាសន្តិភាពបានឡើយ។

សម្តេចតេជោ ហ៊ុន សែន មានប្រសាសន៍បន្តថា រឿងនេះគឺមិនអាចយកដៃបាំងព្រះអាទិត្យបាន​ឡើយ។សម្តេចថា ក្រោយឆ្នាំ១៩៧៩ គឺយើងបានស្តារឡើងវិញលើវិស័យអប់រំ និងរចនា​សម្ព័ន្ធនានាគ្រប់វិស័យជាបន្តបន្ទាប់។ក្រោយយើងមានសន្តិភាពហើយប្រទេសរបស់យើងគ្មាន​តំបន់ត្រួតត្រាច្រើនទៀតទេ ជាពិសេសនៅតាមបណ្តាខេត្តទូទាំងប្រទេសវិស័យអប់រំ​ក៏មាន​វិទ្យាល័យល្អៗទៀតផង៕