ភ្នំពេញ៖ ប្រធានក្រុមមេធាវីស្ម័គ្រចិត្តសម្តេចតេជោ សែន បានប្រកាសអាស័យដ្ឋាន Account Facebook ផ្លូវការរបស់ខ្លួន ​ដោយមានដាក់លេខទូរសព្ទត្រឹមត្រូវ ​ដើម្បីបង្កភាពងាយស្រួលឲ្យ ស្រ្តីក្រីក្រ ​និងស្ត្រីបម្រើការសេដ្ឋកិច្ចក្រៅប្រព័ន្ធ ធ្វើការទាក់ទងរកមេធាវីការពារក្តីនានា ហើយថា​មេធាវីប្រកាសទទួលតែរឿងក្តីណាដែលស្រី្តរងគ្រោះដោយការប្រើអំពើហឹង្សា រំលោភបំពាបំពាន​សិទ្ធ ខុសច្បាប់ និងមិនទទួលស្ត្រីបង្កបទល្មើសឡើយ។

លោក គី តិច ប្រធានក្រុមមេធាវីស្ម័គ្រចិត្តសម្តេចតេជោសែន បានថ្លែងប្រាប់ BTV នៅថ្ងៃទី២ ខែកុម្ភៈនេះថា​ គ្រប់ក្មេងស្រី ស្ត្រីក្រីក្រ ​និងស្ត្រីបំរើការងារសេដ្ឋកិច្ចក្រៅប្រព័ន្ធនានា អាចទាក់ទង​រកមេធាវីការពារក្តីដោយឥតគិតថ្លៃបាន​ ដោយគ្រាន់តែចូលទៅអាស័យដ្ឋាន Facebook មានឈ្មោះថា “ក្រុមមេធាវីស្ម័គ្រចិត្តសម្តេចតេជោសែន” ដែលមានលេខទូរសព្ទទាក់ទងផងដែរ ប្រសិនស្ត្រីរងគ្រោះមានតម្រូវការ ​នៅពេលជួបបញ្ហារងអំពើហឹង្សា រំលោភបំពាបំពានសិទ្ធ នៅក្នុងកន្លែងការងារ។

ប្រធានក្រុមមេធាវី លោក គី តិច បន្តថា ​សម្រាប់មេធាវីដែលផ្តល់ការការពារក្តីដោយមិនគិតថ្លៃ​ជូន​ក្មេងស្រី ស្ត្រីក្រីក្រ និងស្ត្រីបំរើការងារក្រៅប្រព័ន្ធនោះ​ ប្រើប្រាស់ថវិកាផ្ទាល់របស់សម្តេចតេជោ ហ៊ុន សែន ​និងសម្តេចកិត្តិព្រឹទ្ធបណ្ឌិត ​ហើយមិនមានការប្រើប្រាស់ថវិការបស់រដ្ឋនោះទេ ។

លោកស្រី ស ស៊ីណែត អ្នកនាំពាក្យក្រសួងកិច្ចការនារី បានថ្លែងថា តាមរយៈការមានមេធាវីស្ម័គ្រ​ចិត្ត​សម្តេចតេជោ ហ៊ុន សែន​ ជំរុញឲ្យរឿងក្តី ស្ត្រីជួបការរងគ្រោះដោយការធ្វើអំពើហឹង្សា និងរំលោភ​បំពានដោយខុសច្បាប់នានា​ ទទួលបានការអន្តរាគមន៍ ​និងដោះស្រាយរឿងកី្ត បានលឿនឆាប់រហ័ស និងទាន់ពេលវេលា ។

លោកស្រី ស ស៊ីណែត ថ្លែងថា សម្រាប់ក្រសួងកិច្ចការនារីផ្ទាល់​ បច្ចុប្បន្នក៏មាន មន្ទីរកិច្ចការ​នារី​រាជធានីខេត្ត ផ្តល់សេវាជំនួយសង្គ្រោះជួយក្មេងស្រី និងស្រ្តីក្រីក្រ​ ដូចជាផ្តល់សេវាប្រឹក្សាផ្លូវចិត្ត សេវា​ប្រឹក្សាយោបល់ផ្នែកច្បាប់​ និងការសម្របសម្រួលរៀបចំបណ្តឹង និងសំរួលស្នើរមេធាវី​និង​សេវានានាទៀត ​បើគាត់មានតម្រូវការ៕អត្ថបទ៖ ស៊ុមសុខជា