ភ្នំពេញ៖ ឯកឧត្តម ឈាង វុន ប្រធានគណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្ម នៃរដ្ឋសភា នៅព្រឹកថ្ងៃទី២ខែកុម្ភៈនេះ បានអញ្ជើញប្រជុំ និងពិភាក្សាការងារជាមួយ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី ​រដ្ឋមន្ត្រីក្រសួងសេដ្ឋកិច្ច និង​ហិរញ្ញវត្ថុ ក្នុងគោលបំណងពិនិត្យលើសេចក្តីព្រាងច្បាប់ស្តីពីប្រព័ន្ធហិរញ្ញវត្ថុសាធារណៈ។

កិច្ចប្រជុំនេះក៏មានការអញ្ជើញចូលរួមពី ឯកឧត្តម លោកជំទាវ ជាប្រធាន អនុប្រធាន លេខាធិការ សមាជិក សមាជិកា គណៈកម្មការជំនាញនានា និងឯកឧត្តម លោកជំទាវ ថ្នាក់ដឹកនាំក្រសួង​សេដ្ឋកិច្ច និងហិរញ្ញវត្ថុ។

នៅក្នុងឱកាសខាងលើនោះ ឯកឧត្តម ឈាង វុន បានមានប្រសាសន៍ថា កិច្ចប្រជុំនាថ្ងៃនេះ​គឺ​សមាជិក សមាជិកា រដ្ឋសភា ចង់បានការបំភ្លឺបន្ថែមពីតំណាងរាជរដ្ឋាភិបាលលើសេចក្តីព្រាងច្បាប់​ស្តីពីប្រព័ន្ធហិរញ្ញវត្ថុសាធារណៈនូវចំណុចមួយចំនួនដែលពាក់ព័ន្ធនឹងសេចក្តីព្រាងច្បាប់នេះ ដើម្បីជាមូលដ្ឋានក្នុងការប្រជុំពិភាក្សាអោយកាន់តែស៊ីជម្រៅ​ និងឯកភាពគ្នានាពេលនេះ។

ជាការឆ្លើយតប ​នៅក្នុងកិច្ចប្រជុំ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ​ឧបនាយករដ្ឋមន្រ្តី រដ្ឋមន្ត្រីក្រសួងសេដ្ឋកិច្ច​ និងហិរញ្ញវត្ថុ ​បានមានប្រសាសន៍ថា សេចក្តីព្រាងច្បាប់ស្តីពី​ប្រព័ន្ធហិរញ្ញវត្ថុ​សាធារណៈត្រូវបានរៀបចំឡើងដើម្បីកសាងក្របខ័ណ្ឌគតិយុត្តគោល និងចាំបាច់ សម្រាប់ការអនុវត្ត​ប្រព័ន្ធ​ថវិកាព័ត៌មានសមិទ្ធកម្ម ​ឬហៅកាត់ថា ថវិកាសមិទ្ធកម្មដែលជាម៉ូដែលសមស្រប​សម្រាប់​កម្ពុជា។

ឯកឧត្តមអគ្គបណ្ឌិតសភាចារ្យ ​បានបន្តទៀតថា រាជរដ្ឋាភិបាលបានប្រគល់ភារកិច្ច​ដល់​ក្រសួង​សេដ្ឋកិច្ច និងហិរញ្ញវត្ថុ ​អោយដឹកនាំការងាររៀបចំសេចក្តីព្រាងច្បាប់នេះ ចាប់តាំងពី​ឆ្នាំ២០២០ ដែលសេចក្តីព្រាងច្បាប់នេះគឺជាច្បាប់គោលគ្របដណ្តប់លើការគ្រប់គ្រង​ប្រព័ន្ធហិរញ្ញវត្ថុសាធារណៈ និងសម្រាប់ពង្រឹងការអនុវត្តថវិកាព័ត៌មានសមិទ្ធកម្ម ដែលជាជំហាន​ដ៏សំខាន់សម្រាប់ពង្រឹង​គណនេយ្យ​ភាពសមិទ្ធកម្ម ក្នុងគោលដៅធ្វើទំនើបកម្មប្រព័ន្ធគ្រប់គ្រងហិរញ្ញវត្ថុសាធារណៈកម្ពុជា​ដែល​អាចអនុវត្តក្នុងបរិការណ៍កម្ពុជា ព្រមទាំងស្របតាមទិសដៅនៃការកែទម្រង់ការគ្រប់គ្រង​ហិរញ្ញវត្ថុ​សាធារណៈ និងយុទ្ធសាស្ត្រនៃការកែទម្រង់ប្រព័ន្ធថវិកា ឆ្នាំ២០១៨-២០២៥ របស់​រាជរដ្ឋាភិបាល និងស្របតាមឧត្តមានុវត្តជាអន្តរជាតិ។ សេចក្តីព្រាងច្បាប់នេះ មាន៩ជំពូក និង១០៩មាត្រា។

ជាលទ្ធផល ក្រោយពេលសាកសួរពីគណៈកម្មការជំនាញនានា និងបកស្រាយពីតំណាងក្រសួង​សេដ្ឋកិច្ច និងហិរញ្ញវត្ថុ អង្គប្រជុំបានឯកភាពលើខ្លឹមសាររួមនៃសេចក្តីព្រាងច្បាប់​ស្តីពីប្រព័ន្ធហិរញ្ញវត្ថុ​សាធារណៈដោយគ្រាន់តែកែសម្រួលអក្ខរាវិរុទ្ធអោយត្រឹមត្រូវតាមអត្ថបទច្បាប់។ ហើយគណៈកម្មការជំនាញ ​និងរាយការណ៍ទៅគណៈអចិន្ត្រៃយ៍ពិនិត្យសម្រេច​ដាក់ចូលទៅ​ក្នុង​របៀបវារៈកិច្ចប្រជុំពេញអង្គរបស់រដ្ឋសភានាពេលខាងមុខ ៕អត្ថបទ៖ ទូច សោភ័ណ