ក្រចេះ៖ អាជ្ញាធរខេត្តក្រចេះ បានដាក់ឱសានវាទដល់ជនជាតិវៀតណាម ចំនួន៦គ្រួសារ ត្រូវរុះរើផ្ទះ និងបែរ ចិញ្ចឹមត្រីចេញពីតំបន់អភិរក្សសត្វផ្សោតជាដាច់ខាត ។

លិខិតចុះថ្ងៃទី២៨​ ខែមករា​ ឆ្នាំ២០២៣ របស់រដ្ឋបាលខេត្ត បានចេញបន្ទាប់ពីក្រុមគ្រួសារ ជនជាតិវៀតណាមទាំងនោះ ​បានសាងសង់ផ្ទះ ផែបណ្តែតទឹក​ និងបែចិញ្ចឹមត្រី នៅលើដងទន្លេមេគង្គ ​ស្ថិតក្នុងតំបន់ការពារសត្វផ្សោត​។

គិតត្រឹមថ្ងៃទី០២ ខែកុម្ភៈ នេះ ជនជាតិវៀតណាមទាំង៦គ្រួសារនេះ​ នៅមិនទាន់រុះរើ ឬមាន​សកម្មភាពណាមួយអាចបញ្ជាក់ថា ​មានការផ្លាស់ប្តូចេញពីទីតាំងនៅឡើយទេ។

កាលពីថ្ងៃទី២៨​ ខែមករា​ ឆ្នាំ២០២៣​ មន្ទីរកសិកម្ម រុក្ខាប្រមាញ់ និងនេសាទ ​ និងខណ្ឌរដ្ឋបាល ជលផលខេត្តក្រចេះ​ បានសហការជាមួយកម្លាំងនគរបាល ​នៃស្នងការដ្ឋាននគរបាលខេត្ត ប្រធានក្រុម ​ប្រឹក្សាឃុំថ្មគ្រែ នាយនគរបាលប៉ុស្តិ៍រដ្ឋបាលថ្មគ្រែ​ និងសហគមន៍នេសាទថ្មគ្រែ ស្រុកចិត្របុរី​ បានហៅ ជនជាតិវៀតណាម ៦នាក់ តំណាងឱ្យ៦គ្រួសារ រស់នៅភូមិឫស្សីចារ ឃុំថ្មគ្រែ ស្រុកចិត្របុរី ដែលជា ម្ចាស់ផ្ទះបណ្តែតទឹក​ និងបែចិញ្ចឹមត្រី ​ក្នុងតំបន់គ្រប់គ្រង ការពារ និង​អភិរក្សសត្វផ្សោតកាំពី មកសាលាឃុំ​ ដើម្បីអប់រំ ណែនាំ និងធ្វើកិច្ចសន្យា​ ឲ្យរុះរើផ្ទះបណ្តែតទឹក និងបែចិញ្ចឹមត្រី ​ចេញពីក្នុងតំបន់គ្រប់គ្រង ការពារ ​និងអភិរក្សសត្វផ្សោត កាំពី ក្នុងខេត្តក្រចេះ​ ជាបន្ទាន់ ។

ជំនាញបានទុករយៈពេលត្រឹមតែ២៨ថ្ងៃ ដើម្បីឱ្យរុះរើផ្ទះបណ្តែតទឹក និងបែចិញ្ចឹមត្រី ​ចេញឱ្យអស់ ពីទីតាំង​រស់នៅបច្ចុប្បន្ន។ ​ការបញ្ចប់ឱសានវាទ ​នៅថ្ងៃទី២៨​ ខែកុម្ភៈ​ ឆ្នាំ២០២៣​ ក្នុង​ករណីជនជាតិវៀតណាមទាំង៦គ្រួសា ​ពុំព្រមធ្វើតាមកិច្ចសន្យាទេនោះ ​អាជ្ញាធរមូលដ្ឋាន មន្ទីរស្ថាប័ន​ ពាក់ព័ន្ធ និងកងកម្លាំង ​មានសមត្ថកិច្ច ​នឹងអនុវត្តតាមច្បាប់ ៕អត្ថបទ៖ សេង ម័រ