ភ្នំពេញ៖ សម្ដេចក្រឡាហោម ស ខេង ឧបនាយករដ្ឋមន្រ្ដី រដ្ឋមន្រ្ដីក្រសួងមហាផ្ទៃ មានប្រសាសន៍​ណែនាំ​ដល់ថ្នាក់ដឹកនាំអគ្គនាយកដ្ឋាននាយកដ្ឋានចំណុះ រួមទាំងរដ្ឋបាលថ្នាក់​ក្រោមជាតិ ត្រូវធានាថា​រាល់បញ្ហាប្រជាពលរដ្ឋក្នុងដែនសមត្ថកិច្ច ​ឬមូលដ្ឋានរបស់ខ្លួន មិនត្រូវគិតថាតូចឬធំនោះទេ ត្រូវយកចិត្តទុកដាក់ប្រមូល ទទួល និងរួមគ្នាដោះស្រាយឱ្យអស់ពីលទ្ធភាព។

សម្ដេចក្រឡាហោម មានប្រសសន៍បែបនេះ ក្នុងពេលផ្សព្វផ្សាយនូវលទ្ធផលរបស់​ក្រុមការងារ​តាមដានអំពីការដោះស្រាយចំពោះមតិយោបល់ ឬសំណូមពររបស់បងប្អូន​ប្រជាពលរដ្ឋ​នៅក្នុង​ទំព័រហ្វេសប៊ុកផ្ទាល់​របស់សម្ដេច ​កាលនៅថ្ងៃទី២ ខែកុម្ភៈនេះ។

យោងតាមរបាយការណ៍ផ្សព្វផ្សាយនៅលើហ្វេសប៊ុកសម្ដេច ស ខេង បានឱ្យដឹងថា ចាប់ពីឆ្នាំ​២០២០រហូតដល់ដំណាច់ឆ្នាំ២០២២កន្លងទៅនេះ​ ក្រុមការងារតាមដានអំពីការដោះ ស្រាយ​ ចំពោះមតិយោបល់ ឬសំណូមពររបស់បងប្អូនប្រជាពលរដ្ឋ នៅក្នុងទំព័រហ្វេសប៊ុក​របស់សម្ដេច បានទទួលសំណូមពរ​ និងសំណួររបស់ប្រជាពលរដ្ឋស្ថិតក្នុងដែនសមត្ថកិច្ចក្រសួងមហាផ្ទៃចំនួន ១.៧៦៨ គណនី។

សម្ដេច មានប្រសាសន៍ថា ក្នុងចំណោមនោះ ក្រុមការងារបានឆ្លើយតបទៅម្ចាស់គណនី និងដោះ​ស្រាយ​បានចំនួន ៨០២ គណនី និង ៦៤៧ គណនីទៀតកំពុងស្ថិតក្នុងដំណាក់កាលដោះស្រាយ។ ទន្ទឹមគ្នានេះក៏​មាន​សំណូម​ពរ​សំណួរ​ និងបញ្ហាខ្លះទៀតត្រូវបានរកឃើញថាខុសពី​សមត្ថកិច្ច​ក្រសួងមហាផ្ទៃ និងបានជូនយោបល់បង្វែរទៅស្ថាប័នមានសមត្ថកិច្ច។

សម្ដេច ស ខេង បានថ្លែង អំណរគុណបងប្អូនជនរួមជាតិដែលបានលើកជាមតិយោបល់ និង​សំណូមពរនានាមកតាមរយៈទំព័រហ្វេសប៊ុកសម្ដេច ដើម្បីរួមគ្នាដោះស្រាយបញ្ហានានាក្រៅ​ប្រព័ន្ធ​តុលាការ ជួយសម្រួលជីវភាពរស់នៅរបស់បងប្អូន និងរួមគ្នាអភិវឌ្ឍន៍សង្គមជាតិ។

សម្ដេច បានណែនាំដល់ថ្នាក់ដឹកនាំអគ្គនាយកដ្ឋាន​នាយកដ្ឋានចំណុះ រួមទាំងរដ្ឋបាលថ្នាក់​ក្រោម​ជាតិថា រាល់បញ្ហាដែលក្ដាប់បាន ឬទទួលបានពីប្រជាពលរដ្ឋ និងទទួលបានពីថ្នាក់លើដែល​នៅសេសសល់​គប្បីខិតខំពន្លឿនការដោះស្រាយ ហើយត្រូវប្រាកដថា​ការដោះស្រាយនោះមាន​ភាព​គ្រប់ជ្រុងជ្រោយ ចំបញ្ហា ​និងចប់ចុងចប់ដើមប្រកបដោយយុត្តិធម៌ ដោយមិនគ្រាន់តែធ្វើជាលិខិត​ស្នាមបញ្ជា ​និងបញ្ជូនតាមបែបបទរដ្ឋបាលនោះឡើយ៕ អត្ថបទ៖ វ៉ន ដារ៉ា