​ប៉ា​គី​ស្ថាន​៖ មន្ត្រី​នគរបាល និង​សមាជិក​នៃ​កងកម្លាំង​វរជន​ Khyber Pashtunkhwa បាន​ធ្វើ​បាតុកម្ម​នៅក្នុង​ក្រុង​ជាច្រើន​នៃ​ខេត្ត​ Peshawar កាលពី​ថ្ងៃ​ពុធ​។​ ​ការតវ៉ា​បាន​ផ្ទុះឡើង​ បន្ទាប់ពី​ការ​បំផ្ទុះ​គ្រាប់បែក​ដ៏​ឃោរឃៅ​នៅ​ក្នុង​វិហារ​ឥស្លាម​មួយ​កន្លែង​កាលពី​ថ្ងៃ​ចន្ទ ទី​៣០ ខែមករា ដែល​បាន​ឆក់​យក​ជីវិត​មនុស្ស​ជាង ១០០នាក់​។

ក្នុងចំណោម​អ្នក​ស្លាប់​ទាំង​អស់ ៣​នាក់​គឺជា​នគរបាល ដែល​ធ្វើឱ្យ​វា​ក្លាយ​ជា​ការ​ស្លាប់ និង​របួស​ច្រើន​បំផុត​ទទួលរង​ដោយ​កង​កម្លាំង​សន្តិសុខ​ប៉ា​គី​ស្ថាន ក្នុង​ការ​វាយប្រហារ​តែមួយ​លើក​ក្នុង​ប្រវត្តិសាស្ត្រ​ថ្មីៗ​នេះ​។ ​ទីក្រុង Peshawar ស្ថិតនៅ​ជ្រុង​នៃ​ទឹកដី​កុលសម្ព័ន្ធ​ Pashtun ជា​តំបន់​ដែល​ញាំញី​ដោយ​អំពើ​ហិង្សា​អស់​រយៈ​ពេល ២​ទសវត្សរ៍​កន្លង​មក​នេះ​។ ក្រុម​សកម្មប្រយុទ្ធ​សកម្ម​បំផុត​នៅ​ក្នុង​តំបន់​នោះ​គឺ​ក្រុម​តា​លី​បង់​ប៉ា​គី​ស្ថាន ដែល​ហៅ​មួយ​ទៀត​ថា តេ​រីក អ៊ី តា​លី​បង់​ប៉ាគី​ស្ថាន​ (Tehreek-e-Taliban Pakistan TTP) ថ្មីៗ​នេះ​បាន​បង្កើន​ការវាយប្រហារ​លើ​នគរបាល ជា​ផ្នែក​នៃ​យុទ្ធនាការ​របស់​ខ្លួន​ប្រឆាំង​រដ្ឋាភិបាល​នៅ​ទីក្រុង​អ៊ី​ស្លា​ម៉ា​បាដ​។

ក្រុម TTP បាន​បដិសេធ​ការទទួលខុសត្រូវ​ចំពោះ​ការវាយប្រហារ​នៅ​វិហារ​ឥស្លាម ដែល​នៅ​មិន​ទាន់​មាន​ក្រុម​ណា​មួយ​អះអាង​នៅឡើយ​រហូត​មក​ដល់​ពេល​នេះ​។ ​ស្នងការ​ខេត្ត​និយាយ​ថា លោក​សង្ស័យ​ថា បក្សពួក​ក្រុម​បំបែក​ខ្លួន​នៃ​ក្រុម TTP ឈ្មោះថា Jamat-ul-Ahrar មាន​ជាប់​ពាក់ព័ន្ធ​ក្នុង​ការ​បំផ្ទុះ​។ ការវាយប្រហារ​នេះ​គឺជា​ការវាយប្រហារ​ដ៏​ឃោរឃៅ​បំផុត​នៅ​ក្នុង​ទីក្រុង Peshawar ចាប់​តាំងពី​ការ​បំផ្ទុះ​គ្រាប់បែក​អត្តឃាត​ពីរ​លើក​នៅ​វិហារ All Saints បណ្តាល​ឲ្យ​អ្នក​ថ្វាយបង្គំ​ច្រើន​នាក់​ស្លាប់​កាលពី​ខែ​កញ្ញា ឆ្នាំ​២០១៣ ដែល​ជា​ការវាយប្រហារ​ដ៏​អាក្រក់​បំផុត​ទៅ​លើ​ជនជាតិភាគតិច​គ្រឹស្តសាសនា​របស់​ប្រទេស​នេះ៕

អត្ថបទ៖ ប៊ុនថន