ភ្នំពេញ៖ តៃកុងទូកទេសចរខ្នាតតូច សម្រាប់ដឹកភ្ញៀវកម្សាន្តជុំវិញ អាងទឹកទំនប់ម្លេច បានប្រាប់ឲ្យដឹងថា ​សេវាទូកដឹកភ្ញៀវទេសចរនៅ​រមណីដ្ឋាន​ធម្មជាតិម្លេច ​កំពុងល្អប្រសើរឡើង ព្រោះភ្ញៀវមកលេងកាន់តែច្រើន ​ហើយអ្នកនិយមជិះទូកកម្សាន្តក៏ច្រើន ធ្វើឲ្យពូកគេដែលជាតៃកុង​ទូក ជាធម្យមក្នុងមួយថ្ងៃអាចរកប្រាក់ចំណូលបានចន្លោះពី៥ម៉ឺន ទៅ៨ម៉ឺនរៀល។

តៃកុងទូកដឹកភ្ញៀវទេសចរនៅរមណីយដ្ឋានធម្មជាតិម្លេច បានប្រាប់ឲ្យដឹងថា ក្រោយពេលបើកប្រ ទេសឡើងវិញ ​ភ្ញៀវទេសចរចាប់ផ្តើមសម្រុកមកលេងតំបន់រមណីយ​ដ្ឋានទំនប់ម្លេច​កាន់តែច្រើនជាមុន។ ការជិះទូកពេញនិយម​ណាស់ ​នាពេល​បច្ចុប្បន្ន​ ដោយ​តម្លៃក៏សមរម្យ ហើយ​បាន​គយគន់​ទេសភាពផ្ទៃទឹក ​និងសម្រស់ព្រៃភ្នំ ​និងការតុបតែងលម្អផ្សេងៗ​នៅតាមកន្លែង​កម្សាន្ត​នីមួយៗ នៅជាប់មាត់បឹង ធ្វើឲ្យភ្ញៀវរីករាយ ។

អ្នកបើកទូក បានបញ្ជាក់ថា ទូកដឹកភ្ញៀវទេសចរនៅតំបន់រមណីយដ្ឋានទំនប់ម្លេចនេះ ​បច្ចុប្បន្ន​មានច្រើនគ្រឿង ​ហើយនៅថ្ងៃចុងសប្តាហ៍​ ឬបុណ្យទាន ​មានភ្ញៀវជិះទូកច្រើន ដែល​ទាមទារ​ឲ្យម្ចាស់​រមណីយដ្ឋាន ​ត្រូវទៅរកទូកពីខាងក្រៅបន្ថែម ។

បើតាមការបញ្ជាក់របស់តៃកុងទូកទេសចររូបនេះ ​ថា​ក្នុងករណីពិសេស ​ពេលភ្ញៀវម្នាក់ឬពីរនាក់​ចង់ជិះទូកកម្សាន្ត ​ ក៏ទូកគាត់ចេញទៅដែរ ប៉ុន្តែភ្ញៀវត្រូវបង់ថ្លៃទ្វេរដង ​បានន័យថា ម្នាក់២ម៉ឺនរៀល ២នាក់៤ម៉ឺនរៀល ​ ហើយទូកគេផ្សេងទៀត​ ជាច្រើនគ្រឿង ​ក៏ធ្វើដូច្នេះដែរ ដើម្បីលើកស្ទួយតំបន់​ម្លេចផង​ និងជីវភាពខ្លួនផង ៕អត្ថបទ៖ អន សារឹម