ភ្នំពេញ៖ អង្គការសហប្រជាជាតិ (UN) បានសន្យាកៀរគរថវិកា ពីប្រទេសនានាដែលជាដៃគូ ក្នុងការជួយកម្ពុជា បោស​សំអាត​ដីចម្ការមីនដែលនៅសេសសល់ ហើយដើម្បីឲ្យសម្រេចតាមផែនការកម្ពុជាគ្មានមីន នៅឆ្នាំ២០២៥ខាងមុខ ។

ក្នុងជំនួបជាមួយលោក Joseph Scheuer ប្រធាន UN ប្រចាំនៅកម្ពុជា នារសៀលថ្ងៃទី២ ខែកុម្ភៈ ឆ្នាំ២០២៣នេះ ឯកឧត្តមទេសរដ្ឋមន្ត្រី លី ធុជ អនុប្រធានទី១ អាជ្ញាធរមីន មានប្រសាសន៍ថា យូអិន បានចាត់ទុកការងារបោសសំអាត​មីននៅកម្ពុជា គឺជាចំណុចសំខាន់មួយផងដែររបស់ខ្លួន ហើយនៅតែគាំទ្រកម្ពុជា លើការងារបោសសំអាតមីននេះ បន្ទាប់ពីបានចូលរួមជួយកម្ពុជា លើវិស័យនេះ អស់រយៈពេល៣០ឆ្នាំមកហើយ ។

ឯកឧត្តមបានបន្តថា អង្គការសហប្រជាជាតិ បានវាយតម្លៃខ្ពស់ ចំពោះកិច្ចខិតខំប្រឹងប្រែងរបស់កម្ពុជា លើវិស័យ​សកម្មភាព​មីន ពិសេសសកម្មភាពរបស់សម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដែលបាន​ផ្ដល់ថវិកា ៣០លានដុល្លារ ដើម្បីអនុវត្តគម្រោងនេះ រួមទាំងបានកៀរគរថវិកាពីសប្បុរសជន ចូលរួមក្នុងការងារសំអាតមីន ហើយ UN សន្យាជួយកៀរគរថវិកាពីដៃគូរនានា ជួយដល់ប្រទេសកម្ពុជា ឲ្យសម្រេចបានតាមផែនការ ។

ឯកឧត្តម លី ធុជ បានបន្ថែមថា ប្រទេសកម្ពុជា មានផ្ទៃដីចម្ការមីនច្រើនជាងគេនៅលើពិភពលោក មានអ្នករងគ្រោះថ្នាក់​ដោយសារសំណល់សង្គ្រាមច្រើន ហើយរហូតមកដល់ពេលនេះ កម្ពុជាក៏ជាប្រទេសដែលបានបោសសំអាតដីចម្ការមីន បានច្រើនជាងគេផងដែរនៅលើពិភពលោក រួមទាំងមានការប្រកាសតំបន់ខ្លះ ជាតំបន់អស់មីន ៕

អត្ថបទ ៖ បាន សុខរិទ្ធិ