អន្ដរជាតិ៖ ក្រសួងការបរទេសកូរ៉េខាងជើង និយាយនៅថ្ងៃព្រហស្បតិ៍នេះថា សមយុទ្ធ​យោធារបស់សហរដ្ឋអាមេរិក និងសម្ព័ន្ធ​មិត្ត​របស់ពួកគេ មានតែធ្វើឲ្យស្ថានភាពឆ្លងកាត់គំនូសខ្សែក្រហម និងគំរាមកំហែងធ្វើឲ្យឧបទ្វីបកូរ៉េ ធ្លាក់ក្នុងតំបន់​​សង្រ្គាម​កាំភ្លើង​ធំតែ​ប៉ុណ្នោះ។

ទីភ្នាក់ងារព័ត៌មានរដ្ឋកូរ៉េខាងជើង KCNA រាយការណ៍ថា ទីក្រុងព្យុងយ៉ាង មិនចាប់អារម្មណ៍លើកិច្ចពិភាក្សានោះទេ ​នៅពេលដែលទីក្រុងវ៉ាស៊ីងតោន​បន្តតាមប្រម៉ាញ់គោលនយោបាអរិភាពបែបនេះ។ អ្នកនាំពាក្យក្រសួងការបរទេសកូរ៉េខាងជើង និយាយនៅក្នុងសេចក្តីថ្លែងការណ៍ថា ស្ថានភាពយោធា និងនយោបាយ​នៅឧបទ្វីបកូរ៉េ និងក្នុងតំបន់ បានឈានដល់គំនូសខ្សែក្រហមដ៏តានតឹងបំផុត ដោយសារតែសមយុទ្ធយោធាដ៏ធ្វេសប្រហែស​ និងសកម្មភាពអរិភាពរបស់សហរដ្ឋអាមេរិក និង​កងកម្លាំងសម្ព័ន្ធមិត្តរបស់ពួកគេ៕