ភ្នំពេញ៖ រាជរដ្ឋាភិបាលកម្ពុជាគ្រោងបង្កើតរោងចក្រទឹកស្អាតនិរោធជំហានទី៣ មានសមត្ថភាពផលិតប្រមាណជាង ១៣០ពាន់ម៉ែត្រគីប ស្ថិតក្រោមគម្រោងហិរញ្ញប្បទានរបស់ទីភ្នាក់ងារសហប្រតិបត្តិការអន្តរជាតិជប៉ុន (JICA) ដើម្បីជំរុញការផ្គត់ផ្គងតំបន់ភាគខាងកើត និងខាងត្បូងរាជធានីភ្នំពេញ។
ឯកឧត្តម ឡុង ណារ៉ូ អគ្គនាយករដ្ឋាករទឹកស្វយ័តក្រុងភ្នំពេញ លើកឡើងក្នុងពិធីចុះហត្ថលេខាលើកំណត់ប្រជុំពិភាក្សា ស្តីពីការរៀបចំសិក្សាសមិទ្ធិលទ្ធភាព របស់គម្រោងពង្រីកប្រព័ន្ធផ្គត់ផ្គង់ទឹកស្អាតនិរោធ រវាងរដ្ឋាករទឹកស្វយ័តក្រុងភ្នំពេញ និងទីភ្នាក់ងារសហប្រតិបត្តិការអន្តរជាតិជប៉ុន នៅថ្ងៃទី២ ខែកុម្ភៈ ឆ្នាំ២០២៣នេះថា ផ្អែកទៅលើគម្រោងមេជំហានទី៣ របស់រដ្ឋាករទឹកស្វយ័តក្រុងភ្នំពេញ គឺសំដៅការរៀបចំគម្រោងនេះឲ្យដំណើរការ ធានារដល់ការផ្គត់ផ្គង់ទឹកជូនប្រជាជននៅក្នុងរាជធានីភ្នំពេញ ឲ្យទាន់កម្មវិធីកំណត់ដែលបានចែងក្នុងគម្រោងមេជំហានទី៣ គឺស្ថិតក្រោមជំនួយឥតសំណង់របស់ប្រទេសជប៉ុន លើការសិក្សាគម្រោងមេឆ្នាំ២០២១-២០៣០ ដែលបច្ចុប្បន្នរដ្ឋាករទឹកស្វយ័តក្រុងភ្នំពេញ បានសហការយ៉ាងជិតស្និតជាមួយដៃគូអភិវឌ្ឍន៍ ដើម្បីស្វែងរកឥណទាន ឬជំនួយឥតសំណង ដើម្បីជំរុញនៅឆ្នាំ២០៣០ ត្រូវផលិតទឹកស្អាតឲ្យបាន ១.៨លានម៉ែត្រគីប ក្នុងមួយថ្ងៃ សំដៅគ្រប់គ្រង់ទឹកនៅក្នុងរាជធានីភ្នំពេញ មានទឹកសម្រាប់ការប្រើប្រាស់គ្រប់គ្រាន់ និងស្របតាមកំណើននៃប្រជាពលរដ្ឋ។
ឯកឧត្តម បន្តថា ដើម្បីជំរុញការផ្គត់ផ្គង់ទឹកឆ្លើយតបនៃការប្រើប្រាស់នេះ គម្រោងពង្រីករោងចក្រទឹកស្អាតនិរោធជំហានទី ៣ ដែលមានសមត្ថភាពផលិតប្រមាណជា ១៣០ពាន់ម៉ែត្រគីប ក្នុងមួយថ្ងៃ, ចាប់ពីឆ្នាំនេះតទៅ ទីប្រឹក្សាបច្ចេកទេស នឹងចាប់ផ្តើមពីសមិទ្ធិសមត្ថភាពពីពីខែមេសា ខាងមុខនេះ ក្នុងនោះ បន្ទាប់ពីបញ្ចប់ការសិក្សានៅដើមឆ្នាំ ២០២៤ រដ្ឋាករទឹកស្វយ័តក្រុងភ្នំពេញ និងពិភាក្សាលើចំនួនឥណទាន ទៅលើគម្រោងទាំងមូល ដែលនឹងផ្តល់ដោយទីភ្នាក់ងារសហប្រតិបត្តិការអន្តរជាតិជប៉ុន បន្ទាប់មកនឹងដាក់ដេញថ្លៃអ្នកសាងសង់ ការជ្រើសរើសអ្នកត្រួតពិនិត្យសំណង់ នឹងចាប់ផ្តើមសាងសង់នៅក្នុងឆ្នាំ ២០២៦ នឹងគ្រោងបញ្ចប់នៅក្នុងឆ្នាំ២០២៩ បន្ទាប់ពីធ្វើការសាងសង់រួច គម្រោងនេះនឹងជំរុញការតភ្ជាប់ទឹកស្អាតទៅតំបន់ជាយក្រុង។
ឯកឧត្តម ឡុង ណារ៉ូ ថ្លែងឲ្យដឹងថា ជុំវិញការអភិវឌ្ឍន៍វិស័យទឹកស្អាតនេះ រដ្ឋាករទឹកស្វយ័តក្រុងភ្នំពេញ មានដៃគូរសហការសំខាន់ចំនួនពីរគឺ ទីភ្នាក់ងារសហប្រតិបត្តិការអន្តរជាតិជប៉ុន (JICA) និងទីភ្នាក់ងារសម្រាប់ការអភិវឌ្ឍន៍បារាំង (AFD) និងអឺរ៉ុបផងដែរ គឺបានសហការយ៉ាងជិតស្និទ្ធក្នុងការបង្កើតរោងចក្រ និងការធានានិរន្តរភាពនៃការផ្គត់ផ្គង់ទឹកស្អាតជូនប្រជាពលរដ្ឋ ក្នុងនោះ រដ្ឋាករទឹកស្វយ័តក្រុងភ្នំពេញ ក៏មានដៃគូរអភិវឌ្ឍន៍ក្នុងវិស័យទឹកស្អាតមួយទៀត ជាមួយកូរ៉េខាងត្បូង ដែលទទួលអភិវឌ្ឍន៍នៅតំបន់ព្រលានយន្តហោះបង្កើតថ្មី និងការផ្គត់ផ្គង់នៅតំបន់អរិយ្យក្សត្រ បច្ចុប្បន្នកម្ពុជាទទួលបានការឯកភាពពីកូរ៉េហើយ នឹងនៅចុងខែនេះ ទីភ្នាក់ងារសហប្រតិបត្តិការកូរ៉េ នឹងបន្តចូលរួមអភិវឌ្ឍន៍ សំដៅជំរុញការអភិវឌ្ឍន៍ឲ្យឆ្លើយតបទៅនឹងផែនការឆ្នាំ ២០៣០ ដែលមានទឹកស្អាតប្រើប្រាស់ដល់ ១.៨ លានម៉ែត្រគីបក្នុងមួយថ្ងៃ៕ អត្ថបទ៖ សុន រ៉ាឌី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
