ភ្នំពេញ៖ ប្រមុខរាជរដ្ឋាភិបាលកម្ពុជា សម្ដេចតេជោ ហ៊ុន សែន បានបញ្ជាក់ថា សម្ដេចពេញចិត្តនឹងលទ្ធផលនៃកិច្ចប្រជុំកំពូលអាស៊ានពិសេសនៅថ្ងៃនេះ ដែលរៀបចំធ្វើឡើងនៅឯទីក្រុងហ្សាកាតា ប្រទេសឥណ្ឌូនេស៊ី។
សម្ដេចតេជោ ហ៊ុន សែន បានបញ្ជាក់បែបនៅលើទំព័រហ្វេសប៊ុកផ្លូវការរបស់លោកនៅល្ងាចនេះ ខណៈសម្ដេច និងប្រតិភូជាន់ខ្ពស់កម្ពុជា កំពុងធ្វើដំណើរវិលត្រឡប់មកមាតុប្រទេសវិញនៅយប់នេះ ក្រោយបញ្ចប់កិច្ចប្រជុំមេដឹកនាំអាស៊ានពិសេស។
សម្ដេចតេជោ ហ៊ុន សែន សរសេរថា៖ «នៅពេលនេះ ខ្ញុំកំពុងដឹកនាំគណៈប្រតិភូជាន់ខ្ពស់ធ្វើដំណើរវិលត្រឡប់មកកាន់មាតុប្រទេសវិញ បន្ទាប់ពីបានចូលរួមកិច្ចប្រជុំកំពូលអាស៊ានពិសេសជាមួយមេដឹកនាំអាស៊ាន ដែលបានប្រព្រឹត្តទៅនៅទីក្រុងហ្សាកាតា ប្រទេសឥណ្ឌូនេស៊ី នៅថ្ងៃទី២៤ ខែមេសា ឆ្នាំ២០២១»។
តាមទំព័រហ្វេសប៊ុកដដែល ប្រមុខរាជរដ្ឋាភិបាលកម្ពុជាបញ្ជាក់ថា សម្ដេចពេញចិត្តនឹងលទ្ធផលនៃកិច្ចប្រជុំកំពូលពិសេសរបស់មេដឹកនាំអាស៊ានលើកនេះ។
សម្ដេចតេជោ ហ៊ុន សែន បញ្ជាក់បន្ថែមថា ក្រុមមេដឹកនាំអាស៊ាន បានពិភាក្សាទៅលើការជំរុញការកសាងសហគមន៍អាស៊ាន និងគំនិតផ្ដួចផ្ដើមនានា ដើម្បីឆ្លើយតបនឹងការរាតត្បាតនៃមេរោគកូវីដ-១៩ ការខិតខំស្ដារសេដ្ឋកិច្ច-សង្គមឡើងវិញ ទំនាក់ទំនងអាស៊ានជាមួយដៃគូខាងក្រៅតំបន់ និងស្ថានការណ៍អន្តរជាតិ។
សម្ដេចតេជោ ហ៊ុន សែន បញ្ជាក់ថា៖ «ខ្ញុំរីករាយចំពោះលទ្ធផលល្អនៃជំនួបប្រជុំពិសេសថ្ងៃនេះ ដែលបានពង្រឹងនូវសន្តិភាព ស្ថិរភាព និងវឌ្ឍនភាពក្នុងតំបន់ ដែលជាបំណងប្រាថ្នានៃអាស៊ានទាំងមូល»។
ក្រៅពីកិច្ចប្រជុំរួមជាមួយមេដឹកនាំអាស៊ាន សម្ដេចតេជោ ហ៊ុន សែន បានបញ្ជាក់ថា សម្ដេចក៏បានជួបប្រជុំលក្ខណៈទ្វេភាគីជាមួយប្រធានាធិបតីឥណ្ឌូនេស៊ី លោក ចូកូ វីដូដូ និងនាយករដ្ឋមន្ត្រីវៀតណាម លោក ផាំ ម៉ិញឈីញ (Pham Minh Chinh)ផងដែរ។
សម្ដេចតេជោ បានបញ្ជាក់បន្ថែមថា សម្ដេច និងគណៈប្រតិភូជាន់កម្ពុជា នឹងត្រូវផ្ដល់សំណាក់ពិនិត្យកូវីដ-១៩ជាថ្មីម្ដងទៀត នៅពេលធ្វើដំណើរមកដល់អាកាសយានដ្ឋានអន្តរជាតិភ្នំពេញ ហើយរក្សាខ្លួននៅដាច់ដោយឡែកនៅឯគេហដ្ឋាន ដើម្បីធានាសុវត្ថិភាពសុខភាព៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
