ភ្នំពេញ ៖ លោកជំទាវវេជ្ជបណ្ឌិត យក់ សម្បត្ដិ រដ្ឋលេខាធិការប្រចាំការ តំណាងដ៏ខ្ពង់ខ្ពស់ ឯកឧត្តមសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល បានអៈអាងថា កម្ពុជាឆ្លង​កាត់​នូវរយៈ​ពេលដ៏លំបាកក្នុងការរាតត្បាត​ជា​សកល​នៃវីរុសកូវីដ-១៩ កម្ពុជាបានធ្វើការ​ឆ្លើយ​តប​យ៉ាងមានប្រសិទ្ធភាព ចំពោះមេរោគកូវីដ-១៩ ក្នុងរយៈពេលជិត៣ឆ្នាំ​កន្លងមកនេះ បើប្រៀបធៀប​ជាមួយបណ្តាប្រទេសផ្សេងទៀតក្នុងតំបន់ ក៏ដូចជានៅក្នុងសកលលោក។

ការថ្លែងរបស់លោកជំទាវវេជ្ជបណ្ឌិត យក់ សម្បត្ដិ រដ្ឋលេខាធិការប្រចាំការក្រសួងសុខាភិបាល តំណាងដ៏ខ្ពង់ខ្ពស់ ឯកឧត្តមសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល យ៉ាងដូច្នេះ ក្នុងកិច្ចប្រជុំក្រុមការងារ​បច្ចេកទេស​សុខាភិបាល, នាព្រឹកថ្ងៃទី២ ខែកុម្ភៈ ឆ្នាំ២០២៣នេះ ដោយ​មានការចូលរួមពីលោកស្រីវេជ្ជបណ្ឌិត លី អាយលែន តំណាងអង្គការសុខភាពពិភពលោក​ប្រចាំនៅកម្ពុជា ជាសហប្រធាន ដោយមានការចូលរួមពី តំណាងក្រសួងស្ថាប័ន​នៃរាជរដ្ឋាភិបាល ដៃគូអភិវឌ្ឍន៍ សមាគម និងអង្គការមិនមែនរដ្ឋាភិបាល មជ្ឈមណ្ឌលជាតិ មន្ទីរពេទ្យជាតិ ស្ថាប័នក្រោមឱវាទក្រសួងសុខាភិបាល ផងដែរ។

លោកជំទាវវេជ្ជបណ្ឌិត យក់ សម្បត្ដិ បានបន្តថាកិច្ចប្រជុំក្រុមការងារបច្ចេកទេស សុខាភិបាល ជាយន្តការសម្របសម្រួល និងជាវេទិកាពិគ្រោះយោបល់ក្នុងភាពជាដៃគូប្រកបដោយប្រសិទ្ធភាព សម្របសម្រួលជំនួយហិរញ្ញប្បទាន​ដៃគូអភិវឌ្ឍន៍នានា សំដៅគាំទ្រការ​អនុវត្តឱ្យ​បាន​សម្រេច​នូវគោលដៅ​អភិវឌ្ឍន៍ជាតិ ដែលបាន​កំណត់ក្នុង​យុទ្ធសាស្ត្រ​ចតុកោណ ផែនការអភិវឌ្ឍន៍​យុទ្ធសាស្ត្រជាតិ យុទ្ធសាស្ត្រតាមវិស័យ និងកម្មវិធីកំណែទម្រង់របស់រាជរដ្ឋាភិបាល។

​លោកជំទាវរដ្ឋលេខាធិការប្រចាំការ ក៏បានសម្តែងអំណរគុណយ៉ាងជ្រាលជ្រៅ ជូនចំពោះ​ដៃគូ​អភិវឌ្ឍន៍ ដែលតែងតែជួយឧបត្ថម្ភគាំទ្រទាំងថវិកា និងបច្ចេកទេសដល់វិស័យសុខាភិបាលកម្ពុជា ដែលសបញ្ជាក់ពី​ការយកចិត្ត​ទុកដាក់ខ្ពស់ ចំពោះ រាជរដ្ឋាភិបាល និងប្រជាជនកម្ពុជា ជាពិសេស​ក្នុងកាលៈទេសៈ ដែលកម្ពុជាបានខិតខំប្រឹងប្រែង​ដើម្បី​ជំរុញវិធាន​ការការពារ​ទប់ស្កាត់​នឹងឆ្លើយតបការរាតត្បាតនៃជំងឺកូវីដ-១៩។ កិច្ចប្រជុំក្រុមការងារបច្ចេកទេសសុខាភិបាល បានបញ្ចប់ដោយលទ្ធផលគួរជាទីមោទនៈ ក្នុងស្មារតីសាមគ្គីភាព មិត្តភាព និងកិច្ចសហប្រតិបត្តិការរវាងដៃគូអភិវឌ្ឍន៍ និងក្រសួងសុខាភិបាល៕ អត្ថបទ ៖ រដ្ឋា