ប្រដាល់សកល៖ សហព័ន្ធកីឡាប្រដាល់សកលកម្ពុជាបានប្រកាសមន្ត្រីអាជ្ញាកណ្តាល-ចៅក្រមរបស់ខ្លួន ៨រូបបានប្រឡងជាប់វិញ្ញាបនបត្រអាជ្ញាកណ្ដាល-ចៅក្រមអន្ដរជាតិផ្កាយ១ នៃសមាគមកីឡាប្រដាល់សកលអន្ដរជាតិ(IBA) ដែលនាំឲ្យសហព័ន្ធមានធនធានមន្ដ្រីបច្ចេកទេសគ្រប់គ្រាន់ សម្រាប់ចូលរួមកាត់សេចក្ដី និងរៀបចំការប្រកួតកីឡាស៊ីហ្គេមលើកទី៣២ នៅកម្ពុជានាខែឧសភា ឆ្នាំ២០២៣ ខាងមុខ។
លោក ប៊ុយ សុភ័ណ្ឌ អគ្គលេខាធិការសហព័ន្ធបានឲ្យដឹងថា មន្ត្រីបច្ចេកទេសកម្ពុជាដែលបានប្រឡងជាប់អាជ្ញាកណ្ដាល-ចៅក្រមអន្ដរជាតិផ្កាយ១ នេះគឺមានលោក សួស លីនណា លោក ម៉ាក់ សាមឿន លោក ផល សុផាត លោក ណុប វ៉ាន់ថេត លោក ម៉ី រតនៈ លោក ជួន សំណាង លោក នួន វុទ្ធី និងកញ្ញា ឥន្ទ វិចិត្រ បន្ទាប់ពីអាជ្ញាកណ្ដាល-ចៅក្រមទាំង ៨រូបនេះបានឆ្លងកាត់វគ្គបណ្ដុះបណ្ដាលអាជ្ញាកណ្ដាល-ចៅក្រមអន្ដរជាតិផ្កាយ១ កាលពីខែធ្នូ ឆ្នាំ២០២២ កន្លងទៅ។ ថ្លែងក្រោយពិធីប្រគល់ និងទទួលវិញ្ញាបនបត្របញ្ជាក់ការសិក្សាដល់អាជ្ញាកណ្ដាល-ចៅក្រមអន្ដរជាតិផ្កាយ១ របស់កម្ពុជាកាលពីថ្ងៃទី២ ខែកុម្ភៈម្សិលមិញ លោក ប៊ុយ សុភ័ណ្ឌ បានសម្ដែងនូវសេចក្ដីរីករាយជាខ្លាំង បន្ទាប់ពីមន្ដ្រីបច្ចេកទេសកម្ពុជាបានប្រឡងជាប់ និងទទួលស្គាល់ដោយសមាគមកីឡាប្រដាល់សកលអន្ដរជាតិ។
នេះគឺជាកំណត់ត្រាប្រវត្តិសាស្ដ្រថ្មីមួយរបស់សហព័ន្ធ ដែលមានអាជ្ញាកណ្ដាល-ចៅក្រមអន្ដរជាតិផ្កាយ១ ដ្បិតកន្លងមកមានត្រឹមអាជ្ញាកណ្ដាល-ចៅក្រមថ្នាក់ជាតិប៉ុណ្ណោះ។ អគ្គលេខាធិការសហព័ន្ធដដែលពន្យល់ថា ការទទួលបានអាជ្ញាកណ្ដាល-ចៅក្រមអន្ដរជាតិនេះគឺជារឿងដ៏ល្អ ស្របពេលការប្រកួតស៊ីហ្គេមឆ្នាំ២០២៣ កាន់តែខិតជិតមកដល់។ ដូច្នេះក្នុងចំណោមអាជ្ញាកណ្ដាល-ចៅក្រមទាំង ៨រូបនឹងមាន ២រូបចូលរួមកាត់សេចក្តីក្នុងការប្រកួតកីឡាស៊ីហ្គេមជាប្រវត្ដិសាស្ដ្រនៅកម្ពុជា។ រីឯមន្ត្រីអាជ្ញាកណ្តាល-ចៅក្រម ៦រូបទៀតក៏នឹងចូលរួមជាមន្ត្រីបច្ចេកទេស សម្រាប់ការរៀបចំព្រឹត្តិការណ៍កីឡាប្រចាំតំបន់ ២ឆ្នាំម្ដងនេះផងដែរ៕ អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
