ភ្នំពេញ៖ សម្តេចតេជោ ផ្តល់បណ្ណកម្មសិទ្ធិស្របច្បាប់ជូនពលរដ្ឋជាង ១២០០គ្រួសារ នៅបុរីកីឡា ជាមួយនឹងការលើកលែងការបង់ពន្ធប្រថាប់ត្រា ពន្ធអចលនទ្រព្យ និងពន្ធអាករផ្សេងៗទៀត។

ប្រជាពលរដ្ឋប្រមាណជាង ១២០០គ្រួសារ រស់នៅក្នុងអគារបុរីកីឡាទាំង០៨ អគារ ស្ថិតក្នុង​សង្កាត់វាលវង់ ខណ្ឌ៧មករា រាជធានីភ្នំពេញ បានបង្ហាញពីក្តីរំភើបរីករាយយ៉ាងខ្លាំង ខណៈដែល​សម្តេចតេជោ ហ៊ុន សែន នាយករដ្ឋមន្ត្រី បានសម្រេចផ្តល់បណ្ណកម្មសិទ្ធិ​លើ​ចំណែកឯកជនជូន​ពួកគាត់ ជាមួយនឹងការលើកលែងការបង់ពន្ធប្រថាប់ត្រា ពន្ធអចលនទ្រព្យ និងពន្ធអាករផ្សេងៗ​ថែមទៀតនោះ។

ការបង្ហាញពីក្តីរំភើបរីករាយពីសំណាក់ប្រជាពលរដ្ឋខណៈឯកឧត្តម ឃួង ស្រេង អញ្ជើញជួប​សំណេះ​សំណាល និងរៀបចំយុទ្ធនាការចុះបញ្ជីធ្វើបណ្ណកម្មសិទ្ធិលើចំណែក​ឯកជនចំនួន ១៣៩២ យូនីត ស្មើនិងជាង ១២០០គ្រួសារជូនពួកគាត់ នាព្រឹកថ្ងៃទី០៣ ខែកុម្ភៈ ឆ្នាំ២០២៣។

ឯកឧត្តម ឃួង ស្រេង បានមានប្រសាសន៍ថា ដោយពិនិត្យឃើញអំពីស្ថានភាពរបស់បងប្អូន​ប្រជា​ពលរដ្ឋ និងដើម្បីជួយសម្រួលឱ្យពលរដ្ឋទទួលបានកម្មសិទ្ធិស្របច្បាប់​លើចំណែកឯកជន​នៃអគារ​សហកម្មសិទ្ធិបុរីកីឡា ក៏ដូចជាសម្រាលបន្ទុកក្នុងការបង់ពន្ធអាករ និងសេវាសុរិយោដីនានា ក្នុង​ដំណើរការបំពេញនីតិវិធីកសាងបណ្ណកម្មសិទ្ធិខាងលើសម្តេចតេជោ នាយករដ្ឋមន្ត្រី បានសម្រេចឱ្យ​អាជ្ញាធររាជធានីភ្នំពេញរៀបចំបែបបទ ដើម្បីចុះបញ្ជីធ្វើបណ្ណកម្មសិទ្ធិលើចំណែកឯកជនចំនួន ១៣៩២ យូនីត នៃអគារបុរីកីឡាទាំង០៨អគារ ជូនបងប្អូនប្រជាពលរដ្ឋទាំងអស់ ប្រមាណជាង ១២០០ គ្រួសារ ជាមួយនិងការលើកលែងនូវការបង់ពន្ធប្រថាប់ត្រា ពន្ធអចលនទ្រព្យ និងពន្ធអាករ​ផ្សេងៗ ព្រមទាំងសេវាអន្តរក្រសួងនានា ក្នុងការចុះបញ្ជីធ្វើបណ្ណកម្មសិទ្ធិលើចំណែក​ឯកជនទាំងអស់នេះ។

ឯកឧត្តម ឃួង ស្រេង បន្តថា នេះពិតជាស្ដែងឱ្យឃើញអំពីការយកចិត្តទុកដាក់របស់សម្ដេចតេជោ ហ៊ុន សែន ដល់បងប្អូនប្រជាពលរដ្ឋទាំងអស់ ​ដែលរស់នៅក្នុងអគារបុរីកីឡា ។ តាមរយៈការជួយសម្រួលដល់ការធ្វើបណ្ណកម្មសិទ្ធិខាងលើ ដោយពុំចំណាយថវិកាលើការបង់​ពន្ធអាករ​ផ្សេងៗ និងសេវាអន្តរក្រសួងនានានោះ សូមបងប្អូនប្រជាពលរដ្ឋទាំងអស់ ដែលរស់​នៅក្នុងអគារបុរីកីឡា បន្តគាំទ្រសម្តេចតេជោ ជាបេក្ខភាពនាយករដ្ឋមន្ត្រី សម្រាប់ការ​បោះឆ្នោតជ្រើសតាំងតំណាងរាស្ត្រ អាណត្តិទី៧ និងអាណត្តិបន្តបន្ទាប់ទៀត ក៏ដូចជាគាំទ្រ ឯកឧត្តមបណ្ឌិត ហ៊ុន ម៉ាណែត ជាបេក្ខភាពនាយករដ្ឋមន្ត្រី នាពេលអនាគតផងដែរ៕អត្ថបទ ៖ ប្រាក់ វ៉ាន់ដា