ភ្នំពេញ៖ ក្រសួងការបរទេសកម្ពុជា បានប្រកាសថា ក្រុមមេដឹកនាំអាស៊ានបានឯកភាពគ្នាជាឯកច្ឆ័នលើ ៥ចំណុច ដើម្បីបន្ធូបន្ថយភាពតានតឹង និងបង្កលក្ខណៈសម្រាប់កិច្ចសន្ទនាវិបត្តិនយោបាយនៅក្នុងប្រទេសមីយ៉ាន់ម៉ា។
ក្រសួងការបរទេសកម្ពុជា បានប្រកាសឱ្យដឹងបែបនេះនៅក្នុងសេចក្ដីប្រកាសព័ត៌មានមួយចេញនៅថ្ងៃម្សិលមិញនេះ ក្រោយពីក្រុមមេដឹកនាំអាស៊ានបានបញ្ចប់កិច្ចប្រជុំកំពូលពិសេសនៅឯទីក្រុងហ្សាកាតា ប្រទេសឥណ្ឌូនេស៊ី។
ក្រសួងការបរទេសកម្ពុជា បញ្ជាក់ថា ក្រុមមេដឹកនាំអាស៊ានបានបង្ហាញក្ដីបារម្ភជារួមទៅលើការវិវត្តថ្មីៗនៅក្នុងប្រទេសមីយ៉ាន់ម៉ា ហើយក៏បានឯកភាពគ្នាជាឯកច្ឆ័នទៅលើដំណោះស្រាយ ៥ចំណុច ដើម្បីបន្ធូបន្ថយភាពតានតឹង បង្កលក្ខណៈសម្រាប់កិច្ចសន្ទនា និងបោះជំហានទៅមុខជាបន្តបន្ទាប់សម្រាប់ដំណោះស្រាយដោយសន្តិវិធី។
បើតាមសេចក្ដីប្រកាសព័ត៌មាន ក្រុមមេដឹកនាំអាស៊ានបានឯកភាពគ្នាឱ្យបញ្ឈប់រាល់អំពើហិង្សា និងបង្កើតនូវកិច្ចសន្ទនាប្រកបដោយស្ថាបនារវាងភាគីពាក់ព័ន្ធដើម្បីផលប្រយោជន៍ប្រជាជន។
ក្រុមមេដឹកនាំអាស៊ាន ក៏បានយល់ព្រមទៅលើការចាត់តាំងប្រេសិតពិសេសរបស់អាស៊ានដើម្បីសម្របសម្រួលដំណើរការកិច្ចសន្ទនា និងការអនុញ្ញាតឱ្យប្រេសិតពិសេសរបស់អាស៊ានធ្វើដំណើរទៅទស្សនកិច្ចនៅមីយ៉ាន់ម៉ា។
ចំណុចចុងក្រោយនោះ គឺក្រុមមេដឹកនាំថ្នាក់តំបន់ បានឯកភាពគ្នាទៅលើការផ្ដល់ជំនួយមនុស្សធម៌តាមរយៈយន្តការអាស៊ាន ឬមជ្ឈមណ្ឌលអាស៊ានដើម្បីសម្របសម្រួលមនុស្សធម៌ និងគ្រប់គ្រងគ្រោះមហន្តរាយ។
មីយ៉ាន់ម៉ា បានធ្លាក់ចូលក្នុងវិបត្តិបង្ហូរឈាមអស់រយៈពេលជិត ៣ខែមកហើយ ក្រោយពីក្រុមយោធាប្រទេសនេះ បានដណ្ដើមអំណាចពីរដ្ឋាភិបាលស៊ីវិលរបស់អ្នកស្រី អង់សាន ស៊ូជី តាមរយៈរដ្ឋប្រហារកាលពីថ្ងៃទី០១ ខែកុម្ភៈ៕អត្ថបទ ៖ សុធី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
