ភ្នំពេញ ៖ ក្រុមអ្នកអធិប្បាយនយោបាយតាមបណ្ដាញសង្គមហ្វេសបុក លោក យឿន យឿត និងលោក លី ហុង បានថ្លែងថា គុណតម្លៃរបស់គណបក្សប្រជាជនកម្ពុជាបានធ្វើឲ្យប្រជាជននៅកម្ពុជាទាំងមូលធ្វើការបោះឆ្នោតគាំទ្រជារៀងរហូតមកនោះ គឺដោយសារគណបក្សមួយនេះមិនដែលរត់ចោលប្រជាជន និងប្រទេសជាតិពេលជូបបញ្ហា និងមួយវិញទៀត ថ្នាក់ដឹកនាំរបស់គណបក្សប្រជាជនបានខិតខំស្វះស្វែងរកសន្តិភាព និងការអភិវឌ្ឍជូនប្រជាជន និងប្រទេសកម្ពុជាឲ្យមានសុខក្សេមក្សាន្តរហូតដល់បច្ចុប្បន្ននេះ។
ថ្លែងតាមរយៈផេកសេនាសន្តិភាព នាល្ងាចថ្ងៃទី១ ខែកុម្ភៈ ឆ្នាំ២០២៣នេះ ក្រុមអ្នកអធិប្បាយនេះ បានលើកឡើងថា គណបក្សប្រជាជនកម្ពុជា ការពារ និងលើកស្ទួយផលប្រយោជន៍របស់ប្រជាជនគ្រប់រូប ថែរក្សាការពារសន្តិភាព សន្តិសុខ សណ្ដាប់ធ្នាប់ និងសុវត្ថិភាពសង្គម ដើម្បីធានាភាពសុខសាន្តរបស់ប្រជាជន និងការអភិវឌ្ឍប្រទេសជាតិឲ្យកាន់តែរីកចំរើនជាបន្តបន្ទាប់ទៅទៀត។
លោក យឿន យឿត បានថ្លែងថា ក្រោមការដឹកនាំរបស់គណបក្សប្រជាជនកម្ពុជា ជាពិសេសគឺសម្ដេចតេជោ ហ៊ុន សែន នាយករដ្ឋមន្ត្រី និងជាប្រធានគណបក្សប្រជាជននោះ បានធ្វើឲ្យប្រទេសមានសុខសន្តិភាព មានការអភិវឌ្ឍ គ្មានអំពើភេរវកម្ម រហូតដល់ស្មើមុខស្មើមាត់លើឆាកអន្តរជាតិថែមទៀត។
ជាក់ស្តែងកាលពីឆ្នាំ២០២២កន្លងទៅនេះកម្ពុជាយើងបានធ្វើជាម្ចាស់ផ្ទះដឹកនាំកិច្ចប្រជុំធំៗជាច្រើនដូចជាកិច្ចប្រជុំកំពូលសេដ្ឋកិច្ចអាស៊ីអឺរ៉ុប កិច្ចប្រជុំអាស៊ាន និងអាស៊ានបូក ហើយសម្រាប់ឆ្នាំ២០២៣នេះ នឹងធ្វើជាម្ចាស់ផ្ទះកីឡាស៊ីហ្គេមផងដែរ។
អ្នកអធិប្បាយនយោបាយរូបនេះ បានលើកឡើងទៀតថា« កត្តាដែលធ្វើឲ្យគណបក្សប្រជាជកម្ពុជាឈានមុខគេនៅព្រះរាជាណាចក្រកម្ពុជា និងមានទំនុកចិត្តដល់ប្រជាជននោះ គឺដោយសារតែថ្នាក់ដឹកនាំគណបក្សប្រជាជនកម្ពុជាពុំដែលរត់ចេញពីប្រទេស និងប្រជាជន គេចវេសពីបញ្ហានោះទេ ហើយជាងនេះ ទៅទៀតគណបក្សដ៏ធំជាងគេនៅកម្ពុជានេះ ក៏បានបន្តខិតខំយ៉ាងសកម្មបន្ថែមទៀតក្នុងការអភិវឌ្ឍប្រទេស លើកស្ទួយជីវភាពរស់នៅរបស់ប្រជាពលរដ្ឋគ្រប់រូប ដើម្បីឲ្យប្រជាពលរដ្ឋរស់នៅប្រកបដោយសុខដុមនីយកម្ម និងសេរីផងដែរ។
ជាមួយគ្នានោះដែរ លោកយឿន យឿត ក៏បានថ្លែងអំណរគុណចំពោះគណបក្សប្រជាជនកម្ពុជា ជាពិសេសសម្តេចតេជោ ហ៊ុន សែន ជាមគ្គុទ្ទេសក៍ឯក និងបិតាស្ថាបនិកសន្តិភាព ដែលបានលះបង់សាច់ស្រស់ឈាមស្រស់ រំដោះប្រទេសជាតិឲ្យ រួចផុតពីវាលពិឃាត និងបានដឹកនាំប្រទេសឲ្យមានសុខសន្តិភាព និងការអភិវឌ្ឍជាបន្តបន្ទាប់រហូតដល់ សព្វថ្ងៃនេះដែរ៕ អត្ថបទ ៖ បាន ចក់
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
