កំពង់ឆ្នាំង៖ នៅថ្ងៃទី០៣ ខែកុម្ភៈ ឆ្នាំ២០២៣នេះ អាជ្ញាធរក្រុងកំពង់ឆ្នាំង បានអញ្ជើញ​អាជីវករ​ផ្សារ​លើ ក្រុងកំពង់ឆ្នាំងសរុបជិត១០០នាក់ មកស្តាប់ផែនការរៀបចំផ្សារលើ និងជុំវិញផ្សារលើ និង​ផ្លូវ​មួយចំនួនក្នុងក្រុងកំពង់ឆ្នាំងផងដែរ ដើម្បីអោយចំណីផ្លូវមានរបៀបរៀបរយល្អ ជា​ពិសេស​បរិស្ថាន អនាម័យ និងសោភ័ណភាពរបស់ក្រុងកំពង់ឆ្នាំងតែម្តង។

  នៅក្នុងពិធីនេះ លោក ហ៊ីង ភ័ព្វមីនា អភិបាលក្រុងកំពង់ឆ្នាំង បានជូន​ដំណឹង​ដល់​បង​ប្អូន​អាជីវករ​ទាំងអស់​អោយយល់ពីការអភិវឌ្ឍន៍ក្រុងកំពង់ឆ្នាំងរបស់អាជ្ញាធរក្រុង និងខេត្តកំពង់ឆ្នាំង និង​សូមអោយមានការចូលរួមពីគ្រប់ភាគីទាំងអស់ ដើម្បីអោយក្រុងកំពង់ឆ្នាំងមានអនាម័យ បរិស្ថាន និងសោភ័ណភាពល្អ និងអាចជាប់ចំណាត់ថ្នាក់រំដួល៣ទងនៅថ្ងៃខាងមុខនេះ។ ការររៀបចំសណ្តាប់ធ្នាប់របៀបរៀបរយ សោភ័ណភាព អនាម័យ និងបរិស្ថាន ក្នុងក្រុង​កំពង់ឆ្នាំង​នេះ ត្រូវបានអាជ្ញាធរក្រុងកំពង់ឆ្នាំងជម្រាបជូនបងប្អូនប្រជាពលរដ្ឋ ដែល​មាន​លំនៅ​ដ្ឋាន​តាម​ដង​ផ្លូវ​ក្រាល​កៅស៊ូនៅក្នុងក្រុងកំពង់ឆ្នាំងជ្រាបថា រដ្ឋបាលក្រុង​ត្រូវ​រៀបចំ​សោភ័ណ​ភាព​ទូទាំង​ក្រុង​កំពង់ឆ្នាំង​ឲ្យ​មានសណ្ដាប់ធ្នាប់ និងបរិស្ថានល្អ ជាទីក្រុងប្រកបដោយសោភ័ណភាព និង​មាន​អនាម័យ ដើម្បីចូលរួមប្រឡងប្រណាំងទីក្រុងស្អាតនាពេលខាងមុខនេះ ។

ដើម្បី​ឲ្យសក្តិសមជាទីក្រុងស្អាតនោះ រដ្ឋបាលក្រុងកំពង់ឆ្នាំងត្រូវធ្វើការរៀបចំដូចខាងក្រោម គឺ​នៅ​ខាង​មុខ​របងផ្ទះ ឬរបងមន្ទីរ អង្គភាពនានា មិនឲ្យមានការសង់សំយ៉ាប និងដាក់តាំង​លក់​ទំ​និ​ញ​គ្រប់​បែប​យ៉ាង។ នៅតាមមុខផ្ទះ ចាប់ពីមន្ទីរសេដ្ឋកិច្ចនិងហិរញ្ញវត្ថុ រហូតដល់​អាហារដ្ឋាន​មិត្តភាព​(វិមានឯករាជ្យ) ត្រូវដកគម្លាតពីចិញ្ចើមផ្លូវ( ទុកសម្រាប់ថ្មើរជើង)ប្រវែង៣ម៉ែត្រ ហើយផុត​ពី​នោះ​ក៏​មិនត្រូវធ្វើការសង់សំយ៉ាប ឬប្រាក់បិទបាំងដែលនាំឲ្យបាត់បង់សោភណ្ឌភាពឡើយ។ សូម​ប្រជាពលរដ្ឋ​ដែលមានលំនៅដ្ឋានតាមដងផ្លូវក្រាលកៅស៊ូ ក្នុងក្រុងដែលបានសាងសង់សំយ៉ាប និងដា​ក់​ស្លាកយីហោ ឬតាំងលក់ទំនិញផ្សេងៗនៅលើការ៉ូឡា ឬដីចំណីផ្លូវទាំងនោះ ត្រូវកាត់​ និង​រុះរើ​ចេញ​ឲ្យអស់ គិតចាប់ពីថ្ងៃជូនដំណឹងនេះរហូតដល់ថ្ងៃទី០៦ ខែកុម្ភៈ ឆ្នាំ២០២៣ជាកំហិត។ រដ្ឋបាលក្រុងកំពង់ឆ្នាំង នឹងមិនទទួលខុសត្រូវលើការខូចខាតសម្ភារៈរបស់បងប្អូន នៅពេល​រដ្ឋបាល​ក្រុង​ចុះអនុវត្តនូវវិធានការណ៍រដ្ឋបាលនោះឡើយ ៕ ហុង វាស្នា