​អ៊ុយក្រែន៖ មន្ត្រី​សហភាព​អឺរ៉ុប​កំពូលៗ​ជាច្រើនរូប​បានធ្វើ​ទស្សនកិច្ច​នៅ​ទីក្រុង Kyiv កាលពី​ថ្ងៃ​ព្រហស្បតិ៍ ដើម្បី​សន្យា​ផ្តល់ជំនួយ​ផ្នែក​យោធា ហិរញ្ញវត្ថុ និង​នយោបាយ និង​បង្ហាញ​ការគាំទ្រ​ដល់​អ៊ុយ​ក្រែ​ន មុនពេល​ខួប​មួយឆ្នាំ​នៃ​ការវាយលុក​របស់​រុស្ស៊ី​។

នៅ​ថ្ងៃ​សុក្រ​នេះ លោក Charles Michel ប្រធាន​មេដឹកនាំ​បណ្តា​ប្រទេស​សហភាព​អឺរ៉ុប​ទាំង ២៧​ប្រទេស​នឹង​ជួប​ជាមួយ​ប្រធានាធិបតី​លោក Volodymyr Zelenskyy។ ការជួបប្រជុំគ្នា​បែបនេះ​ជា​លើកដំបូង​នៅក្នុង​ទីក្រុង Kyiv ចាប់តាំងពី​សង្គ្រាម​បានចាប់ផ្តើម​កាលពី​ថ្ងៃទី​២៤ ​ខែកុម្ភៈ បន្ទាប់ពី​ការសន្យា​ថ្មី​របស់​ប្រទេស​លោកខាងលិច​ក្នុងការ​ផ្តល់​អាវុធ​ ដើម្បី​ជួយ​អ៊ុយ​ក្រែ​ន​ទប់ទល់​ការវាយលុក​ថ្មី​ដែល​ត្រូវបាន​រំពឹងទុក​ពី​រុស្ស៊ី​។ ទីក្រុង​មូ​ស្គូ​បាន​រិះគន់​ការសន្យា​នេះ ដោយ​និយាយថា ការបញ្ជូន​អាវុធ​ថ្មី​នឹង​ធ្វើឱ្យ​ជម្លោះ​កាន់តែ​រីក​ធំ ប៉ុន្តែ​មិនបាន​ធ្វើ​ឲ្យ​រុស្ស៊ី​ផ្លាស់ប្តូរ​នោះទេ​។​​ ប្រធានាធិ​បតី​អ៊ុយ​ក្រែ​ន​លោក Volodymyr Zelenskyy បាន​និយាយថា សម្ពាធ​ជាស​កល​លើ​ប្រទេស​រុស្ស៊ី​ត្រូវតែ​បង្កើន​ឲ្យ​កាន់តែខ្លាំង ​ក្នុងអំឡុងពេល​សុន្ទរកថា​របស់លោក​។

លោក Zelenskyy និយាយ​ថា កិច្ចពិភាក្សា​លើ​បញ្ហា​អ៊ុយ​ក្រែ​ន​ចូល​ជា​សមាជិក​សហភាព​អឺរ៉ុប (EU) គួរតែ​ចាប់ផ្តើម​នៅ​ឆ្នាំនេះ​។ ប្រធាន​គណៈកម្មាការ​អឺរ៉ុប​លោកស្រី Ursula von der Leyen បាន​ទៅធ្វើ​ទស្សនកិច្ច​នៅ​ទីក្រុង Kyiv កាលពី​ថ្ងៃ​ព្រហស្បតិ៍​ម្សិលមិញ​ជាមួយ​គណៈប្រតិភូ​នៃ​មន្ត្រី​ជាង ​១០​នាក់ ដែល​បាន​សន្យាថា​នឹង​ផ្តល់​ជំនួយ​ផ្នែក​យោធា ហិរញ្ញវត្ថុ និង​នយោបាយ​។ ទាក់ទង​នឹង​ការសុំ​ចូល​ជា​សមាជិកភាព សហភាព​អឺរ៉ុប​បាន​បញ្ជាក់​ពី​ការ​ដោះស្រាយ​អំពើពុករលួយ​ ជា​តម្រូវការ​សម្រាប់​អ៊ុយ​ក្រែ​ន​ក្នុងការ​ចូលរួម​ជាមួយ​ប្លុក​មាន​សមាជិក ២៧ ជា​ដំណើរ​ការដែល​ត្រូវ​ចំណាយ​ពេល​ច្រើន​ឆ្នាំ​៕​

អត្ថបទ៖ ប៊ុនថន