ភ្នំពេញ៖ នៅសល់រយៈពេល៩១ថ្ងៃទៀតប៉ុណ្ណោះ ព្រឹត្តិការណ៍ស៊ីហ្គេម២០២៣ នឹងចូលមកដល់ ខណៈការប្រកួតអាស៊ានប៉ារ៉ាហ្គេម​ ក៏នឹងចាប់ផ្តើមនៅក្នុងខែមិថុនា ឆ្នាំ២០២៣ដែរ។ ក្រុមអត្តពលិកមានពិការភាព បាននឹងកំពុងហ្វឹកហាត់ពង្រឹងសមត្ថភាពបន្ថែម ត្រៀមការប្រកួតអាស៊ានប៉ារ៉ាហ្គេមចូលមកដល់។

បច្ចុប្បន្នក្រុមអត្តពលិកជនពិការ ប្រមាណ២៥០ រូបកំពុងបន្តសកម្មភាពហ្វឹកហាត់យ៉ាងសកម្មនៅ​តាម​ទី​តាំង​ផ្សេងគ្នាដែលបានរៀបចំ។ អត្តពលិកទាំង ២៥០រូបនេះ ជាអត្តពលិកដែលត្រូវបាន​ជ្រើស​រើសដោយម៉ត់ចត់ សម្រាប់ការចូលរួមប្រកួតអាស៊ានប៉ារ៉ាហ្គេមក្នុងរយៈពេលជាង ១០០ ថ្ងៃខាងមុខនេះ។ នេះជាការលើកឡើង របស់ឯកឧត្តម យី វាសនា អគ្គលេខាធិការគណៈកម្មាធិការជាតិប៉ារ៉ាឡាំពិកកម្ពុជា។

ឯកឧត្តមបន្តថា ក្រោយការចម្រាញ់ជ្រើសរើសបេក្ខភាពទាំងនេះ គឺជាការតម្រូវឱ្យហ្វឹកហាត់​យ៉ាងតិច​៥ម៉ោងក្នុងមួយថ្ងៃ។ ក្នុងនាមឯកឧត្តម ជាថ្នាក់ដឹកនាំមួយរូប ឯកឧត្តមពិតជា​សប្បាយចិត្ត​ដែលឃើញថាអត្តពលលិកទាំងអស់ពិតជាមានការប្ដេជ្ញា ​គោរពពេលវេលាហ្វឹកហាត់ត្រឹមត្រូវ រឺពេល​ខ្លះហ្វឹកហាត់លើសម៉ោងកំណត់ទៀតផង។

ឯកឧត្តម សង្ឃឹមជឿជាក់ថា ​ការធ្វើជាម្ចាស់ផ្ទះរៀបចំព្រឹត្តិការណ៍កីឡានេះ កម្ពុជានឹង​ទទួល​បាន​មេដាយ​កាន់​តែច្រើនជាងការចូលរួមប្រកួតកន្លងមក ដែលកម្ពុជាធ្លាប់ចូលរួមប្រកួត​នៅ​ប្រទេស​ដទៃ។

ចំពោះការហ្វឹកហាត់ បច្ចុប្បន្នគឺមានក្រុមអត្តពលិកមានពិការភាព​ចំនួន៦ប្រភេទកីឡា កំពុង​ហ្វឹកហាត់​នៅមជ្ឈមណ្ឌលជាតិនៃជនពិការ។ ​រីឯក្រុមអត្តពលិកចំនួន ៧ប្រភេទកីឡាផ្សេងទៀត កំពុងហ្វឹកហាត់នៅទីតាំងផ្សេងគ្នា។​ អត្តពលិកកំពុងហ្វឹកហាត់នៅមជ្ឈមណ្ឌលជាតិនៃជនពិការ បង្ហាញការប្ដេជ្ញាចិត្តខ្ពស់ក្នុងការនាំយកកិត្តិយសជូនជាតិសម្រាប់ការធ្វើជាម្ចាស់ផ្ទះការប្រកួត។ ពួកគេមិនខ្លាចនឿយហត់ ចំពោះការហ្វឹកហាត់នោះទេ។

ព្រឹត្តិការណ៍ អាស៊ានប៉ារ៉ាហ្គេម​ លើកទី១២ ប្រព្រឹត្តិទៅពីថ្ងៃទី០៣-០៩ ខែមិថុនា​ ឆ្នាំ២០២៣ ខាងមុខ នឹង​រៀបចំឡើងក្រោយ​ ព្រឹត្តិការណ៍ស៊ីហ្គេមបានបិទបញ្ចប់។

ចំពោះប្រភេទកីឡា ក្នុងការប្រកួតកីឡាអាស៊ានប៉ារ៉ាហ្គេម មានចំនួន ១៣ប្រភេទ ក្នុងនោះរួមមាន បាល់បោះជនពិការភ្នែក ​អត្តពលកម្មជនពិការ វាយសីជនពិការ ​បាល់ទាត់ចលករខួរក្បាល ប៊ូស្យា កីឡាអុកជនពិការ យូដូជនពិការ ​លើកទម្ងន់ជនពិការ ​បាល់ទះអង្គុយ​ ហែលទឹកជនពិការ វាយកូន​សី​លើតុជនពិការ​ បាល់ទះរទេះ និងបាល់ទាត់ជនពិការភ្នែក៕ អត្ថបទ៖គឹមហុក