ភ្នំពេញ៖ ក្រសួងអប់រំ ​យុវជន និងកីឡា បានប្រកាសជ្រើសរើសយុវជនស្ម័គ្រចិត្ត ឱ្យចូលរួមចំណែក​ជួយក្នុងការរៀបចំព្រឹត្តិការណ៍ ស៊ីហ្គេម និងអាស៊ានប៉ារ៉ាហ្គេម ​ដែលកម្ពុជាធ្វើជាម្ចាស់ផ្ទះ។ ការជ្រើសរើសគឺមានតម្រូវការរហូតដល់ ​៧០០០នាក់ ​សម្រាប់ព្រឹត្តិការណ៍កីឡាធំទាំងពីរនេះ។

កម្ពុជាក្នុងឆ្នាំ២០២៣នេះ ត្រូវធ្វើជាម្ចាស់ផ្ទះព្រឹត្តិការណ៍កីឡាអាស៊ីអាគ្នេយ៍ធំៗចំនួនពីរ។ ព្រឹត្តិការណ៍កីឡាទី ១ ​គឺការប្រកួតស៊ីហ្គេម លើកទី៣២​ រីឯព្រឹត្តិការណ៍កីឡាទី ២ជាការប្រកួត​អាស៊ានប៉ារ៉ាហ្គេម លើកទី១២ ដែលនឹងរៀបចំឡើងបន្តបន្ទាប់គ្នា។ ការធ្វើជាម្ចាស់ផ្ទះនេះ គឺទាមទារនូវការរៀបចំជាច្រើន។ ជាក់ស្ដែងកម្ពុជា ត្រូវការអ្នកស្ម័គ្រចិត្តរហូតដល់៧០០០នាក់ សម្រាប់ព្រឹត្តិការណ៍កីឡាទាំងពីរនេះ។ នេះជាការលើកឡើងរបស់ ឯកឧត្តម វ៉ាត់ ចំរើន អគ្គលេខាធិការគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍។

ឯកឧត្តមបានបញ្ជាក់ប្រាប់BTVថា អ្នកស្ម័គ្រចិត្តខ្លះត្រូវការចេះភាសាបរទេស មានសុខភាពប្រសើរ ហើយ​​ក៏ត្រូវការជនមានពិការភាពសម្រាប់សម្រួលជួយក្នុងអាស៊ានប៉ារ៉ាហ្គេមផងដែរ។ ក្រោយការជ្រើសរើសតាមចំនួនកំណត់ គឺត្រូវបណ្ដុះបណ្ដាលអ្នកស្ម័គ្រចិត្តទាំងនោះក្នុង​រយៈពេល​ជិត ២ខែ ​ដើម្បីធានាដំណើរការរៀបចំបានល្អប្រសើរ។

ចំពោះការទទួលពាក្យអ្នកស្ម័គ្រចិត្ត គឺបានចាប់ផ្ដើមបើកពីថ្ងៃទី ០១ កុម្ភៈ ដល់ថ្ងៃទី០១ ខែមីនា ឆ្នាំ២០២៣។ ការចុះឈ្មោះអាចធ្វើឡើងតាមរយៈអនឡាញ ដោយចូលទៅ www.cambodia2023.com/en/volunteer-register ។

បច្ចុប្បន្នក្រុមអត្តពលិកកម្ពុជា ​ទាំងអ្នកចូលរួមប្រកួតក្នុងព្រឹត្តិការណ៍ស៊ីហ្គេម និងក្រុមអត្តពលិក​ចូលរួមប្រកួត​អាស៊ានប៉ារ៉ាហ្គេម កំពុងហ្វឹកហាត់ពង្រឹងសមត្ថភាពយ៉ាងសកម្ម ខណៈព្រឹត្តិការណ៍​ទាំងពីរនឹងរំកិលចូលមកដល់នាពេលខាងមុខ។ ​ជាក់ស្ដែងសម្រាប់ស៊ីហ្គេម គឺនៅសល់រយៈពេល ៩១ថ្ងៃ ខណៈអាស៊ានប៉ារ៉ាហ្គេមនៅសល់រយៈពេលជាង ១០០ថ្ងៃទៀត។

គួរបញ្ជាក់ថា នេះជាលើកទី១​ ដែលកម្ពុជាធ្វើជាម្ចាស់ផ្ទះនៃព្រឹត្តិការណ៍កីឡាធំទាំងពីរនេះ ក្រោយរង់ចាំអស់រយៈពេល៦៤ឆ្នាំហើយ៕ អត្ថបទ៖ គឹមហុក