ភ្នំពេញ៖ នៅចុងរដូវប្រាំងឆ្នាំនេះ ការផ្គត់ផ្គង់ទឹកស្អាតរបស់រដ្ឋាករទឹកស្វយ័តក្រុងភ្នំពេញ នឹងរុញបន្ថែមទៅកាន់តំបន់ជាយក្រុង ​ដែលមានបញ្ហាកង្វះទឹកស្អាត ឲ្យមានសម្ពោធទឹក​គ្រប់គ្រាន់​ឡើងវិញ ​សម្រាប់ការប្រើប្រាស់របស់ប្រជាពលរដ្ឋ។

ឯកឧត្តម ឡុង ណារ៉ូ អគ្គនាយករដ្ឋាករទឹកស្វយ័តក្រុងភ្នំពេញ លើកឡើងក្នុងពិធីចុះហត្ថលេខា​លើ​កំណត់ប្រជុំពិភាក្សា ​ស្តីពីការរៀបចំ​សិក្សា​លទ្ធភាព របស់គម្រោងពង្រីកប្រព័ន្ធផ្គត់ផ្គង់ទឹកស្អាត​និរោធ រវាងរដ្ឋាករទឹកស្វយ័តក្រុងភ្នំពេញ ​និង (JICA) នៅថ្ងៃទី ២ ខែកុម្ភៈ ឆ្នាំ ២០២៣ ថា ការ​ផ្គត់ផ្គង់​ទឹកស្អាតជូនប្រជាពលរដ្ឋបច្ចុប្បន្ន គឺនៅទាបជាងតម្រូវការ ​ជាក់ស្តែងនៅក្នុងឆ្នាំ ២០២២ ការ​ផ្គត់ផ្គង់ទឹកស្អាតរបស់រដ្ឋាករទឹកស្វយ័តក្រុងភ្នំពេញ ​មានសមត្ថភាពផលិតត្រឹម ​៦៣០ ពាន់ម៉ែត្រគីប ក្នុងមួយថ្ងៃ ​ខណៈតម្រូវការទឹកស្អាតប្រើប្រាស់ជាក់ស្តែង​ ប្រមាណ ៧៥០ ពាន់ម៉ែត្រគីប ទៅ ៨០០ ពាន់ម៉ែត្រគីប ក្នុងមួយថ្ងៃ ។

ឯកឧត្តម បន្តថា រដ្ឋាករទឹកស្វយ័តក្រុងភ្នំពេញ ​បានកំពុងជំរុញអភិវឌ្ឍន៍រោងចក្របាក់ខែង ដែល​នឹងអាចដាក់ឲ្យដំណើរជំហានទី១ នៅដើមខែ ​ឧសភា ក្នុងឆ្នាំនេះ​ ក្នុងសមត្ថភាពផលិត ១៩៥ ពាន់​ម៉ែត្រគីប ក្នុងមួយថ្ងៃបន្ថែមទៀត ដើម្បីជំរុញការផ្គត់ផ្គង់​ទឹកទៅតំបន់ជាយក្រុង ក្នុង​គោល​ដៅ​រុញ​ឲ្យមានសម្ពោធទឹកគ្រប់គ្រាន់ ​សម្រាប់ការប្រើប្រាស់របស់ប្រជាពលរដ្ឋ ។

បច្ចុប្បន្នរដ្ឋាករទឹកស្វយ័តក្រុងភ្នំពេញ ​មានរោងចក្រផលិតទឹកស្អាតកំពុងដំណើរមានចំនួន​ ៤ កន្លែង ដោយ​មានសមត្ថភាពដើមផលិត ៦៦០ ​ពាន់ម៉ែត្រគីប ​ក្នុងមួយថ្ងៃ, ​និងមានអតិថិជន ៤៥ ម៉ឺន​អតិថិជន, ​មានបណ្តាញចែកចាយទឹកសរុបប្រវែងជាង ​៤ ពាន់គីឡូម៉ែត្រ ដោយបាន​គ្របបណ្តប់ផ្ទៃ​សេវាប្រមាណជាង ៨៥ ភាគរយ។ បច្ចុប្បន្នសម្រាប់ការផ្គត់ផ្គង់ទឹកស្អាតនៅរាជធានីភ្នំពេញ នៅ​មានការខ្វះខាតនៅឡើយ​ ក្នុងរង្វង់ប្រមាណជិត ២០ម៉ឺនម៉ែត្រគីប ​ក្នុងមួយថ្ងៃ ​ដែលការកង្វះខាតនេះ ក្នុងនោះបន្ទាប់ពីគម្រោងរោងចក្រជំហានទី១ ​បាក់ខែង ​ត្រូវបាន​បញ្ចប់ នឹងដាក់ឲ្យប្រើប្រាស់​ជា​ផ្លូវការ ទើបរដ្ឋាករទឹកស្វយ័តក្រុងភ្នំពេញ អាចផ្គង់ផ្គង់ទឹកបានគ្រប់គ្រាន់ នៅលើសេវាទីតាំង​ដែល​កំពុងមានសព្វថ្ងៃ៕អត្ថបទ៖ សុន រ៉ាឌី