ភ្នំពេញ៖ ក្រសួងសុខាភិបាលបានប្រកាសថា ស្ត្រីខ្មែរ ២នាក់ទៀត និងបុរសខ្មែរម្នាក់ទៀត បានស្លាប់ដោយសារជំងឺកូវីដ១៩ ដែលនាំឱ្យចំនួនអ្នកស្លាប់សរុបកើនដល់ ៧៤នាក់។
ក្នុងសេចក្ដីប្រកាសព័ត៌មាននៅថ្ងៃនេះ ក្រសួងសុខាភិបាលនិយាយថា ស្ត្រីខ្មែរអាយុ ៧៩ឆ្នាំ ដែលរស់នៅក្នុងសង្កាត់ភ្នំពេញថ្មី ខណ្ឌសែនសុខ បានស្លាប់នៅមុនពេលបញ្ជូនទៅដល់មន្ទីរពេទ្យមិត្តភាពខ្មែរ-សូវៀតកាលពីថ្ងៃម្សិលមិញនេះ ហើយលទ្ធផលវិភាគសំណាករបស់ស្ត្រីរូបនេះ បង្ហាញថា គាត់បានឆ្លងមេរោគកូវីដ១៩។
នៅឯខេត្តកំពង់ឆ្នាំឯណោះវិញ ក្រសួងសុខាភិបាលនិយាយថា បុរសម្នាក់អាយុ ៥៧ឆ្នាំ ដែលនៅរស់នៅក្នុងស្រុករលាប្អៀរ ក៏បានស្លាប់នៅមុនពេលបញ្ចូនទៅដល់មន្ទីរពេទ្យផងដែរ ហើយលទ្ធផលវិភាគសំណាក ក៏បង្ហាញថា គាត់បានឆ្លងមេរោគកូវីដ១៩ដែរ។
ក្រសួងសុខាភិបាលបានឱ្យដឹងទៀតថា ស្ត្រីម្នាក់ទៀតអាយុ ៦៥ឆ្នាំដែលរស់នៅស្រុកសំរោងទង ខេត្តកំពង់ស្ពឺ បានស្លាប់កាលពីថ្ងៃម្សិលមិញនេះ ហើយលទ្ធផលវិភាគសំណាករកឃើញថា គាត់បានឆ្លងមេរោគកូវីដ១៩។
គិតត្រឹមថ្ងៃនេះ កម្ពុជាមានមនុស្សសរុបដល់ទៅ ៧៤នាក់ហើយ បានស្លាប់ដោយសារជំងឺកូវីដ១៩នៅទូទាំងប្រទេសនៅក្នុងរយៈពេល ៤៥ថ្ងៃចុងក្រោយនេះ៕អត្ថបទ ៖ សុធី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
