ភ្នំពេញ៖ ឧត្តមសេនីយ៍ឯក លី កុសល អគ្គនាយករង អគ្គនាយកដ្ឋានភស្តុភារ-ហិរញ្ញវត្ថុ នៃ​ក្រសួងការពារជាតិ ​បាន​ថ្លែង​ថា​ បច្ចុប្បន្នកងកម្លាំងនៅសមរភូមិជួរមុខ ទទួល​បាន​ការយក​ចិត្ត​ទុក​ដាក់​យ៉ាង​ខ្លាំង ពី​ប្រមុខ​រាជរដ្ឋាភិបាល ​ដោយ​ក្រៅ​ពី​ប្រាក់បៀវត្សរ៍ ពួក​គេ​ទទួល​បាន​ប្រាក់​របប​អាហារ​បន្ថែម ​រួម​ទាំង​អត្ថ​ប្រយោជន៍​ជា​ច្រើន​ទៀត ។

ក្នុង​ពិធី​ផ្សព្វផ្សាយ​សេចក្តី​ប្រកាស​បែងចែក​ថវិកា​ជំនាញ ​ឆ្នាំ២០២៣​ និង​ណែនាំរបៀប រៀបចំ​ផែនការ​យុទ្ធសាស្ត្រ​ថវិកា​ឆ្នាំ ២០២៤-២០២៦ គោលការណ៍​អនុវត្ត​ថវិកា​កម្មវិធី​២០២៣ និង​ឆ្នាំ​បន្ត នាថ្ងៃទី៣ ខែកុម្ភៈ ឆ្នាំ២០២៣ ឧត្តមសេនីយ៍ឯក លី កុសល លើក​ឡើង​ថា កងទ័ព​ត្រូវ​ឈរ​លើ​ស្មារតី​ទទួល​ខុស​ត្រូវ​ខ្ពស់ ​ប្តេជ្ញាអនុវត្តតាមគោលនយោបាយដឹកនាំ របស់ប្រមុខរាជរដ្ឋាភិបាល និង​ការ​ណែនាំ​បញ្ជា​ផ្ទាល់ ​ពី​ថ្នាក់​ដឹកនាំ​ក្រសួង​ការពារជាតិ ។

លោកឧត្តមសេនីយ៍ឯក បានបន្តថា រាជរដ្ឋាភិបាល កំពុងធ្វើឲ្យជីវភាព​រស់នៅ​របស់កង​យោធពល​ខេមរភូមិន្ទ​ បានទទួលជាប្រចាំនូវប្រាក់បំប៉នជំនាញហ្វឹកហ្វឺន បន្តផ្ដល់ប្រាក់ហូបបន្ថែម សម្រាប់​សមរភូមិមុខ និងថវិកាថែទាំ គ្រឿងបំពាក់បច្ចេកទេសជាដើម ពិសេសការ​បើកផ្ដល់​ប្រាក់បៀវត្សរ៍​ឆាប់រហ័ស ​ទាន់ពេលវេលាមុនដំណាច់ខែនីមួយៗ និងពេលមានពិធីបុណ្យទានធំៗប្រចាំឆ្នាំ ដូចជា​បុណ្យចូលឆ្នាំថ្មីប្រពៃណីជាតិ បុណ្យភ្ជុំបិណ្ឌ តែងតែបើក​ផ្ដល់​ប្រាក់បៀវត្សរ៍ បានមុនតាមការ​កំណត់​របស់ថ្នាក់លើជានិច្ច ជូនដល់ដៃយោធិនទូទាំងកងយោធពលខេមរភូមិន្ទ ។

ជាមួយនេះ ឧត្តមសេនីយ៍ឯក លី កុសល បានក្រើនរំឮកដល់បណ្ដាកងឯកភាព ត្រូវរួសរាន់​ធ្វើនូវរបាយការណ៍ស្ដីពី វឌ្ឍនភាពសូចនាករ មកនាយកដ្ឋានហិរញ្ញវត្ថុ ការិយាល័យផែនការ ដើម្បីបូកសរុបបានទាន់ពេល ហើយក្នុងនាម​ស្ថាប័នហិរញ្ញវត្ថុ ចំណុះកងយោធពលខេមរភូមិន្ទ ជាសេនាធិការឲ្យមេបញ្ជាការ តាមបណ្ដាកងឯកភាព ត្រូវត្រង់ត្រាប់ស្ដាប់ឲ្យបានច្បាស់លាស់ នូវជំនាញហិរញ្ញវត្ថុ ដែលបានផ្សព្វផ្សាយចែកចាយជូននូវឯកសារពាក់ព័ន្ធ ត្រូវឈ្វេងយល់នូវនីតិវិធី ចៀសវាងមានការឆកល្វែង នាំដល់ការពិបាកដោះស្រាយ ថ្លោះធ្លោយ ដោយប្រការណាមួយ ។

គួរបញ្ជាក់ថា ក្រៅពីការតម្លើងនូវប្រាក់បៀវត្សរ៍ជាបន្តបន្ទាប់ សម្ដេចតេជោ ហ៊ុន សែន នាយករដ្ឋមន្ត្រី នៃ​ព្រះរាជាណាចក្រកម្ពុជា បានជំរុញទៅក្រសួង ស្ថាប័នពាក់ព័ន្ធ សាងសង់ផ្ទះជូនអតីតយុទ្ធជន ដែលមានជីវភាពខ្វះខាត រួមទាំងផ្ដល់ផ្ទះ និងដីជូនដល់កងកម្លាំងជួរមុខ ដែលឈរជើងនៅតាមបន្ទាត់ព្រំដែនផងដែរ ៕ អត្ថបទ ៖ សុខ រិទ្ធិ