កំពង់ចាម ៖ ការផ្គត់ផ្គង់ទឹកស្អាតនៅខេត្តកំពង់ចាម មានការកើនឡើងជាង២០០ភូមិ ក្នុងរយៈពេល៥ឆ្នាំ ចាប់ពី ឆ្នាំ២០១៨-២០២២ ដែលធ្វើឱ្យកើនដល់ចំនួន៨៨៣ភូមិ ក្នុងចំណោម៩២៣ភូមិ ស្មើនឹងជាង៩៥ភាគរយ ។

ក្នុងសន្និសីទសារព័ត៌មាន ស្តីពីភាពជោគជ័យក្នុងរយៈពេល៥ឆ្នាំ (២០១៨-២០២២) របស់រដ្ឋបាលខេត្តកំពង់ចាម» នៅថ្ងៃទី៣ ខែកុម្ភៈនេះ ឯកឧត្តម អ៊ុន ចាន់ដា អភិបាលខេត្តកំពង់ចាម បានឱ្យដឹងថា ខេត្តកំពង់ចាម​ មានទឹកស្អាតផ្នែកសាធារណៈ ​ចំនួនមួយមូលដ្ឋាន និងទឹកស្អាត​ផ្នែកឯកជន ចំនួន៦០ មូលដ្ឋាន ដែលមានសមត្ថភាពផលិត និងផ្គត់ផ្គង់គ្របដណ្តប់​បានចំនួន ១០៧ឃុំ-សង្កាត់ ក្នុងចំណោម ១០៩ឃុំ/សង្កាត់ ស្មើនឹង៩៨.១៦ភាគរយ ។

ឯកឧត្តម បានបញ្ជាក់ថា ក្នុងរយៈពេល៥ឆ្នាំ (២០១៨-២០២២) មានកំណើនប្រជាពលរដ្ឋប្រើ ប្រាស់ទឹកស្អាតដល់ចំនួនជាង៣ម៉ឺន៤ពាន់គ្រួសារ ។

ក្នុងរយៈពេល៥ឆ្នាំ ចាប់ពីឆ្នាំ២០១៨ ដល់ឆ្នាំ២០២២នេះ រដ្ឋបាលខេត្តកំពង់ចាម បានចូលរួម អនុវត្តកម្មវិធីកំណែទម្រង់នានារបស់រាជរដ្ឋាភិបាល ​ពិសេសកម្មវិធីកំណែទម្រង់ស្នូលទាំងបី គឺកំណែ ទម្រង់រដ្ឋបាលសាធារណៈ កំណែទម្រង់ការគ្រប់គ្រងហិរញ្ញវត្ថសាធារណៈ ​និងកំណែទម្រង់វិមជ្ឈការ និងវិសហមជ្ឈការឲ្យមានភាពប្រទាក់ក្រឡា ស៊ីចង្វាក់គ្នា។

រដ្ឋបាលខេត្ត ​បានរៀបចំ​ និងអនុវត្តនូវគោលការណ៍ និងផែនការសកម្មភាពជាប្រចាំ ដូចជា​ការ​រៀបចំ​ផែន​ការអភិវឌ្ឍ រយៈពេល៥ឆ្នាំ (២០២០ ដល់២០២៤) និងកម្មវិធីវិនិយោគបីឆ្នាំរំកិល របស់​រដ្ឋបាលខេត្ត ​ដើម្បី​បញ្ជូល​គម្រោង​ ដែលជាអាទិភាព​សម្រាប់ធ្វើការអនុវត្ត ឲ្យស្រប​តាមកម្មវិធី​ថ្នាក់ជាតិ និងគោលនយោបាយរបស់រាជរដ្ឋាភិបាល៕អត្ថបទ៖ ទូច សោភ័ណ