ភ្នំពេញ៖ ការហាត់សមសម្ដែងចុងក្រោយ របស់ក្រុមសិល្បករសិល្បការិនីកម្ពុជា សម្រាប់​ព្រឹត្តិការណ៍​ឈីងហ្កេ គឺទទួលបានការចាប់អារម្មណ៍ជាច្រើន ​ពីក្រុមសិល្បករប្រទេសដទៃ ក៏ដូចជាការ​ចាប់​អារម្មណ៍ក្រុមអ្នកប្រមាញ់រូបថតនៃព្រឹត្តិការណ៍។ ​នេះជាការលើកឡើងរបស់​ ក្រុមការងាររបស់ សហភាពសហព័ន្ធយុវជនកម្ពុជា ​ដែលមានវត្តមាននៅប្រទេសសិង្ហបុរីដោយផ្ទាល់។

សិល្បករសិល្បការិនីកម្ពុជា កាលពីថ្ងៃម្សិលម៉ិញ បានហាត់សមចុងក្រោយនូវទម្រង់សិល្បៈរបស់​ខ្លួនដែល​នឹងបង្ហាញជូនក្នុងព្រឹត្តិការណ៍ឈីងហ្កេ។ ​ការហាត់សមចុងក្រោយជាមួយ​សំលៀកបំពាក់ គឺ​ទទួលបានផ្លែផ្កា ​ដោយទទួលបានការចាប់អារម្មណ៍ជាច្រើន ពីក្រុមសិល្បករនៃប្រទេសដទៃទៀត​សុំថតរូប និងមានការប្រមាញ់រូបថតជាច្រើនពី បណ្ដាអ្នកថតរូបរបស់ព្រឹត្តិការណ៍ ក៏ដូចជាអ្នកថតរូប​នៃបណ្ដាសារព័ត៌មានអន្តរជាតិផងដែរ។ នេះជាការលើកឡើងរបស់ អ្នកនាង ដារ៉េត រ៉ូហ្សាលីន ក្រុមការងារផ្សព្វផ្សាយ និងទំនាក់ទំនងសាធារណៈ របស់សហភាពសហព័ន្ធយុវជនកម្ពុជា ដែល​កំពុងមានវត្តមាននៅប្រទេសសិង្ហបុរី ​ដែលបានចូលរួមព្រឹត្តិការណ៍ឈីងហ្គេក្នុងឆ្នាំ២០២៣នេះ។

លើសពីនេះក្រុមការងារ Artist Director របស់ព្រឹត្តិការណ៍ឈីងហ្កេ ​ក៏បានកោតសសើរដល់កម្ពុជា ដែលបាន​នាំមកនូវផ្ទាំង​ទស្សនីយភាពដែលមានទម្រង់ល្អ ច្រើនទម្រង់ មើលទៅមានភាពទាក់ទាញ​ក្នុងផែន​ដែលនឹងត្រូវសម្ដែង។ ​ជាក់ស្ដែងសម្រាប់សិល្បករសិល្បការិនីកម្ពុជា នឹងធ្វើការ​សម្ដែង​ទស្សីយភាពសិល្បៈក្នុងព្រឹត្តិការណ៍ឈីងហ្គេ ​នៅយប់ថ្ងៃទី ៣ ខែកុម្ភៈនេះ។ ​ការសម្ដែងគឺចាប់​ផ្ដើមនៅម៉ោង ៨. ៤៥នាទីយប់ នៅប្រទេសសិង្ហបុរី ​ត្រូវនឹងម៉ោង ៧.៤៥នាទីម៉ោងនៅកម្ពុជា។

ទស្សនីយភាពសិល្បៈដែលកម្ពុជានឹងសម្ដែងក្នុងព្រឹត្តិការណ៍ឈីងហ្កេ ​នៅយប់ថ្ងៃនេះ ធ្វើឡើង​ក្រោម​ប្រធានបទ ក្តីសង្ឃឹមរបស់យើង (Our Hope)។ ការសម្ដែង “ក្តីសង្ឃឹមរបស់យើង (Our Hopes)» ជាការរួមបញ្ចូលគ្នានូវរបាំបុរាណ របាំសហសម័យ ក្បាច់ផ្ការំដួល និងសៀក នឹងបង្ហាញក្តីសង្ឃឹម និងភាពសុខដុមរបស់ប្រជាជាតិខ្មែរ ​ក៏ដូចជាភាពស្រស់​ត្រកាល​ក្នុងការរស់នៅប្រទេស​ដែល​មានសុខសន្តិភាព និងការអភិវឌ្ឍន៍ប្រកបដោយចីរភាព។

ឈីងហ្គេ គឺជាក្បួនព្យុហយាត្រាសិល្បៈសម្ដែងដ៏ធំមួយនៅអាស៊ី ​ដែលត្រូវបានរៀបចំឡើង

រៀង​រាល់​ឆ្នាំដោយ ​ដោយសមាគមប្រជាជន ​នៃសាធារណរដ្ឋសិង្ហបុរី។​ ឆ្នាំ២០២៣ នេះ ព្រឹត្តិកាណ៍​ក្បួនដង្ហែឈីងហ្គេនេះ ​បានវិលត្រឡប់មកជាថ្មី ដោយមានការរំពឹងទុកអ្នកចូលរួមជាង​ ១០.០០០ រួមទាំង​អ្នកសិល្បៈជាតិ និងអន្តរជាតិ​ ដើម្បីបង្ហាញពីសិល្បៈវប្បធម៌នៃជាតិ​សាសន៍រៀងៗ​ខ្លួន នៅក្នុង Chingay Parade ​ដែលជាការបង្ហាញសិល្បៈសហគមន៍ដ៏ធំបំផុតរបស់សាធារណរដ្ឋសិង្ហបុរី៕អត្ថបទ៖ គឹមហុក