ភ្នំពេញ ៖ ឯកឧត្តមសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល បានទទួលជួប ឯកឧត្តម Dominic Williams ឯកអគ្គរាជទូតវិសាមញ្ញ និងពេញសមត្ថភាព នៃចក្រភពអង់គ្លេស (United Kingdom of Great Britain and Northern Ireland) ប្រចាំព្រះរាជាណាចក្រកម្ពុជា, នារសៀលថ្ងៃទី៣ ខែកុម្ភៈ ឆ្នាំ២០២៣នេះនៅទីស្តីការក្រសួង។

​ឯកឧត្តមរដ្ឋមន្ត្រីក្រសួងសុខាភិបាល បានសម្ដែងមនោសញ្ចេតនាស្វាគមន៍យ៉ាងកក់​ក្តៅ​ចំពោះឯកឧត្តម Dominic Williams ដែលត្រូវបានតែងតាំងជាឯកអគ្គរាជទូតវិសាមញ្ញ និង​ពេញសមត្ថភាព នៃចក្រភពអង់គ្លេស ប្រចាំ​ព្រះរាជាណាចក្រកម្ពុជា។

ឯកឧត្តម ឯកអគ្គរាជទូត បានថ្លែងអបអរសាទរ និងកោតសរសើររាជរដ្ឋាភិបាលកម្ពុជា និង​ក្រសួងសុខាភិបាល ក្នុង​កិច្ចខិតខំប្រឹងប្រែងគ្រប់គ្រង ទប់ស្កាត់ ការរីករាលដាលជំងឺកូវីដ-១៩ នៅកម្ពុជា ក្នុងរយៈពេល​ជាង២ឆ្នាំ​កន្លង​មក​នេះបានទទួល ជោគជ័យ ក្រោមការដឹកនាំដ៏ត្រឹមត្រូវ និងប៉ិនប្រសព្វប្រកបដោយគតិបណ្ឌិតរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ជាអគ្គមេបញ្ជាការ ដឹកនាំចង្អុលបង្ហាញផ្ទាល់ ដែលអាចឱ្យកម្ពុជាបើកដំណើរការប្រទេសទាំងសកម្មភាពសេដ្ឋកិច្ច និងសង្គមឡើងវិញ ចាប់តាំងពីខែវិច្ឆិកា ឆ្នាំ២០២១។ ឯកឧត្តមឯកអគ្គរាជទូត ក៏បានកោតសរសើរ​នូវកាយវិការ​មនុស្សធម៌ និងថ្លែងអំណរគុណដល់រាជរដ្ឋាភិបាលកម្ពុជា ដែលបានទទួលឱ្យនាវាទេសចរណ៍ Westerdam ចូល​ចត​កាល​ពី​ថ្ងៃទី១៤ ខែកុម្ភៈ ឆ្នាំ២០២០ ព្រមទាំងបានផ្ដល់វ៉ាក់សាំងកូវីដ-១៩ ជូនដល់មន្ត្រី និងបុគ្គលិកស្ថានទូតអង់គ្លេស ប្រចាំកម្ពុជា ព្រមទាំងសមាជិក​គ្រួសាររបស់​ពួក​គេទាំងអស់ដោយឥតគិតថ្លៃ។

ឯកឧត្តមរដ្ឋមន្ត្រីក្រសួងសុខាភិបាល ម៉ម ប៊ុនហេង ក៏បានសម្ដែងអំណរគុណ​យ៉ាង​ជ្រាលជ្រៅ​ជូន​រដ្ឋាភិបាល​នៃចក្រភពអង់គ្លេស ដែលតែងតែជួយគាំទ្រទាំងថវិកា និងបច្ចេកទេស​ដល់វិស័យ​សុខាភិបាលកម្ពុជា តាំងពី​កម្មវិធី​កំណែទម្រង់វិស័យសុខាភិបាល រហូតមក ជាពិសេសក្នុង​កាលៈទេសៈ​ដែលព្រះរាជាណាចក្រកម្ពុជា ក៏ដូចជា​ពិភព​លោក​បានកំពុងតែជួបប្រទះនឹងវិបត្តិ នៃការឆ្លងរាលដាលជំងឺកូវីដ-១៩។ រដ្ឋាភិបាល នៃចក្រភពអង់គ្លេស បានផ្តល់​ជូន​រាជរដ្ឋាភិបាល​និងប្រជាជនកម្ពុជា នូវវ៉ាក់សាំងកូវីដ-១៩ ប្រភេទ AstraZeneca ចំនួន ៤១៥.០០០ដូស និងមួយ​ចំនួនទៀតតាមរយៈយន្តការកូវ៉ាក់។ តាមរយៈអង្គការសុខភាពពិភពលោក ចក្រភពអង់គ្លេស ក៏បានជួយគាំទ្រកម្ពុជា ក្នុងកិច្ចខិតខំប្រឹងប្រែង ដើម្បីជំរុញវិធានការការពារ ទប់ស្កាត់ និង​ឆ្លើយ​តបការរាតត្បាត នៃជំងឺកូវីដ-១៩ ដូចជាការ​បណ្តុះបណ្តាលធនធានមនុស្ស និង​ហេដ្ឋារចនាសម្ព័ន្ធ​សុខាភិបាលជាដើម។

ជាចុងក្រោយឯកឧត្តមឯកអគ្គរាជទូត បានសន្យានឹងបន្តគាំទ្រ​វិស័យសុខាភិបាល​បន្ថែមទៀត​តាម​រយៈ​យន្តការទ្វេភាគី ពហុភាគី។ កិច្ចជំនួបពិភាក្សាបានបញ្ចប់ដោយលទ្ធផលគួរជាទីមោទនៈ ក្នុងស្មារតីសាមគ្គីភាព មិត្តភាព និង​កិច្ចសហប្រតិបត្តិការ៕ អត្ថបទ ៖ រដ្ឋា