ភ្នំពេញ៖ កម្ពុជានឹងធ្វើជាម្ចាស់ផ្ទះរៀបចំព្រឹត្តិការណ៍អាស៊ានប៉ារ៉ាហ្គេម នៅ​ក្នុង​រយៈពេលជាង ១០០​ថ្ងៃ​ខាងមុខនេះ។ ក្នុងការធ្វើជាម្ចាស់ផ្ទះនេះ គឺកម្ពុជានឹង​មាន​អត្ត​ពលិក​ជាជន​មាន​ពិការ​ភាព ចូលរួមប្រកួតទាំង ១៣ប្រភេទកីឡា។ នេះជាការលើកឡើងរបស់ឯកឧត្តម យី វាសនា អគ្គ​លេខាធិការ គណៈកម្មាធិការជាតិប៉ារ៉ាឡាំពិកកម្ពុជា។

តាមរយៈការតាមដានសកម្មភាពហ្វឹកហាត់របស់អត្តពលិកជាប្រចាំថ្ងៃ ឯកឧត្តម​បាន​បង្ហាញ​នូវ​ក្ដីសង្ឃឹមថា កម្ពុជានឹងទទួលបានមេដាយច្រើន សម្រាប់ការប្រកួតក្នុងឆ្នាំនេះ។ ឯកឧត្ដម​ជឿ​ជាក់​ថា ក្នុងការប្រកួតនេះ កម្ពុជានឹងអាចទទួលបានមេដាយមាសរហូតដល់៥៦គ្រឿង ជា​ចំនួន​ទ្វេដង​ នៃកា​រទទួលបានមេដាយរបស់កម្ពុជា ក្នុង​ការ​ចូលរួម​ប្រកួត​អាស៊ាន​ប៉ារ៉ា​ហ្គេម​កាល​ពី​លើក​ទី១១ នៅឥណ្ឌូនេស៊ី។ ការជឿជាក់នេះ ធ្វើឡើងក្រោមហេតុផលជាក់លាក់មួយចំនួន ដោយ​បូករួមទាំងចំនួនអត្តពលិក ការហ្វឹកហាត់ និង​កម្លាំង​ចិត្ត​នាំ​កិត្តិយស​ជូន​ជាតិ​របស់​ពួក​គេ​ជា​ដើម។

ក្នុងនាមអគ្គលេខាធិការគណៈកម្មាធិការជាតិប៉ារ៉ាឡាំពិកកម្ពុជា ឯកឧត្តម​ក៏​បាន​លើក​ឡើង​ពី​ការ​យក​ចិត្ត​ទុកដាក់ចំពោះអត្តពលិកមានពិការភាព និងផ្ដល់តម្លៃជាខ្លាំងជូនពួកគេផងដែរ ក្នុងនោះ​មាន​តាំង​ពី​ការ​ទំនុក​បម្រុង និងផ្ដល់ជាថវិកាលើកទឹកចិត្តនៅពេលទទួលបានជ័យជម្នះជាដើម។ ចំពោះ​អត្ត​ពលិក ក៏បានបង្ហាញភាពជឿជាក់ និងប្ដេជ្ញា​ដណ្ដើម​យក​មេដាយ​ជូន​ជាតិ​ឱ្យ​បាន​ផង​ដែរ​។

ព្រឹត្តិការណ៍អាស៊ានប៉ារ៉ាហ្គេម នឹងរៀបចំឡើងក្រោយព្រឹត្តិការណ៍ស៊ីហ្គេមបានបិទបញ្ចប់។ ចំពោះ​ប្រភេទកីឡា គឺមានចំនួន ១៣ប្រភេទ ក្នុងនោះរួមមាន បាល់បោះជនពិការភ្នែក អត្តពលកម្ម​ជនពិការ វាយសី​ជនពិការ បាល់ទាត់​ចលករខួរក្បាល ប៊ូស្យា កីឡាអុកជនពិការ យូដូជនពិការ លើកទម្ងន់ជនពិការ បាល់ទះអង្គុយ ហែលទឹកជនពិការ បាល់ទះរទេះ និង​បាល់​ទាត់​ជនពិការភ្នែកជាដើម៕ អត្ថបទ៖ គឹមហុក