ភ្នំពេញ៖ អគ្គនាយកដ្ឋានគយ និងរដ្ឋាករកម្ពុជា នៅក្នុងឆ្នាំ ២០២២ ប្រមូលចំណូលសរុបបានជិត ១១ ពាន់ប៊ីលានរៀល ត្រូវប្រមាណជាង ២ ៦៩០ លានដុល្លារអាមេរិក កើនឡើងជាង ១៨ ភាគរយ ធៀបនឹងចំណូលប្រមូលក្នុងឆ្នាំ ២០២១។
ឯកឧត្ដមបណ្ឌិត គុណ ញឹម រដ្ឋមន្ត្រីប្រតិភូអមនាយករដ្ឋមន្ត្រី អគ្គនាយកនៃអគ្គនាយកដ្ឋានគយ និងរដ្ឋាករកម្ពុជា លើកឡើងនៅក្នុងកិច្ចប្រជុំបូកសរុបលទ្ធផលការងារគយ និងរដ្ឋាករ ប្រចាំឆ្នាំ២០២២ នៅសណ្ឋាគារសង្គហមិត្ត ខេត្តកែប នៅថ្ងៃទី៣ ខែកុម្ភៈ ឆ្នាំ២០២៣ថា លទ្ធផលការងារសំខាន់ៗមួយចំនួន ដែលសម្រេចបានក្នុងឆ្នាំ២០២២ ចំពោះចំណូលដែលប្រមូលបានមានជិត១១ពាន់ប៊ីលានរៀលស្មើនឹងប្រមាណជាង ២៦៩០ លានដុល្លារអាមេរិក គឺសម្រេចបានជិត១០៥ភាគរយនៃផែនការដែលបានកំណត់ដោយច្បាប់ ស្ដីពីហិរញ្ញវត្ថុ សម្រាប់ការគ្រប់គ្រង ឆ្នាំ២០២២ ក្នុងនោះការប្រមូលពីអាករលើតម្លៃបន្ថែមបានជាង ៤១៦៩ ប៊ីលានរៀលត្រូវនឹងជិត៣៨ ភាគរយ នៃចំណូលសរុប, អាករពិសេសជាង ៤១៥១ ប៊ីលានរៀល ត្រូវនឹង ៣៧ ភាគរយ, ពន្ធគយ ២០៨៧ ប៊ីលានរៀល ត្រូវនឹង ១៩ ភាគរយ, អាករបន្ថែមលើផលិតផលប្រេងឥន្ធនៈជាង ៣៦៧ ប៊ីលានរៀល ត្រូវនឹងជាង ៣ ភាគរយ, និងអាករនាំចេញ និងកម្រៃផ្សេងៗមានចំនួនជាង ២២៣ ប៊ីលានរៀល ត្រូវនឹង ២ ភាគរយនៃចំណូលសរុប។
ចំពោះចំណូលតាមក្រុមទំនិញវិញ, គយ និងរដ្ឋាករកម្ពុជា ប្រមូលចំណូលលើយានយន្ត និងគ្រឿងចក្របានចំនួន ៥០៧៨ ប៊ីលានរៀល ត្រូវនឹងជាង៤៦ភាគរយ នៃចំណូលសរុប, ទំនិញចម្រុះជាង ៣០៣២ ប៊ីលានរៀល ត្រូវនឹងជាង២៧ភាគរយ, ផលិតផលតេលសិលា ២២៣៨ ប៊ីលានរៀល ត្រូវនឹងជាង២០ភា គរយ, និងសម្ភារសំណង់ និងកម្រៃផ្សេងៗមានចំនួនជាង ៦៤៩ ប៊ីលានរៀល ត្រូវនឹងជិត៦ភាគរយ នៃចំណូលសរុប។
ចំណែកការធ្វើពាណិជ្ជកម្មក្រៅប្រទេស នៅក្នុងឆ្នាំ២០២២, ទំហំពាណិជ្ជកម្មនាំចូលមានចំនួនជាង ២៥ ពាន់លានដុល្លារ កើនឡើងប្រមាណជិត១២ភាគរយធៀបនឹងឆ្នាំ២០២១ ដែលក្នុងនោះទំនិញនាំចូលសំខាន់ៗរួមមាន យានយន្តនិងគ្រឿងចក្រ, ផលិតផលតេលសិលា, វត្ថុធាតុដើម និងគ្រឿងម៉ាស៊ីនបម្រើដ ល់គម្រោងវិនិយោគ, គ្រឿងសំណង់, គ្រឿងឧបភោគ-បរិភោគ និងទំនិញចម្រុះផ្សេងទៀត។ ដោយឡែ កទំហំពាណិជ្ជកម្មនាំចេញមានចំនួនជាង ២២ពាន់លានដុល្លារ កើនឡើងជាង១៦ភាគរយធៀបនឹងឆ្នាំ ២០២១ ក្នុងនោះផលិតផលកាត់ដេរកំណើនជាង១៤ភាគរយ, ផលិតផលវិនិយោគមិនមែនកាត់ដេរ មា នដូចជា គ្រឿងបំណែកអេឡិចត្រូនិក បង្គុំខ្សែភ្លើង កង់ ផលិតផលពីឈើ ផលិតផលប្លាស្ទិច គ្រឿងប ន្លាស់រថយន្ត និងផលិតផលឧស្សាហកម្មផ្សេងៗទៀត មានកំណើនជាង២៦ភាគរយ និងកសិផលមានកំណើនជាង៦ភាគរយផងដែរ៕ អត្ថបទ៖ សុន រ៉ាឌី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
