ប្រព័ន្ធផ្សព្វផ្សាយក្នុងស្រុកបានរាយការណ៍កាលពីថ្ងៃសុក្រថា ក្នុងពេលមានការប៉ះទង្គិចគ្នាជាបន្តបន្ទាប់រវាងរដ្ឋាភិបាល និងកងកម្លាំងតស៊ូ របបសឹកមីយ៉ាន់ម៉ា បានប្រកាសច្បាប់អាជ្ញាសឹកនៅក្នុងក្រុងចំនួន ៣៧បន្ថែមទៀត នៅទូទាំងប្រទេស។ ប្រព័ន្ធផ្សព្វផ្សាយក្នុងស្រុក សំឡេងប្រជាធិបតេយ្យភូមាបានរាយការណ៍ថា របបយោធាបានចេញបញ្ជាកាលពីថ្ងៃព្រហស្បតិ៍ឱ្យដាក់ច្បាប់អាជ្ញាសឹកនៅក្នុងតំបន់ដែលកំពុងប្រយុទ្ធគ្នារវាងកងទ័ពមីយ៉ាន់ម៉ា និងកងកម្លាំងតស៊ូ មានភាពតានតឹងកាន់តែខ្លាំងឡើង។
ការវិវឌ្ឍន៍ចុងក្រោយបង្អស់នេះ បានកើតឡើងមួយថ្ងៃបន្ទាប់ពីរបបយោធាបានបន្តដាក់ប្រទេសក្នុងគ្រាអាសន្នរយៈពេលប្រាំមួយខែបន្ថែមទៀតកាលពីថ្ងៃពុធ ដោយលើកឡើងពីស្ថានភាពច្បាប់ និងសណ្តាប់ធ្នាប់ក្នុងប្រទេស។ កាលពីថ្ងៃទី១ ខែកុម្ភៈ ឆ្នាំ២០២១ យោធាបានដាក់ច្បាប់អាជ្ញាសឹកនៅក្នុងទីក្រុង Mandalay និង Yangon បន្ទាប់ពីការផ្ដួលរំលំរដ្ឋាភិបាលរបស់លោកស្រី អ៊ុងសានស៊ូជី(Aung San Suu Kyi) ក្នុងរដ្ឋប្រហារយោធា បន្ទាប់ពីគណបក្សសម្ព័ន្ធជាតិ ដើម្បីលទ្ធិប្រជាធិបតេយ្យរបស់លោកស្រីបានឈ្នះការបោះឆ្នោតជាតិក្នុងខែវិច្ឆិកា ឆ្នាំ ២០២០។ ទោះជាយ៉ាងណា ប្រជាជនបានបង្ហាញពីការប្រឆាំងយ៉ាងខ្លាំងចំពោះរដ្ឋប្រហារយោធា ហើយកងទ័ពបានបើកការបង្ក្រាបដោយហឹង្សាលើក្រុមបាតុករប្រឆាំងរដ្ឋប្រហារដែលទាមទារឱ្យដោះលែងសមាជិកសភាជាប់ឆ្នោតទាំងអស់ និងការបន្តសភាឡើងវិញ។
យោងតាមរបាយការណ៍របស់អង្គការសហប្រជាជាតិកាលពីពេលថ្មីៗនេះបានឲ្យដឹងថា មនុស្សយ៉ាងហោចណាស់ ២,៨៩០ នាក់បានបាត់បង់ជីវិតនៅក្នុងកណ្តាប់ដៃយោធា និងអ្នកដែលធ្វើការជាមួយនឹងរបបសឹកនេះ ខណៈ ៧៦៧នាក់ត្រូវបានចាប់ខ្លួនដំបូង ចាប់តាំងពីយោធាឡើងកាន់អំណាច៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
