ក្រសួងការពារជាតិរុស្ស៊ី បានចេញផ្សាយកាលពីថ្ងៃសុក្រ នូវរូបភាព​វីដេអូ នៃ​កង​ពល​រថក្រោះ​របស់​ខ្លួន​ដែល​កំពុង​ធ្វើ​សមយុទ្ធយោធា ខណៈភាពតាន​តឹង​បាន​បន្ត​កើន​ឡើង​ជុំវិញ​ការ​ផ្គត់ផ្គង់​រថពាស​ដែក​របស់​ប្រទេស​លោកខាងលិចដល់អ៊ុយក្រែន។

កងពល បានបង្ហាញពីការបាញ់ផ្លោងចេញពីរថក្រោះ T-90M ដែលត្រូវ​បាន​គេ​និយាយថា​ ជា​របស់​អង្គភាព​រថ​ក្រោះយោធាភាគខាងលិច។ ក្រុម​យោធា​ត្រូវ​បាន​គេ​និយាយថា​ កំពុង​អនុវត្ត​ការ​វាយ​លុក​គោល​ដៅ​នៅចម្ងាយរហូតដល់ ៥គីឡូម៉ែត្រ ដោយធ្វើត្រាប់មានរថពាសដែក និង​យន្តហោះ​របស់​សត្រូវ​នៅក្នុងទីតាំងហ្វឹកហាត់យោធានៅតំបន់ Leningrad ភាគខាងជើងប្រទេសរុស្ស៊ី។

អ្នកនាំពាក្យរដ្ឋាភិបាលបានបញ្ជាក់កាលពីថ្ងៃសុក្រក្នុងសន្និសីទសារព័ត៌មាននៅទីក្រុងប៊ែរឡាំង ថា សម​យុទ្ធនេះបានធ្វើឡើង ខណៈ​ប្រទេស​អាល្លឺម៉ង់​បាន​អនុម័ត​ការ​នាំ​ចេញ​រថក្រោះ​ប្រយុទ្ធ​ឡេភឺត​ជំនាន់​ទី១ (Leopard 1) ទៅកាន់ប្រទេសអ៊ុយក្រែនពីឃ្លាំងស្តុកឧស្សាហកម្ម។ លោក ស្តេហ្វេន ហេបេស្ត្រេត (Steffen Hebestrait) បាននិយាយថា លោកអាចបញ្ជាក់បានថា មានការ​អនុញ្ញាត​ការ​នាំ​ចេញ ប៉ុន្តែលោកបានបដិសេធមិនធ្វើអត្ថាធិប្បាយលើចំនួនរថក្រោះដែលនឹងត្រូវនាំចេញនោះទេ។

ប្រធានាធិបតីរុស្ស៊ី លោក Vladimir Putin កាលពីថ្ងៃព្រហស្បតិ៍បានិយាយថា រុស្ស៊ីកំពុង​ប្រឈម​មុខ​ជា​មួយ​ប្រទេសអាល្លឺម៉ង់ម្តងទៀតនៅលើសមរភូមិ ខណៈលោក​បាន​រិះគន់​ការ​សន្យា​ដំបូង​របស់​ទីក្រុង​ប៊ែរឡាំង ក្នុងការបញ្ជូនថក្រោះ ឡេភឺតជំនាន់ទី២ (Leopard 2) ដើម្បីជួយអ៊ុយក្រែននៅលើ សមរភូមិ​។ លោកបានព្រមានថា យើងមិនបញ្ជូនរថក្រោះរបស់យើងទៅកាន់ព្រំដែនរបស់ពួកគេទេ ប៉ុន្តែ​យើងមានមធ្យោបាយឆ្លើយតប ហើយវានឹងមិនបញ្ចប់ដោយការប្រើប្រាស់រថពាសដែកនោះទេ៕