ឧត្តរមានជ័យ៖ ឯកឧត្តមទេសរដ្ឋមន្ត្រី គន់ គីម សមាជិកគណៈអចិន្ដ្រៃយ៍ គណៈកម្មាធិការ​កណ្ដាល នៃគណបក្សប្រជាជនកម្ពុជា និងជាប្រធានក្រុមការងារ ចុះជួយខេត្តឧត្ដរមានជ័យ នៅ​ថ្ងៃ​ទី៤ ខែកុម្ភៈ ឆ្នាំ២០២៣នេះ បានអញ្ជើញជួបសំណេះសំណាល និង ផ្សព្វផ្សាយ​សេចក្តី​សម្រេច​ចិត្ត នៃ​មហាសន្និបាតវិសាមញ្ញតំណាងទូទាំងប្រទេសរបស់គណបក្សប្រជាជនកម្ពុជា នៅស្រុកត្រពាំងប្រាសាទ ខេត្តឧត្តរមានជ័យ។

មានមតិនៅក្នុងពិធីនេះ ឯកឧត្តមទេសរដ្ឋមន្ត្រី បានគូសបញ្ជាក់ថា ក្រោម​ការដឹកនាំ​រប​ស់​គណបក្ស​ប្រជាជន​កម្ពុជា ដែលមានសម្តេចតេជោ ហ៊ុន សែន ប្រធានគណបក្ស និងជា​នាយករដ្ឋ​មន្ត្រី ប្រទេសកម្ពុជាសម្រេចបាននូវសមទ្ធិផលធំធេងជាបន្តបន្ទាប់ និងធ្វើឲ្យសង្គមជាតិ មាន​ការ​រីក​ចម្រើន​លើ​គ្រប់វិស័យ។

ដោយឡែក សមាជិកបក្ស និងថ្នាក់ដឹកនាំគណបក្សក្រុង ស្រុក ក្នុងខេត្តឧត្ដរមានជ័យ បាន​រួម​សាមគ្គី ឯកភាពគ្នាជាធ្លុងមួយប្រកបដោយស្មារតីទទួលខុសត្រូវខ្ពស់ ក្នុង​ការ​អនុវត្ត​ភារកិច្ច​ឲ្យ​ទទួល​បាន​លទ្ធផលល្អប្រសើរ ដើម្បីជាកត្តា​កំណត់​ធ្វើ​ឲ្យ​យើង​ទទួល​បាន​ការ​រីក​ចម្រើន​ដូច​សព្វ​ថ្ងៃ​នេះ​ គឺដោយសារមានសន្តិភាព និងស្ថិរភាពនយោបាយ។

ឯកឧត្តម ទេសរដ្ឋមន្ត្រី ក៏​បាន​ជំរុញ​ឱ្យ​អាជ្ញាធរ​មូលដ្ឋាន​គ្រប់​លំដាប់​ថ្នាក់​ត្រូវ​បន្ត​ចុះ​អោយ​ដល់​ផ្ទះ​របស់​ប្រជាពលរដ្ឋ ដើម្បីជួយដោះស្រាយរាល់បញ្ហាដែលកើតមានឡើងចំពោះពួកគាត់ ហើយត្រូវ​រាយការណ៍​បន្ត​ភ្លាម​ប្រសិន​បើ​បញ្ហា​នោះ​ហួស​ពី​សមត្ថភាព​ក្នុង​ការ​ដោះ​ស្រាយ​តាម​ថ្នាក់​របស់​ខ្លួន​នី​មួយ​ៗ​។