ពោធិ៍សាត់៖ ឯកឧត្ដម រ៉ូហ្វី អូស្មាន តំណាងរាស្ត្រមណ្ឌលពោធិ៍សាត់ បានស្នើទៅដល់ប្រជាពលរដ្ឋខ្មែរ និងខ្មែរឥស្លាម ឱ្យបន្តគាំទ្រគោលនយោបាយរបស់រាជរដ្ឋាភិបាលកម្ពុជា ដែលកំពុងខិតខំបម្រើប្រជាពលរដ្ឋ និងអភិវឌ្ឍប្រទេសជាតិឲ្យរីកចម្រើនពីមួយអាណត្តិទៅមួយអាណត្តិ។
នៅក្នុងពិធីចែកអំណោយជូនប្រជាពលរដ្ឋខ្មែរ និងខ្មែរឥស្លាមដែលងាយរងគ្រោះរបស់អង្គការរ៉ាប៊ីតា (RABITA) នៃព្រះរាជាណាចក្រអារ៉ាប៊ីសាអ៊ូឌីតក្នុងខេត្តពោធិ៍សាត់ចំនួន ៣០០គ្រួសារ ឯកឧត្ដម រ៉ូហ្វី អូស្មាន បានលើកឡើងថា រាជរដ្ឋាភិបាលកម្ពុជានាពេលបច្ចុប្បន្នបាននឹងកំពុងខិតខំខ្លាំងណាស់ ក្នុងការស្ដារប្រទេសឡើងវិញពីភាពខ្ទេចខ្ទាំ និងភាពមហន្តរាយបន្សល់ពីសម័យ ប៉ុល ពត រហូតធ្វើឲ្យកម្ពុជាមានសម្ទុះសេដ្ឋកិច្ចឡើងខ្ពស់ ក្នុងរយៈពេលជាងពីរទសវត្សរ៍ចុងក្រោយនេះ។ ឯកឧត្តមបានបន្តថា នៅពេលកម្ពុជាជួបវិបត្តិជំងឺកូវីដ-១៩ ដូចបណ្ដាប្រទេសដទៃនៅលើសកលលោក សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា ដែលមានការចូលរួមពីស្ថាប័ននានា និងពលរដ្ឋផងនោះបានជម្នះនូវឧបសគ្គនេះរហូតគ្រប់គ្រងស្ថានភាពបាន និងធ្វើឲ្យកម្ពុជាទទួលជោគជ័យដ៏ត្រចះត្រចង់ក្នុងការរៀបចំកិច្ចប្រជុំកំពូលអាស៊ានលើកទី៤០ និង៤១ រួមទាំងកិច្ចប្រជុំពាក់ព័ន្ធ មានថ្នាក់ដឹកនាំប្រទេសមហាអំណាច និងថ្នាក់ដឹកនាំប្រទេសជាច្រើនបានចូលរួម និងកោតសរសើរពីការគ្រប់គ្រងជំងឺកូវីដ-១៩ របស់កម្ពុជា។
ឯកឧត្តមតំណាងរាស្ត្របានបន្ថែមថា ក្នុងរយៈពេលដ៏ខ្លី សេដ្ឋកិច្ចកម្ពុជាបានងើបឡើងវិញយ៉ាងឆាប់រហ័សជាមួយកំណើន ៣ភាគរយនៅឆ្នាំ២០២១, នៅឆ្នាំ២០២២ បានប៉ាន់ប្រមាណថាមានកំណើន ៥,២ភាគរយ ហើយនៅឆ្នាំ២០២៣ រំពឹងថាកើន ៥,៦ភាគរយ ដែលការខិតខំរបស់រាជរដ្ឋាភិបាលនេះ គឺសុទ្ធសឹងតែដើម្បីផលប្រយោជន៍របស់ពលរដ្ឋ។ ឯកឧត្ដម រ៉ូហ្វី អូស្មាន បានអំពាវនាវដល់ពលរដ្ឋខ្មែរឥស្លាមបន្តគាំទ្រ និងបោះឆ្នោតជូនគណបក្សប្រជាជនកម្ពុជា ដើម្បីឲ្យសម្ដេចតេជោបានដឹកនាំប្រទេសបន្តទៀត រួមទាំងគាំទ្របេក្ខភាពឯកឧត្តម ហ៊ុន ម៉ាណែត ជាបេក្ខភាពនាយករដ្ឋមន្ត្រីនាពេលអនាគត ហើយឯកឧត្តមក៏បានអំពាវនាវឱ្យយុវជន ក៏ដូចជាប្រជាពលរដ្ឋទាំងអស់ចូលរួមអបអរគ្រប់សកម្មភាព ដែលកម្ពុជាធ្វើជាម្ចាស់នៃព្រឹត្តិការណ៍ស៊ីហ្គេមឆ្នាំ២០២៣ នេះ៕ អត្ថបទ៖ ពៅ ភិរុណ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
