ភ្នំពេញ៖ ឯកឧត្តម ឡេង ប៉េងឡុង អ្នកនាំពាក្យរដ្ឋសភា ថ្លែងថា ការធ្វើការវិសោធនកម្មច្បាប់ប្រព័ន្ធ​ហិរញ្ញវត្ថុសាជារណៈ ដើម្បីស្របតាមការវិវឌ្ឍសេដ្ឋកិច្ចសង្គមកម្ពុជា ​និងសេដ្ឋកិច្ចសកលលោក។

ការថ្លែងរបស់ឯកឧត្តម ឡេង ប៉េងឡុង អ្នកនាំពាក្យរដ្ឋសភា ធ្វើឡើងក្នុងសន្និសីទសារព័ត៌មាន បន្ទាប់ពីសម្ដេចពញាចក្រី ហេង សំរិន ប្រធានរដ្ឋសភា បានដឹកនាំកិច្ចប្រជុំគណៈកម្មាធិការ​អចិន្ត្រៃយ៍​រដ្ឋសភា នាថ្ងៃទី៦ ខែកុម្ភៈ ឆ្នាំ២០២៣នេះ នៅវិមានរដ្ឋសភា។

ក្នុងកិច្ចប្រជុំគណៈកម្មាធិការអចិន្ត្រៃយ៍រដ្ឋសភា ​បានសម្រេចនឹងបើកសម័យប្រជុំរដ្ឋសភាវិសាមញ្ញ នីតិកាលទី៦ នៅថ្ងៃទី៨ ខែកុម្ភៈ ឆ្នាំ២០២៣ ដោយមានរបៀបវារៈពិភាក្សានិងអនុម័តសេចក្តី​ព្រាងច្បាប់​ចំនួនពីរ ​គឺសេចក្តីព្រាងច្បាប់ស្តីពីប្រព័ន្ធហិរញ្ញវត្ថុសាធារណៈ និងសេចក្តីព្រាងច្បាប់​ស្តីពីការគ្រប់គ្រង​ទឹកស្អាត។

ឯកឧត្តម ឡេង ប៉េងឡុង បញ្ជាក់ថា ការធ្វើវិសោធនកម្មច្បាប់ប្រព័ន្ធហិរញ្ញវត្ថុសាធារណៈឡើងវិញ ស្របតាម​តម្រូវតាមការវិវឌ្ឍរបស់កម្ពុជា មិនថាទាំងសេដ្ឋកិច្ចសង្គមជាតិ និងសេដ្ឋកិច្ចសកល​លោក។

បើតាមសេចក្តីព័ត៌មានរបស់រាជរដ្ឋាភិបាលនាពេលកន្លងទៅ សេចក្តីព្រាងច្បាប់ប្រព័ន្ធហិរញ្ញវត្ថុ​សាធារណៈ ស្ថិតក្នុងតម្រូវការចាំបាច់ ពោលសេចក្តីព្រាងច្បាប់ប្រព័ន្ធហិរញ្ញវត្ថុសាធារណៈ គឺជាការ​កែទម្រង់ការគ្រប់គ្រងហិរញ្ញវត្ថុសាធារណៈ ជាការដ្ឋានយុទ្ធសាស្រ្តរបស់រាជរដ្ឋាភិបាល ក្នុងការ​អភិវឌ្ឍរយៈពេលវែង តាមរយៈការកសាងប្រព័ន្ធ ហិរញ្ញវត្ថុសាធារណៈមួយ ​ដែលមានភាពឆ្លើយតប ប្រសិទ្ធភាព តម្លាភាព​ គណនេយ្យភាព និងចីរភាព ក្នុងការបែងចែក និងប្រើប្រាស់ធនធាន​សាធារណៈ ក៏ដូចជាការទ្រទ្រង់ កំណើនសេដ្ឋកិច្ច, រក្សាស្ថិរភាពម៉ាក្រូសេដ្ឋកិច្ច និងសមធម៌សង្គម។

សេចក្តីព្រាងច្បាប់​ ស្តីពីប្រព័ន្ធហិរញ្ញវត្ថុសាធារណៈនេះ ​មានគោលដៅកំណត់គោលការណ៍ ជា​មូលដ្ឋាន​សម្រាប់គ្រប់គ្រងប្រព័ន្ធហិរញ្ញវត្ថុជាពិសេសសម្រាប់ជំហាននីមួយៗ ​នៃដំណើរការរៀបចំ អនុម័ត និងអនុវត្តថវិកា ​ការត្រួតពិនិត្យលទ្ធផលថវិកា ការកំណត់មុខងារ ​ការទទួលខុសត្រូវក្នុងការ​គគ្រប់គ្រងហិរញ្ញវត្ថុសាធារណៈរបស់ក្រសួង ស្ថាប័ន ​អង្គភាពសាធារណៈប្រហាក់ប្រហែល គ្រឹះសា្ថនសាធារណៈ និងរដ្ឋបាលថ្នាក់ក្រោមជាតិ៕ អត្ថបទ៖ ឧត្តម