ភ្នំពេញ៖ លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងបង្ការជំងឺកូវីដ-១៩ ក្នុងក្របខណ្ឌទូទាំងប្រទេស នៅព្រឹកថ្ងៃទី៦ ខែកុម្ភៈនេះ បន្តដឹកនាំគណៈប្រតិភូចុះពិនិត្យទីតាំងចាក់វ៉ាក់សាំងដូសជំរុញ ដែលរៀបចំការចាក់ដោយក្រុមគ្រូពេទ្យស្ម័គ្រ ចិត្តយុវជនសម្តេចតេជោ (ធីតា) ។

លោកជំទាវវេជ្ជបណ្ឌិត ឱ វណ្ណឌីន បានរំលឹកដល់សិស្សានុសិស្ស ប្រជាពលរដ្ឋ កុំពន្យារពេលការ ចាក់វ៉ាក់សាំងដូសជំរុញ​ លើសពីរយៈពេលដែលក្រសួងសុខាភិបាលបានកំណត់ ពោលគឺរយៈពេល​ពីដូស ជំរុញមួយទៅដូសជំរុញមួយទៀត គឺពី៤-៦ខែ​ ហើយត្រូវចងចាំថ្ងៃខែឆ្នាំ ដែលបានចាក់​ដូសចុងក្រោយ ដើម្បីងាយស្រួលចាក់ដូសជំរុញបន្តបន្ទាប់ទៀត ដោយមិនត្រូវទុកពេលហួស​យូរពេក ដែលធ្វើឱ្យកងការពារក្នុងសរីរាង្គកាយបុគ្គលនឹងធ្លាក់ចុះខ្សោយ ឬចុះអស់តែម្តង។

លោកជំទាវ បានស្នើទៅដល់គណៈនាយកសាលា​ ឱ្យបន្តយកចិត្តទុកដាក់ដល់ការចាក់វ៉ាក់សាំង កូវីដ-១៩ ​ជូនដល់សិស្សានុសិស្ស និងអ្នកគ្រូ-លោកគ្រូ​ ព្រមទាំងបុគ្គលិកសាលារបស់ខ្លួន ពោល​គឺរៀបចំកាលវិភាគ ដើម្បីឲ្យក្រុមគ្រូពេទ្យមកផ្ដល់សេវាចាក់វ៉ាក់សាំង ​នៅសាលាផ្ទាល់ ទៅតាមវេន និងបន្តការអនុវត្តវិធានការ ៣កុំ ៣ការពារ ទៅតាមពេលវេលា និងទីកន្លែង ។

យោងតាមសេចក្ដីជូនដំណឹងរបស់ក្រសួងសុខាភិបាល និងក្រសួងអប់រំ យុវជន និងកីឡា ចេញ ផ្សាយនៅពេលថ្មីៗនេះ បានបង្ហាញថា យុទ្ធនាការចាក់វ៉ាក់សាំងកូវីដ-១៩ ​ដូសជំរុញទី៣ ទី៤ ទី៥ និងទី៦ ​ជូនដល់សិស្សានុសិស្សក្នុងរាជធានីភ្នំពេញ ត្រូវចាប់ផ្ដើមពីថ្ងៃទី៦​ ខែកុម្ភៈ​ ដល់ថ្ងៃទី៤ ខែមីនា ឆ្នាំ២០២៣ ​ដោយក្រុមគ្រូពេទ្យស្ម័គ្រចិត្តយុវជនសម្តេចតេជោ (TYDA) ។

ការចាក់វ៉ាក់សាំងដូសជំរុញនេះ គឺដើម្បីរក្សា​ និងបង្កើនភាពស៊ាំទប់ទល់នឹងការឆ្លងរីករាលដាល នៃ​ជំងឺកូវីដ-១៩ ក្នុងសហគមន៍កម្ពុជា​ ជាពិសេសដើម្បីបន្តរក្សានូវនិរន្តរភាព នៃដំណើរការប្រទេស​ជាប្រក្រតី និងការរស់នៅជាធម្មតាតាមប្រក្រតីភាពថ្មី រួមទាំងសកម្មភាពសេដ្ឋកិច្ច និងសង្គមជាតិ ៕អត្ថបទ៖ ទូច សោភ័ណ