ភ្នំពេញ៖ សាកលវិទ្យាល័យ ខេមតិច បានប្រារព្ធពិធីបើកបវេសនកាលឆ្នាំសិក្សា២០២២-២០២៣ ក្រោម​អធិបតីភាព​របស់​ អ្នកឧកញ៉ាបណ្ឌិត ពុង ឃាវសែ ប្រធាន​ក្រុមប្រឹក្សាភិបាល​នៃ​សាកល​វិទ្យាល័យ​បច្ចេកវិទ្យា​ និង​វិទ្យាសាស្ត្រកម្ពុជា (ខេមតិច) ឯកឧត្តមសាស្ត្រាចារ្យបណ្ឌិត ឆែម គៀតរិទ្ធី អនុប្រធានអចិន្ត្រៃយ៍ក្រុមប្រឹក្សាភិបាល នៃសាកលវិទ្យាល័យ និងអ្នកឧកញ៉ា ភាព ហៀក ប្រធាន​ក្រុមប្រឹក្សាភិបាលក្រុមហ៊ុនជីបម៉ុងគ្រុប ព្រមទាំង​គណអធិបតី​ជាច្រើនរូបផ្សេងទៀត កាលពី​សប្តាហ៍​កន្លងទៅនេះ។

នៅក្នុងពីធីបើកបវេសនកាលនេះ អ្នកឧកញ៉ាបណ្ឌិត ពុង ឃាវសែបានថ្លែងថា សាកលវិទ្យាល័យ​ខេមតិចត្រូវ​បាន​បង្កើត​ឡើង​ដើម្បីឆ្លើយតបទៅនឹងកំណើននៃការអភិវឌ្ឍសេដ្ឋកិច្ចជាតិដ៏ខ្លាំងខ្លា របស់កម្ពុជា និងចក្ខុវិស័យរបស់​រាជរដ្ឋាភិបាលក្នុង ការលើកស្ទួយវិស័យវិទ្យាសាស្រ្ត បច្ចេកវិទ្យា នវានុវត្តន៍ក៏ដូចជា តម្រូវការទីផ្សារការងារ​ទាំង​ក្នុង​ស្រុក និងក្នុងតំបន់នាពេលបច្ចុប្បន្ន និង​ទៅ​អនាគត ពោលគឺដើម្បីបំពេញកង្វះខាត បុគ្គលិកជំនាញលើវិស័យស្ទេម (STEM) ដែលជាមូលដ្ឋាន​គ្រឹះសម្រាប់ការអភិវឌ្ឍន៍ដើម្បីឈានឡើងមួយកម្រិតទៀត អោយកម្ពុជា​ក្លាយ​ជាប្រទេស​មាន​ចំណូល​មធ្យមកម្រិតខ្ពស់នៅឆ្នាំ២០៣០ និងប្រទេសអភិវឌ្ឍន៍ជឿនលឿននៅឆ្នាំ២០៥០។

អ្នកឧកញ៉ា មានប្រសាសន៍ថា អស់រយះពេលជិត២ឆ្នាំបន្ទាប់ពីទទួល​បានការអនុញ្ញាត​ពីរាជ​រដ្ឋាភិបាល ​ខេមតិច​បាន​និងកំពុង បំពេញសកម្មភាពរបស់ខ្លួន អោយស្របទៅតាមគោលបំណង និងទិសដៅជាស្ថាប័នឧត្តមសិក្សាដែល បណ្តុះបណ្តាល និស្សិតលើមុខជំនាញ ដែលគាំទ្រដល់​ការ​អភិវឌ្ឍឧស្សាហកម្ម៤.០ និងបរិវត្តកម្មឌីជីថល និងដែលផ្តោតសំខាន់លើសហគ្រិនភាព ការ​ស្រាវជ្រាវ ​នវានុវត្តន៍ និងការបង្កើតថ្មី។ អ្នកឧកញ៉ា បានបន្តថា វត្តមានរបស់ក្មួយៗ សិស្សានុសិស្ស ដែលបានធ្វើដំណើរមកពីគ្រប់ខេត្តក្រុងនៅក្នុងប្រទេសទាំងនៅទីនេះក្តី នៅក្នុងថ្នាក់រៀនក្តី គឺជា សក្ខីភាពមួយដែលបញ្ជាក់ពីជោគជ័យបឋមរបស់ ខេមតិច ក្នុងការចូលរួមកសាង​ធនធាន​មនុស្ស សម្រាប់អនាគតនៃការអភិវឌ្ឍន៍ទាំងវិស័យរដ្ឋ និងឯកជន ដែលខេមតិចមាន​កិច្ចសហប្រតិបត្តិការ​ល្អជា​មួយជាដរាបរៀងមក។

សាកលវិទ្យាល័យ ខេមតិច បានចុះអនុស្សរណៈយោគយល់ជាមួយស្ថាប័នរដ្ឋ និង​ក្រុមហ៊ុន​ឯកជនធំៗ​ ព្រមទាំង ​សាកលវិទ្យាល័យទាំងក្នុងស្រុក និងនៅបរទេស​ដើម្បីជំរុញ​អោយមាន​ការផ្លាស់ប្តូរ​និស្សិត និងចែករំលែក បទពិសោធន៍ក្នុង គោលដៅពង្រឹង និងលើកកម្ពស់​គុណភាព​អប់រំក្នុងកម្រិត​មួយដែលអាចប្រកួតប្រជែងជាមួយ ប្រទេសផ្សេងទៀតបាន ហើយសញ្ញាបត្រ​ដែល​ចេញដោយខេមតិច និងត្រូវបានទទួលស្គាល់ជាលក្ខណៈសាកល៕ អត្ថបទ ៖ រ៉ាវី