ព្រះវិហារ៖ តំបន់ប្រតិបត្តិការសឹករងខេត្តព្រះវិហារ នៅរសៀលថ្ងៃទី០៥ ខែកុម្ភៈ ម្សិលមិញ ឯកឧត្តម គីម រិទ្ធី អភិបាលខេត្តព្រះវិហារ បានចូលរួមបិទវគ្គហ្វឹកហ្វឺន បំប៉នយុទ្ធវិធី ខ.គ ថ្មើរជើង ឆ្នាំ២០២២ ។

ពិធីនេះ មានការចូលរួមពីសំណាក់ឯកឧត្តម ឧត្តមសេនីយ៍ឯក ចើង ប៊ុនថៃ នាយសេនាធិការ​រងយោធ​ភូមិភាគទី៤ តំណាងឯកឧត្តម ឧត្តមសេនីយ៍ឯក ពៅ ហេង មេបញ្ជាការរងកងទ័ពជើង​គោក និងជាមេបញ្ជាការយោធភូមិភាគទី៤ ​ស្ថាប័នតុលាការ ថ្នាក់ ដឹកនាំកងកម្លាំងទាំងបី លោក លោកស្រី ប្រធានមន្ទីរ អង្គភាពជំនាញជុំវិញខេត្ត អភិបាល ក្រុង និងយោធាចារ្យ កម្មសិក្សាការី នាយទាហាន នាយទាហានរង ជាច្រើនរូបទៀត ។

ឯកឧត្តម ឧត្តមសេនីយ៍ទោ ច័ន្ទ សុភ័ក្ត្រា មេបញ្ជាការតំបន់ប្រតិបត្តិការសឹងរងខេត្ត ព្រះវិហារ បានឱ្យដឹងថា ការបិទវគ្គហ្វឹកហ្វឺនដែលមានរយៈពេល៤៥ថ្ងៃបានជោកជ័យ ដោយសារ​មាន​គោលការណ៍​ដឹកនាំ ដ៏ឈ្លៀសវៃ ប្រកបដោយប្រសិទ្ធភាព ពីសំណាក់​ថ្នាក់ដឹកនាំគ្រប់ជាន់ថ្នាក់ដែល​ជានិច្ចជាកាល ឯកឧត្តមតែងតែផ្ដល់ នូវការំលឹក ដាស់តឿន លើការងារហ្វឹកហ្វឺនជាប្រចាំ សំដៅធ្វើ​អោយកងទ័ពមានសមត្ថភាព គុណភាព និង ប្រសិទ្ធភាព​ ក្នុងការដឹកនាំ​បញ្ជាសំរេច ​បាន​ជោគជ័យ​ទន្ទឹម​នឹងនេះក៏មានការជួយទំនុកបំរុង និងដឹកនាំ ដោយផ្ទាល់ពីឯកឧត្តមអភិបាលខេត្ត និងជាប្រធាន​គណៈបញ្ជាការឯកភាពរដ្ឋបាលខេត្ត ​និងមានការជួយផ្គត់ផ្គង់​ឧបត្ថមផងដែរ ទើបអង្គភាពចាត់តាំង​ហ្វឹកហ្វឺនទទួលបានជោកជ័យ។

នាឱកាសនោះឯកឧត្តម គីម រិទ្ធី អភិបាលខេត្ត បានលើកឡើងពីភាពសការណ៍សន្តិសុខ សណ្តាប់ធ្នាប់​សាធារណៈក្នុងភូមិសាស្ត្រខេត្តព្រះវិហារ ​តាមបណ្តោយ​ ព្រំដែនកម្ពុជា-ថៃ ​និងកម្ពុជា-ឡាវ ​មានសភាព​ស្ងប់ស្ងាត់​ល្អប្រសើរ ដែលផ្ដើមចេញពីកិច្ចសហ​ ប្រតិបត្តិការល្អរវាងកម្លាំងឈរជើង​តាមបណ្តោយព្រំដែន ​និងកងកម្លាំងអាជ្ញាធរស្រុក និង ស្រុក អាជ្ញាធរខេត្ត ​និងខេត្តជាប់ព្រំដែន ។ ជាមួយនេះសន្តិសុខ និងសណ្ដាប់សាធារណៈផ្ទៃក្នុង ក៏មានភាពល្អប្រសើរ និងបទល្មើសមានការ​ថយ​ចុះ តាមរយៈការអនុវត្តគោលនយោបាយ ភូមិ ឃុំ ​មានសុវត្ថិភាព ដែលមានការចូលរួមសហការ​គ្នាពីកងកម្លាំង ប្រដាប់អាវុធទាំងបី និងអាជ្ញាធរគ្រប់លំដាប់ថ្នាក់ ។

ឯកឧត្តម បានបន្តថា ​ភាពជោគជ័យដែលយើងទទួលបាន អាស្រ័យដោយមានការដឹកនាំប្រកប​ដោយ​គតិបណ្ឌិតរបស់សម្តេចតេជោ ហ៊ុន សែន នាយករដ្ឋមន្ត្រី បានធ្វើឱ្យប្រទេសជាតិ មាន​ការអភិវឌ្ឍ រីកចម្រើនឥតឈប់ឈរ ​និងទទួលបានសុខសន្តិភាពពេញផ្ទៃប្រទេស ។

បន្ថែមពីនេះ ​ឯកឧត្តម ក៏បានមានប្រសាសន៍ផ្តាំផ្ញើដល់សិក្ខាកាមទាំងអស់ ​ដែលបានបញ្ចប់វគ្គ​បណ្ដុះ​បណ្ដាលនាពេលនេះ ត្រូវយកចំនេះដឹង និងបទពិសោធន៍ថ្មីៗ ​ដែលបានមកពីការរៀនសូត្រ ទៅ​បម្រើការងារនៅអង្គភាពឱ្យ​មានប្រសិទ្ធភាព ត្រូវឧស្សាហ៍រំលឹក មេរៀនដែលបានរៀនសូត្រ​កន្លងមក​ ត្រូវរក្សាការសម្ងាត់យោធា​ និងយកចិត្តទុកដាក់គោរពវិន័យ កងទ័ព រក្សាសេចក្ដីថ្លៃថ្នូរ សីលធម៌​រស់នៅស្អាតស្អំ ​និងរក្សាសាមគ្គីភាព​ ហើយទោះក្នុងកាលៈទេសៈណាក៏ដោយ ក៏នៅ​តែស្មោះត្រង់ឥតងាករេ ការពារនិងគោរព ​ដាច់ខាតនូវបទបញ្ជារបស់រាជរដ្ឋាភិបាល ក្រសួង​ការពារ​ជាតិ អគ្គបញ្ជាការកងទ័ពជើងគោក និងយោធភូមិភាគទី៤​ និងជាពិសេសត្រូវគោរព​អនុវត្តឱ្យ​បានដាច់ខាតបទបញ្ជា ​១០ចំណុច របស់សម្ដេចតេជោ នាយករដ្ឋមន្ដ្រី ៕