ប៉ាគីស្ថាន៖ លោក ភឺវ៉េស មូស្សារ៉ាហ្វ (Pervez Musharraf) ដែលគ្រប់គ្រងប្រទេសប៉ាគីស្ថានរយៈពេលជិត ១ទសវត្សរ៍ក្នុងអំឡុងឆ្នាំដំបូងនៃសង្គ្រាមអាមេរិកប្រឆាំងក្រុមអាល់កៃដា និងក្រុមតាលីបង់ បានទទួលមរណភាពដោយសារជំងឺក្នុងអាយុ ៧៩ឆ្នាំនៅក្នុងមន្ទីរពេទ្យក្នុងទីក្រុងឌូបៃកាលពីថ្ងៃអាទិត្យ។
លោក Musharraf ជាអតីតឧត្ដមសេនីយ៍ដែលបានដណ្តើមអំណាច ក្នុងរដ្ឋប្រហារបង្ហូរឈាមក្នុងឆ្នាំ១៩៩៩ បានបង្ហាញខ្លួនរួមជាមួយអតីតប្រធានាធិបតីសហរដ្ឋអាមេរិកលោក George W. Bush មិនដល់មួយខែ បន្ទាប់ពីភេរវករក្រុមអាល់កៃដាដែលបានប្រើប្រាស់យន្តហោះចម្បាំង ដើម្បីវាយប្រហារទីក្រុងញូវយ៉ក និងទីក្រុងវ៉ាស៊ីនតោន ហើយបានសន្យាថា ខ្លួនឯងជាផ្នែកនៃក្រុមចម្រុះដើម្បីកម្ចាត់ក្រុមសកម្មប្រយុទ្ធឥស្លាមនិយម និងក្រុមតាលីបង់អាហ្វហ្គានីស្ថាន។ លោកត្រូវបានគេកោតសរសើរ ចំពោះការទាក់ទាញការវិនិយោគពីបរទេសមកកាន់ប្រទេសប៉ាគីស្ថាន ដែលបានមើលឃើញកំណើនសេដ្ឋកិច្ចខ្លាំងបំផុតក្នុងរយៈពេលជិត ៣០ឆ្នាំក្នុងអំឡុងការគ្រប់គ្រងរបស់លោក ហើយលោកមានការគាំទ្រពីយោធា និងប្រជាជនប៉ាគីស្ថានដែលបានគាំទ្រការបង្ក្រាបរបស់លោកប្រឆាំងក្រុមសកម្មប្រយុទ្ធ។
អំឡុងពេលកាន់តំណែងរបស់លោក ប្រទេសប៉ាគីស្ថានមានភាពរឹងមាំផ្នែកសេដ្ឋកិច្ច មានការងារធ្វើនៅក្នុងប្រទេសប៉ាគីស្ថាន ប្រជាជនក្រីក្រត្រូវបានជួលឲ្យធ្វើការ ហើយរបស់របរចាំបាច់មានតម្លៃសមរម្យដែលប្រជាជនក្រីក្រអាចទិញបាន។ ប៉ុន្តែការគ្រប់គ្រងរយៈពេល ១ទស្សវត្សរ៍របស់លោកក៏ត្រូវបានបំផ្លាញដោយវិធីសាស្ត្រប្រឆាំង ហើយបានដាក់រដ្ឋក្នុងគ្រាអាសន្នរយៈពេលជិត ៦សប្តាហ៍ដែលលោកបានផ្អាករដ្ឋធម្មនុញ្ញ។ គណបក្សនយោបាយរបស់លោកបានចាញ់ការបោះឆ្នោតក្នុងឆ្នាំ២០០៨ ហើយដោយប្រឈមមុខនឹងការចោទប្រកាន់ពីសភា លោកបានលាលែងពីតំណែង និងភៀសខ្លួនទៅកាន់ទីក្រុងឡុងដ៍៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
