ភ្នំពេញ៖ ឯកអគ្គរាជទូតជប៉ុនថ្មីប្រចាំនៅកម្ពុជា លោក អ៊ូអិណុ អាត់ស៊ូស៊ី (UENO Atsushi ) បានលើកឡើងថា រដ្ឋាភិបាលជប៉ុន មានគម្រោងបន្តជួយដល់កម្ពុជាទៀត ក្នុងការគាំទ្រដល់គម្រោងអភិវឌ្ឍន៍តាមបែបប្រជាធិបតេយ្យ និងជួយគាំទ្រដល់ដំណើរការបោះឆ្នោត ដែលកម្ពុជានឹងប្រព្រឹត្តិទៅនាថ្ងៃទី២៣ ខែកក្កដា ឆ្នាំ២០២៣ខាងមុខនេះ។
នៅក្នុងកិច្ចជំនួបជាមួយសម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ នាព្រឹកថ្ងៃទី៦ ខែកុម្ភៈ ឆ្នាំ២០២៣នេះ លោក អ៊ូអិណុ អាត់ស៊ូស៊ី បានថ្លែងថា លោកជូនពរដល់កម្ពុជា សូមបន្តទទួលជោគជ័យត្រចះត្រចង់ថែមទៀតនៅក្នុងការរៀបចំការប្រកួតនៅព្រឹត្តិការណ៍ស៊ីហ្គេម ដែលកម្ពុជានឹងត្រូវធ្វើជាម្ចាស់ផ្ទះនាពេលឆាប់ឆាប់ខាងមុខនេះ។
លោកបន្តថាជប៉ុនបានជួយគាំទ្រដល់កម្ពុជា ក្នុងនោះមានជាអាទិ៍ការជួយគាំទ្រដល់គម្រោងអភិវឌ្ឍន៍តាមបែបប្រជាធិបតេយ្យ ការជួយគាំទ្រដល់ការងារពាក់ព័ន្ធទៅនឹងការបោះឆ្នោតដែលជួយគាំទ្រតាមរយៈអង្គការចៃកា ការជួយគាំទ្រដល់ការពង្រឹងភាពជាដៃគូរវាងរដ្ឋាភិបាល និងអង្គការសង្គមស៊ីវិលដែលគម្រោងនេះនឹងជួយគាំទ្រតាមរយៈអង្គការ UNDP និងគម្រោងពង្រឹងអភិបាលកិច្ចក៏ដូចជាតម្លាភាពនៃរដ្ឋបាលថ្នាក់ក្រោមជាតិជាដើម។
ថ្លែងនៅក្នុងកិច្ចជំនួបនោះដែរ សម្តេចក្រឡាហោម ស ខេង ឧបនាយករដ្ឋមន្ត្រី បានថ្លែងអំណរ គុណដល់រដ្ឋាភិបាល និងប្រជាជនជប៉ុន ដែលបានជួយកម្ពុជាតាំងពីដើមរហូតដល់សព្វថ្ងៃនេះ ដោយសម្តេចបានបញ្ជាក់បន្ថែមថា សមិទ្ធផលជាតិ ក៏ដូចជាជោគជ័យសំខាន់ៗលើការអភិវឌ្ឍសង្គមដែលកម្ពុជាសម្រេចបានរហូតមកដល់ពេលនេះ ពិតជាមិនអាចកាត់ផ្តាច់ពីការចូលរួមចំណែកដ៏មានសារៈសំខាន់ ពីសំណាក់រដ្ឋាភិបាល និងប្រជាជនជប៉ុននោះឡើយ។ សម្ដេចបានសម្ដែងនូវការវាយតម្លៃខ្ពស់ចំពោះទំនាក់ទំនង និងកិច្ចសហប្រតិបត្តិការដ៏ល្អរវាងប្រទេសទាំងពីរអស់រយៈពេលជាច្រើនទសវត្សរ៍កន្លងមក ជាពិសេសមកដល់ពេលនេះ ប្រទេសទាំងពីរបានលើកកម្ពស់កម្រិតទំនាក់ទំនង ជាដៃគូយុទ្ធសាស្ត្រគ្រប់ជ្រុងជ្រោយ។ សម្ដេចក្រឡាហោម បានចាត់ទុកទំនាក់ទំនងនេះថាជាផែនទីមួយដ៏មានសារៈសំខាន់ក្នុងការបន្តជំរុញដល់ការពង្រឹង និងពង្រីកកាន់តែខ្លាំងក្លាថែមទៀតនូវទំនាក់ទំនង និងកិច្ចសហប្រតិបត្តិការរវាងប្រទេសទាំងពីរ។
សម្ដេចក្រឡាហោម ក៏បានថ្លែងអំណរគុណចំពោះការជួយគាំទ្ររបស់ជប៉ុនទៅលើគម្រោងនានា ដូចដែលបានលើកឡើង ក្នុងនោះសម្តេចក្រឡាហោមបានកត់សម្គាល់ទៅលើការគាំទ្រសំខាន់ៗដែលមានជាអាទិ៍ ការជួយរៀបចំនូវបញ្ជីឈ្មោះបោះឆ្នោតថ្មី ដែលសម្ដេចចាត់ទុកថា នេះគឺជាកិច្ចការមួយដ៏មានសារៈសំខាន់ ហើយជាការជួយគាំទ្រមួយដ៏មានសារៈសំខាន់ដល់ដំណើរការរៀបចំការបោះឆ្នោតនៅកម្ពុជា៕ អត្ថបទ៖ បាន ចក់
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
