​​ម៉ូតូ​ទឹក​៖ កីឡាករ សាលី អ៊ូ​មើ​ត ម្ចាស់​មេដាយមាស Asian Games 2018 និង​កីឡាករ ម៉ី​ន ម៉ូ​ស្ដា​ន បាន​បើក​ទំព័រ​ប្រវត្តិសាស្ត្រ​ថ្មីនៃ​ការប្រកួត​កីឡា​ម៉ូតូ​ទឹក ​ជ្រើសរើស​ជើងឯក​ពិភពលោក Jet Ski World Cup 2021 នៅ​ប្រទេស​ថៃ បន្ទាប់ពី​អ្នក​ទាំងពីរដណ្ដើម​បាន​ចំណាត់ថ្នាក់ Top-5 លើកដំបូង ក្នុងនាម​កីឡាករ​អាស៊ីលើ​វិញ្ញាសា​ស្គី​ឈរ ឬ Ski GP ដែល​ជា​វិញ្ញាសា​ធំ​គេនៃ​ប្រភេទ​កីឡា​លើទឹក​នេះ។​

​សាលី អ៊ូ​មើ​ត បាន​ថ្លែងប្រាប់​ក្រុមការងារ BTV-News តាមរយៈ​សារ​អេ​ឡិច​ត្រូ​និ​ច​ពី​ទីក្រុង​ប៉ា​តា​យ៉ា ក្រោយ​ចប់​ការប្រកួតកាលពី​ល្ងាច​ថ្ងៃ​ទី​២៥ ខែ​មេសា​ថា ខ្លួន និង ម៉ី​ន ម៉ូ​ស្ដា​ន ដែល​ត្រូវជា​ប្អូនជីដូនមួយ ពិតជា​រំភើប​រីករាយ​ជា​ខ្លាំងទោះ​ពុំ​ទទួល​បាន​ជើងឯក តែ​ពួកគេ​បាន​បង្កើត​កំណត់ត្រា​ថ្មីក្នុងនាម​កីឡាករ​អាស៊ី​ដំបូង ដែល​ដណ្ដើម​បាន​ពាន Top-5 ដ្បិត​កន្លងមក​ពុំ​ធ្លាប់​មាន​កីឡាករ​អាស៊ី​ណា​ម្នាក់​ធ្វើ​បាន​ឡើយ ​សូម្បី​ចំណាត់ថ្នាក់ Top-10។​ ​អ៊ូ​មើ​ត បន្ដ​ថា ក្នុង​វិញ្ញាសា​ស្គី​ឈរ​ គេ​បែង​ចែក​ជា ២ ទី​១-​វិញ្ញាសា​ស្គី​ឈរ ដែល​មិន​មាន​កំណត់​កម្លាំង​ម៉ាស៊ីន ពោលគឺ​កីឡាករ​អាច​លេង​កម្លាំង​ម៉ាស៊ីន​ដោយ​សេរី ខណៈ​ទី​២ គឺ​វិញ្ញាសា​ស្គី​ឈរ ដែល​កំណត់​កម្លាំង​ម៉ាស៊ីន​ត្រឹម ១,៥០០CC ប៉ុណ្ណោះ។ ក្នុង​វិញ្ញាសា​ទាំង ២ នេះកីឡាករ​ជម្រើស​ជាតិ​កម្ពុជា​ទាំងពីរបាន​ប្រកួត​វិញ្ញាសា​ទី​១ ដែល​ជា​វិញ្ញាសា​ធំ​ជាង​គេ​ដូចគ្នា ដោយ​កីឡាករ សាលី អ៊ូ​មើ​ត ទទួល​បាន​ចំណាត់ថ្នាក់​លេខ​៤ និង​សិស្ស​ប្អូន ម៉ី​ន ម៉ូ​ស្ដា​ន ទទួល​បាន​ចំណាត់ថ្នាក់​លេខ​៥។​

​​កីឡាករ​មាន​ប្រភព​ពី​ខេត្ត​ត្បូងឃ្មុំ​បាន​បញ្ជាក់​ថា សម្រាប់​វិញ្ញាសា​ស្គី​ឈរ​ដែល​ប្រើ​កម្លាំង​ម៉ា​ស៊ីន​ដោយ​សេរី​នេះ​ គឺ​មាន​កីឡាករ​ចូលរួម​ប្រកួត​ជាង ៣០​នាក់។ ចំពោះ​កីឡាករ​ទទួល​បាន​ជ័យលាភី​លេខ​១ បាន​ទៅ​កីឡាករ​ប៊ែ​ល​ហ្ស៊ិ​ក Quinten Vandenbossche ដែលជា​ជើងឯក​ច្រើន​សម័យ ខណៈ​ចំណាត់ថ្នាក់​លេខ​២ និង​លេខ​៣ បាន​ទៅ​កីឡាករ​បារាំង​ដូចគ្នា ស្របពេល​ចំណាត់ថ្នាក់​លេខ​៤ និង​លេខ​៥ ក៏​បានមក​កីឡាករ​ជម្រើស​ជាតិ​កម្ពុជា​ដូចគ្នា​ដែរ។​ ​គួរ​បញ្ជាក់​ថា ការប្រកួត​កីឡា​ម៉ូតូ​ទឹក​ជ្រើសរើស​ជើងឯក​ពិភពលោក Jet Ski World Cup 2021 នៅ​ប្រទេស​ថៃ បាន​ធ្វើឡើង​រយៈពេល ៥​ថ្ងៃចាប់ពី​ថ្ងៃ​ទី​២១ ដល់​ថ្ងៃ​ទី​២៥ ខែ​មេសា នៅ​តំបន់​ឆ្នេរ នៃ​ទីក្រុង​ប៉ា​តា​យ៉ាដោយមាន​ប្រទេស​ជាច្រើន​ចូលរួម ក្នុង​នោះ​ក៏​មាន​វត្តមាន​ក្រុម​ជម្រើស​ជាតិ​កម្ពុជា ៥​រូប​ចូលរួម​ដែរ ក្នុង​នោះ​ក្រៅពី​កីឡាករ សាលី អ៊ូ​មើ​ត និង ម៉ី​ន ម៉ូ​ស្ដា​ន ដែល​ដណ្ដើម​បាន​ជ័យលាភី កីឡាករ ម៉ី​ន អូស្មាន ក៏​ដណ្ដើម​បាន​ចំណាត់ថ្នាក់​លេខ​៥ លើ​វិញ្ញាសា Novice ski 1500 Stock ផង​ដែរ៕

​អត្ថបទ៖ លី ឈុន​ឡា