ភ្នំពេញ៖ សពលោកជំទាវមហាសទ្ធាភិរ័ក្ខធម្មសិរីរតន៍អគ្គមហាឧបាសិកាពុទ្ធសាសនូបត្ថម្ភក៍ ប៊ុន សុថា ត្រូវបានដង្ហែពីគេហដ្ឋានក្នុងខណ្ឌទួលគោក យកទៅកាន់ទីបញ្ចុះនៅវត្តបទុមវតី នៅព្រឹកថ្ងៃទី០៧ ខែកុម្ភៈ នេះ បន្ទាប់បានតម្កល់ធ្វើបុណ្យតាម ប្រពៃណីព្រះពុទ្ធសាសនា ។

លោកជំទាវ មហាសទ្ធាភិរ័ក្ខធម្មសិរីរតន៍ អគ្គមហាឧបាសិកាពុទ្ធសាសនូបត្ថម្ភក៍ ប៊ុន សុថា បាន​ទទួលមរណភាព កាលពីថ្ងៃទី៣ ខែកុម្ភៈ ឆ្នាំ២០២៣ វេលាម៉ោង១៨ និង១៣នាទី ក្នុងជន្មាយុ៦៧ឆ្នាំ ដោយរោគាពាធ ។

សពលោកជំទាវ ត្រូវបានតម្កល់ធ្វើបុណ្យទក្ខិណានុប្បទានដារបង្សុកូលតាម​ប្រពៃណី​ព្រះពុទ្ធសាសនា អស់រយៈពេល៤យប់៥ថ្ងៃ ​នៅភូមិគ្រឹៈលេខ៦៦ ​ផ្លូវលេខ៥២៨ កែងផ្លូវលេខ២៨៥ សង្កាត់បឹងកក់ ទី១ ខណ្ឌទួលគោក រាជធានីភ្នំពេញ ។

អំឡុងនៃការតំកល់ធ្វើបុណ្យនៅគេហដ្ឋាននៃសពរយៈពេល៤យប់៥ថ្ងៃ ​ក្រុមគ្រួសារនៃសព បាន និមន្ត​សម្តេចព្រះសង្ឃនាយក​ សម្តេចព្រះសង្ឃនាយករង នៃព្រះរាជាណាចក្រកម្ពុជា សម្តេចព្រះរាជា​គណៈ និងព្រះសង្ឃ ធ្វើបទនមសិកាព្រះរតនត្រ័យសមាទានសិល៍ ជូនកុសលដល់វិញ្ញាណក្ខន្ធសព ​លោកជំទាវ មហាសទ្ធាភិរ័ក្ខធម្មសិរីរតន៍​អគ្គមហាឧបាសិកាពុទ្ធសាស​នូបត្ថម្ភក៍ ប៊ុន សុថា ដែលបានលាចាកលោកយើងនេះ ទៅកាន់លោកខាងមុខ។

មរណភាពរបស់លោកជំទាវ មហាសទ្ធាភិរ័ក្ខធម្មសិរីរតន៍ អគ្គមហាឧបាសិកាពុទ្ធសាសនូបត្ថម្ភក៍ ប៊ុន សុថា ក៏មានការចូលរួមសោកស្តាយរំលែកមរណទុក្ខជាមួយគ្រួសារនៃសព ពីសំណាក់សម្តេច ឯកឧត្តម លោកជំទាវ ជាឥស្សរជនជាន់ខ្ពស់តំណាងនៅតាមក្រសួង ​ស្ថាប័ននានា តំណាង​គណបក្សនយោបាយ មន្ត្រីការទូត អ្នកមុខអ្នកការ សាច់ញាតិបងប្អូនជាច្រើន បានអញ្ជើញនាំយក​គោរោនផ្កា គោរពវិញ្ញាណក្ខន្ធសព លោកជំទាវ មហាសទ្ធាភិរ័ក្ខធម្មសិរីរតន៍ អគ្គមហាឧបាសិកា​ពុទ្ធសាសនូបត្ថម្ភក៍ ប៊ុន សុថា ដោយក្តីស្រណោះអាឡោះអាល័យ។

ការទទួលមរណភាពរបស់លោកជំទាវ មហាសទ្ធាភិរ័ក្ខធម្មសិរីរតន៍ អគ្គមហាឧបាសិកាពុទ្ធសាស​នូបត្ថម្ភក៍ ប៊ុន សុថា មិនគ្រាន់តែជាការបាត់បង់មាតា ជីដូន ទីគោរពស្រលាញ់ប្រកបដោយ​ព្រហ្មវិហារធម៌ គុណធម៌ និងកិត្តិគុណរបស់គ្រួសារប៉ុណ្ណោះទេ ប៉ុន្តែជាការបាត់បង់នូវពុទ្ធបរិស័ទ ដែលមានសទ្ធាជ្រះថ្លាក៏មោះមុតឧត្តុង្គឧត្តមជាទីគោរពស្រលាញ់នៃញាតិមិត្តឆ្ងាយនិងជាការបាត់បង់នូវខេមរនារីខ្មែរមួយរូបដែលមានសេចក្តីអង់អាចក្លាហាន ​ក្នុងការតស៊ូពុះពារគ្រប់ឧបសគ្គ ដើម្បី​បុព្វហេតុនៃសេចក្តីថ្លៃថ្នូររបស់សង្គមជាតិខ្មែរទាំងមូល។

កាលពីរសៀលថ្ងៃទី៤ ខែកុម្ភៈ ឆ្នាំ២០២៣ ព្រះមហាក្សត្រនៃព្រះរាជាណាចក្រកម្ពុជា សម្តេច​ព្រះបាទបរមនាថ នរោត្តម សីហមុនី បានប្រោសព្រះរាជទាននូវគ្រឿងឥស្សរិយយស​មុនីសារាភ័ណ្ឌ ថ្នាក់មហាសេរីវឌ្ឍន៍ ជាកិច្ចបច្ឆាមរណៈ ចំពោះលោកជំទាវ មហាសទ្ធាភិរ័ក្ខធម្មសិរីរតន៍ អគ្គមហាឧបាសិកាពុទ្ធសាសនូបត្ថម្ភក៍ ប៊ុន សុថា ដោយមាន សម្តេចជហ្វាវាំង វរវៀងជ័យ អធិបតីស្រឹង្គារ គង់ សំអុល ឧបនាយករដ្ឋមន្រ្តី រដ្ឋមន្ត្រីព្រះបរមរាជវាំង តំណាងដ៏ខ្ពង់ខ្ពស់បំផុត​ព្រះករុណាព្រះមហាក្សត្រ នាំយកផ្តល់ជូនដល់ក្រុមគ្រួសារនៃសពផងដែរ។

ឯកឧត្តម ហ៊ុន ម៉ានី តំណាងអោយគ្រួសារនៃសព ​បានថ្លែងអំណរព្រះរាជគុណថ្វាយចំពោះ​ព្រះករុណាព្រះមហាក្សត្រនៃព្រះរាជាណាចក្រកម្ពុជា និងសម្តេចព្រះមហាក្សត្រីនរោត្តមមុនីនាថ សីហនុ ​និងព្រមទាំងឥស្សរជនថ្នាក់ដឹកនាំនៃស្ថាបន័ព្រឹទ្ធសភា រដ្ឋសភា រាជរដ្ឋាភិបាល និងបងប្អូន​ញាតិមិត្ត​ទាំងអស់ដែលបានចូលរួមរំលែកមរណទុក្ខជាមួយគ្រួសារនៃសព ​និងអំណរព្រះគុណ ដ៏ជ្រាលជ្រៅចំពោះការយាង និមន្ត អញ្ជើញចូលរួមផ្តល់កិត្តិយសក្នុងពិធីបុណ្យបញ្ចុះសព ជូនដំណើរសព លោកជំទាវ មហាសទ្ធាភិរ័ក្ខធម្មសិរីរតន៍ អគ្គមហាឧបាសិកាពុទ្ធសាសនូបត្ថម្ភក៍ ប៊ុន សុថា មកដល់ទីបញ្ចុះនៃវត្តបទមវតីនេះ។

តាមជីវប្រវត្តិសង្ខេប លោកជំទាវ ប៊ុន សុថា កើតនៅថ្ងៃសុក្រ ៨កើត ខែផល្គុន ឆ្នាំរកា អដ្ឋស័ក ពុទ្ធសករាជ២៥០០ ត្រូវនឹងថ្ងៃទី៨ ខែមីនា ឆ្នាំ១៩៥៧ ក្នុងគ្រួសារកសិករ នៅភូមិទី២ ឃុំរកាខ្នុរ ស្រុងក្រូចឆ្មារ ខេត្តត្បូងឃ្មុំ ដែលមានបិតានាម លីន គ្រី មាតានាម ប៊ុន ស៊ាងលី។ លោកជំទាវឧបាសិកា ប៊ុន សុថា ជាបុត្រីទី៥ និងជាកូនពៅ ក្នុងចំណោមបងប្អូន៥នាក់ ក្នុងនោះមានប្រុស២រូប និងស្រី៣រូប៕