ភ្នំពេញ៖ គណៈប្រតិភូ មូលនិធិអន្តរជាតិរបស់អង្គការសហប្រជាជាតិសម្រាប់ការអភិវឌ្ឍកសិកម្ម (IFAD) ប្រចាំព្រះរាជាណាចក្រកម្ពុជា ដឹកនាំដោយលោកស្រី Jyotsna Puri អនុប្រធាននាយកដ្ឋានយុទ្ធសាស្ត្រ និងចំណេះដឹង និងលោកស្រី Reehana Raza នាយកប្រចាំតំបន់អាស៊ី និងប៉ាស៊ីហ្វិក បានចូលជួបពិភាក្សាការងារជាមួយមន្រ្ដីសំខាន់ៗ ក្នុងនោះក៏បានជួបជាមួយសម្ដេចតេជោ ហ៊ុន សែន នាយករដ្ឋមន្រ្ដី នៃកម្ពុជាផងដែរ។ នេះបើយោងតាមសេចក្ដីប្រកាសព័ត៌មានរបស់ IFAD ចេញផ្សាយនៅថ្ងៃទី៧ ខែកុម្ភៈ ឆ្នាំ២០២៣នេះ។

យោងតាមសេចក្ដីប្រកាសព័ត៌មាន ក្នុងជំនួបនោះគណៈប្រតិភូ IFAD ជាមួយសម្ដេចតេជោ និង​ថ្នាក់ដឹកនាំ​ជាន់ខ្ពស់មួយចំនួនទៀត គឺបានពិភាក្សាអំពីការវិនិយោគដែលនឹងជំរុញ​ដល់កំណើន​វិស័យកសិកម្មកម្ពុជា និងនិរន្តរភាពនៅក្នុងជនបទនៃប្រទេសកម្ពុជា ជាពិសេសបានពិភាក្សាផ្ដោត​ទៅលើខ្សែសង្វាក់តម្លៃនាំចេញជាអាទិភាពនៅក្នុងស្រុក។

តាមរយៈកិច្ចសហការ និងការវិនិយោគទាំងនេះនឹងគាំទ្រដល់យុទ្ធសាស្រ្ដងើបឡើងវិញ​ក្រោយ​កូវីដ១៩ របស់រាជរដ្ឋាភិបាលកម្ពុជា និងគោលនយោបាយអភិវឌ្ឍន៍កសិកម្មរបស់​ប្រទេសកម្ពុជា​ផងដែរ។ នេះបើតាមសេចក្ដីប្រកាសព័ត៌មានដដែល។

លោកស្រី Jyotsna Puri បានលើកឡើងថា៖ «តាមបទពិសោធន៍របស់យើងនៅក្នុងប្រទេសកម្ពុជា យើងដឹងថា ​មានសត្តានុពលដ៏អស្ចារ្យ ​សម្រាប់កសិករខ្នាតតូច មានភាពធន់ និងរួមចំណែកក្នុង​មធ្យោបាយសំខាន់ៗ ដែលអាចវាស់វែងបានដល់កំណើនសេដ្ឋកិច្ច»។

លោកស្រីបន្តថា កត្តាទាំងនេះ នឹងទាមទារឱ្យមានការវិនិយោគលើហេដ្ឋារចនាសម្ព័ន្ធ ការ​សាងសង់​ខ្សែ​សង្វាក់តម្លៃប រិក្ខាធារាសាស្រ្ដ ​និងការបង្កើតទីផ្សារ និងធានាលទ្ធភាពទទួល​បាននូវ​សេវាហិរញ្ញវត្ថុជាដើម។

បើតាមសេចក្ដីប្រកាសព័ត៌មានចាប់ពីឆ្នាំ ១៩៩៦ មក ទីភ្នាក់ងារ IFAD បានផ្ដល់ហិរញ្ញប្បទាន​ដល់កម្មវិធី ​និងគម្រោងអភិវឌ្ឍន៍ជនបទចំនួន១២ ​នៅកម្ពុជាលើការវិនិយោគសរុបចំនួន ៩៥០.៤៨ លានដុល្លារអាមេរិកដែលក្នុងនោះ ៣០៩.០៨ លានដុល្លារ ​បានមកពីធនធានផ្ទាល់របស់ទីភ្នាក់ងារ IFAD។ ​ការវិយិយោគទាំងនេះបានផ្ដល់អត្ថប្រយោជន៍​ដល់គ្រួសារជាង ១.៥៦ លានគ្រួសារ​នៅក្នុងប្រទេសកម្ពុជា៕អត្ថបទ៖ វ៉ន ដារ៉ា