ឧត្តរមានជ័យ៖ ឯកឧត្តម ប៉ែន កុសល្យ បានជំរុញដល់មន្ដ្រីប្រធានទីស្នាក់ការត្រួតពិនិត្យច្រកទ្វារព្រំដែនអន្តរជាតិ​ទាំង៣ ដែលទទួលបាន​មុខ​ដំណែង​នាពេលនេះ ត្រូវបន្តខិតខំបំពេញភារកិច្ចការងារថ្មី ឱ្យ​មានប្រសិទ្ធភាពខ្ពស់​សាមគ្គីភាព​ ផ្ទៃក្នុងល្អ និង​បម្រើផលប្រយោជន៍រួមដល់ប្រជាពលរដ្ឋទាំងសង​ខាងរវាងខេត្តជាប់ព្រំដែន។

ថ្លែងបែបនេះ ក្នុងឱកាសឯកឧត្តម ប៉ែន កុសល្យ អភិបាលខេត្តឧត្តរមានជ័យ ចូលរួមប្រកាស​ចូលកាន់មុខ​ដំណែង​ប្រធានទីស្នាក់ការត្រួតពិនិត្យច្រកទ្វារព្រំដែន​ អន្តរជាតិជាំ អូរស្មាច់ និងច្រកជប់គគីរ​ នារសៀលថ្ងៃទី៦ កុម្ភៈ ម្សិលមិញនេះ ។

ឯកឧត្តម ប៉ែន កសល្យ មានប្រសាសន៍បន្ដថា ​ការផ្លាស់ប្តូរ​និងការប្រកាសផ្ទេរភារកិច្ចចូល​កាន់មុខ​តំណែង​មន្រ្តីរាជការ​ របស់ច្រកទ្វារព្រំដែនអន្តរជាតិទាំង៣ គឺជា​គោលការណ៍​របស់​មន្ត្រី​រាជការ​គ្រប់រូប​ដែលត្រូវមានការផ្លាស់ប្តូររាល់មួយ​អាណត្តិ​ស្មើ២ឆ្នាំម្តង​ របស់​ប្រធាន​ស្នាក់ការ​ត្រួត​ពិនិត្យ​ច្រកទ្វារព្រំដែនអន្តរជាតិទាំងអស់។

ឯកឧត្តម បានបន្តថា មន្រ្តីដែលជាប្រធានស្នាក់ការ​ត្រួត​ពិនិត្យ​ច្រកទ្វារព្រំដែនអន្តរជាតិទាំង​អស់​គឺ​មានតួរនាទីភារកិច្ចរបស់ខ្លួនក្នុងការទំនាក់ទំនង​រវាងច្រកព្រំដែនទាំង៣​ ក្នុងការ​ប្រាស្រ័យទាក់ទងគ្នា​ឲ្យបានល្អប្រសើររវាងកម្ពុជា-ថៃ ក្នុងកិច្ចប្រតិបត្តិការផ្សេងៗ រវាងច្រកជាប់ព្រំដែនទាំង៣ សម្រួល​រាល់​បញ្ហាប្រឈមនានារវាងភាគីទាំងសងខាងពិសេស ក្នុងការ​ផ្តល់សេវា​ឲ្យ​មាន​តម្លាភាព សមត្ថភាព និងប្រសិទ្ធភាពខ្ពស់ជូនប្រជាពលរដ្ឋផងដែរ។

គួរបញ្ជាក់ថា លោក ស៊ាប់ យឿន ប្រធានស្នាក់ការច្រកទ្វារជាំស្រុកអន្លង់វែង,លោក ហ៊ូតារារិទ្ធ ប្រធានច្រកទ្វារព្រំដែនអូរស្មាច់ ក្រុងសំរោង ត្រូវផ្លាស់ប្ដូរឱ្យមកបម្រើការងារនៅរដ្ឋបាលខេត្ត ដាក់​ជំនួស​ដោយ លោក រ៉េម ផល្លាវី ប្រធានស្នាក់ការត្រួតពិនិត្យច្រកទ្វារជាំ, លោក ឯម បញ្ញារិទ្ធ ប្រធានស្នាក់ការច្រកទ្វារអូរស្មាច់ និងលោក ស៊ីម ហុច ប្រធានស្នាក់ការច្រកទ្វារជប់គគីរ៕ អត្ថបទ៖ សារិទ្ធ