កណ្ដាល៖ ត្រឹមរយៈពេលជិត ១ឆ្នាំ ក្រុមការងារអន្តរក្រសួង​ បានរុករកឃើញសំណល់ជាតិផ្ទុះ បន្សល់ទុក​ពីសង្គ្រាម​ក្នុងបាត់ទន្លេ នៅកោះពាមរាំង ស្ថិតក្នុងកោះចេក ស្រុកពាមជរ ខេត្តព្រៃវែង ប្រមាណជាង ២ពាន់គ្រាប់ ស្មើនឹងជិត ៤ម៉ឺនគីឡូក្រាម ។

ក្នុងវេទិកាសាធារណៈស្តីពី ការបូមខ្សាច់ ដើម្បីគាំទ្រកិច្ចប្រតិបត្តិការបោសសំអាតគ្រាប់ មីនមិន​ទាន់​ផ្ទុះ ​និងស្រង់​នាវា​លិចនៅបាតទន្លេ ស្ថិតក្នុងស្រុកលើដែក ខេត្តកណ្ដាល នៅថ្ងៃទី ៧ ខែកុម្ភៈ ឆ្នាំ២០២៣​ ក្រោមវត្តមានឯកឧត្តម ហេង រតនា អគ្គនាយកមជ្ឈមណ្ឌលសកម្មភាពកំចាត់មីនកម្ពុជា (CMAC) លោកឧត្តមសេនីយ៍ត្រី ម៉ុង សុគន្ធារ័ត្ន ប្រធាន​វិទ្យាស្ថានបច្ចេកទេស សកម្មភាពកំចាត់មីន បានលើកឡើងថា ប្រតិបត្តិការរុករកសំណល់ជាតិផ្ទុះ នៅកោះពាមរាំង បានចាប់ផ្ដើមអនុវត្តតាំង​ពីថ្ងៃទី១១ ខែមិនា ឆ្នាំ២០២២មក មានកម្លាំងអនុវត្តចំនួន ៦៧នាក់ ក្នុងនោះមានកម្លាំងស៊ីម៉ាក់ អង្គភាពពិសេស៩១១ រួមទាំងការប្រើប្រាស់សម្ភារសំខាន់ៗជាច្រើនប្រភេទ ។

លោកបន្តថា បន្ទាប់ពីកំណត់នូវទីតាំង និងទំហំច្បាស់លាស់ ក្រុមការងារបានរកឃើញ​កាក​សំណល់​ជាតិផ្ទុះ និង​គ្រាប់​មីនចំនួនជាង ២ ៧០០គ្រាប់ កាំភ្លើងធុនស្រាល ២ដើម និងរកឃើញ​បំណែក​នាវាប្រមាណជាង ៦ ៦០០គីឡូក្រាម សរុបទាំងអស់មានទម្ងន់ជិត ៤ម៉ឺនគីឡូ ក្រាម ។

លោកឧត្តមសេនីយ៍ត្រី ម៉ុង សុគន្ធារ័ត្ន បានបន្ថែមថា ក្នុងពេលប្រតិបត្តិការកន្លងមកនេះ ក្រុមការងារ​ខ្វះកិច្ចសហការ ក្នុងការបូមខ្សាច់ ដើម្បីគាំទ្រដល់កិច្ចប្រតិបត្តិការ និងខ្វះខាតនូវថវិកាគាំទ្រផងដែរ ។

ក្នុងឱកាសនោះ ឯកឧត្តម ហេង រតនា មានប្រសាសន៍ថា កិច្ចការរុករកយុទ្ធភណ្ឌជាតិផ្ទុះ និងស្រង់​បំណែក​នាវា គឺត្រូវទាមទារការបូមខ្សាច់សិន ទើបអនុវត្តការងារបាន ព្រោះគ្រាប់ និងបំណែក​ទាំងអស់នោះ សុទ្ធសឹង​តែនៅ​ជម្រៅជ្រៅ ។

គួរបញ្ជាក់ថា នៅតំបន់កោះពាមរាំងនេះ កាលពីសម័យសង្គ្រាមមាននាវាលិចទឹកទន្លេ រួមទាំងមាន​គ្រាប់មីន និង​យុទ្ធភណ្ឌមិនទាន់ផ្ទុះជាច្រើនគ្រាប់ ត្រូវបានទម្លាក់ រួមទាំងធ្លាក់កប់ក្នុងបាតទន្លេ និង​បន្សល់​ទុក​ដល់​បច្ចុប្បន្ន​ជាច្រើនគ្រាប់ ៕ អត្ថបទ ៖ បាន សុខរិទ្ធិ