ប៉ោយប៉ែត៖​ អនុវត្តតាមការណែនាំរបស់លោកឧត្ដមសេនីយ៍ត្រី អ៊ី ចំរើន នាយប៉ុស្តិ៍នគរបាល​អន្តោប្រវេសន៍​ច្រកទ្វារព្រំដែនអន្តរជាតិប៉ោយប៉ែត នៅថ្ងៃទី០៧ ខែកុម្ភៈ ម្សិលមិញនេះ ក្រុមការងារ​តំណាងប៉ុស្តិ៍ចំនួន០៤នាក់ ដឹកនាំដោយលោកវរសេនីយ៍ឯក ស្រី សុវណ្ណ ឋានៈ នាយរងប៉ុស្តិ៍ បានចុះសួរសុខទុក្ខលោកវរសេនីយ៍ឯក សុខ សំអាន ដែលមានជំងឺស្ទះសរសៃរឈាមបេះដូង បាននឹងកំពុងសម្រាកព្យាបាលនូវគេហឋាន ផ្ទះលេខFT33 ផ្លូវFT បុរីចតុមុខគំរោងទី2 ស្ថិតក្នុងភូមិព្រែកតាកូវ ឃុំស្វាយជ្រុំ ស្រុកខ្សាច់កណ្ដាល ខេត្តកណ្ដាល។

ក្នុងឱកាសនោះក្រុមការងារ បាន​នាំយកនូវថវិកាព្រមទាំងគ្រឿង​ឧបភោគបរិភោគ​មួយ​ចំនួន​ដែល​ជា​ជំនួយ​ឧបត្ថម្ភរបស់លោកឧត្ដមសេនីយ៍ត្រី នាយប៉ុស្តិ៍ និងមន្ត្រីក្រោមឱវាទ​ប្រគល់ជូន ដើម្បីជួយ​សម្រាល​នូវការ​លំបាក​ខ្វះខាតរួមមាន៖ ប្រាក់ដុល្លារចំនួន ១,០០០ ដុល្លារ ,ប្រាក់បាតចំនួន ១៨,៧០០ បាត ,ប្រាក់រៀលចំនួន ១,២១៥,០០០ រៀល ,ទឹកដោះគោឆៅ ១កេស,ទឹកត្រចៀកកាំ ២កេស,ទឹកសុទ្ធ ៧កេស ។

លោកនាយប៉ុស្តិ៍ បានបន្តថា កត្ដាទាំងអស់គឺជាការរួមចំណែកមួយដ៏​សំខាន់​ក្នុងការជួយសម្រាល​រាល់បញ្ហាប្រឈមនានា របស់មន្រ្តីក្រោមឱវាទដែលមានជំងឺធ្ងន់ធ្ងន់ បានមួយគ្រាផងដែរ នៅពេលមានជំងឺនោះ៕ អត្ថបទ សារិទ្ធ