ភ្នំពេញ ៖តាមរយៈគណៈប្រតិភូជួរមុខក្រសួងទេសចរណ៍កម្ពុជា ដឹកនាំដោយឯកឧត្តម ហង្ស សណ្តាប់ អនុរដ្ឋ​លេខាធិការ នៅថ្ងៃទី៨ ខែកុម្ភៈ ឆ្នាំ២០២៣ បានចូលជួបពិភាក្សា​ការងារ​ជា​មួយ​លោក ស្ស៉ឺ ចឺអ៊ី (Shi Zeyi) អនុប្រធានការិយាល័យផ្លាស់ប្តូរទំនាក់ទំនង និង​កិច្ចសហប្រតិបត្តិការ​អន្តរជាតិ នៃក្រសួងវប្បធម៌​ និង​ទេសចរណ៍ចិនលើប្រធានបទសំខាន់ៗ ក្នុងវិស័យទេសចរណ៍ វប្បធម៌ កីឡា សិល្បៈ វិនិយោគ និង​ពាណិជ្ជកម្មរបស់ប្រទេសទាំងពីរ។

បើយោងតាមរបាយការណ៍កិច្ចប្រជុំចំណុចសំខាន់ៗទាំងនោះរួមមាន អបអរសាទរខួប ៦៥ ឆ្នាំ​នៃការ​បង្កើត​ទំនាក់ទំនង​ការទូតរវាងកម្ពុជា-ចិន​ក្នុងក្របខ័ណ្ឌសហគមន៍​ជោគវាសនា​រួមគ្នាតែមួយ។ ការបណ្តុះបណ្តាលពង្រឹងសមត្ថភាពធនធានមនុស្សជូនមន្រ្តីរាជការ និងភាគីពាក់ព័ន្ធក្នុង​វិស័យ​ទេសចរណ៍ មាន​ដូចជាមគ្គុទេសក៍ទេសចរណ៍ និងបុគ្គលិកជួរមុខ ដែលនិយាយភាសាចិន ជាពិ​សេសស្នើ​សុំភាគីចិនចូលរួម​ការ​ផ្តល់​យោបល់ធាតុចូលថ្មីៗ ដើម្បីធ្វើបច្ចុប្បន្នភាពទៅលើសៀវភៅស (China Ready) ស្របតាម និន្នាការទេសចរណ៍​ក្រោយវិបត្តិកូវីដ-១៩។

ភាគីទាំងពីរបានពិភាក្សាជំរុញឱ្យមានការហោះហើរត្រង់ពីគោលដៅសំខាន់ៗនៃប្រទេសចិនមកកាន់កម្ពុជា ក្រោយ​ពីកែសម្រួលវិធានការណ៍ និងលើកទឹកចិត្តការ​រៀបចំខ្សែទស្សនកិច្ច​របស់​ផ្នែក​ឯកជន​ក្នុងវិស័យ​ទេសចរណ៍​របស់ប្រទេសទាំងពីរ។ ភាគីទាំងពីរក៏បានជំរុញឱ្យមានខ្សែទស្សនកិច្ចទេសចរណ៍ ពិសេសរវាងរដ្ឋ និង​ឯកជនផងដែរ។ ភាគីទាំងពីក៏បានពិភាក្សាអំពីការសហការរៀបចំពិព័ណ៌ម្ហូបអាហារ តន្រ្តី វប្បធម៌ កីឡា ដែល​មាន​ការចុះបញ្ជីទទួលស្គាល់ពីអង្គការបេតិកភ័ណ្ឌពិភពលោក UNESCO និងការ​រួមគ្នា​សម្តែង​សិល្ប​ក្បាច់​ប្រដាល់​បុរាណខ្មែរ (ល្បុកតោ) និងការសម្តែងក្បាច់គុណចិនសៅលីង (Shaolin) ដែលមាន​បញ្ជី​ទទួល​ស្គាល់ពី​អង្គការ​បេតិកភ័ណ្ឌពិភពលោក UNESCO ថ្មីៗ ដើម្បីអបអរសាទរខួបលើកទី៦៥ ឆ្នាំ នៃការបង្កើត​ទំនាក់ទំនងការ​ទូត​រវាងកម្ពុជា-ចិន និងឆ្នាំទស្សនាកម្ពុជា២០២៣។

បើតាមក្រសួងទេសចរណ៍សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា ដឹកនាំគណ​ប្រតិភូ​ជាន់​ខ្ពស់​កម្ពុជា​ធ្វើ​ទស្សនកិច្ចផ្លូវការនៅប្រទេសចិនចាប់ពីថ្ងៃទី ៩-១១ ខែកុម្ភៈខាងមុខ គឺជាទស្សន​កិច្ច​ជា​ប្រវត្តិសាស្រ្តមួយ​របស់​ឥស្សរជនកំពូលបរទេសទី១មកប្រទេសចិន ក្រោយពីធីបុណ្យ​ចូលឆ្នាំថ្មី​ប្រពៃណី​ជាតិ​ចិន។ ក្រសួងទេសចរណ៍បញ្ជាក់ថា តាមរយៈទស្សនកិច្ច​ផ្លូវការរបស់​សម្ដេចតេជោ​នឹងរឹតបន្តឹង​ចំណង​មិត្តភាពដៃគូ​កិច្ចសហប្រតិបត្តិការយុទ្ធសាស្រ្តគ្រប់ជ្រុងជ្រោយ និងជំរុញ​ការក​សាង​សហគមន៍​ជោគវាសនារួម​ក្នុង​យុគសម័យ​ថ្មីឱ្យបានកម្រិតថ្មីមួយទៀត ហើយក៏បាន​បង្កើត​ឱកាស​មាសដល់​ប្រតិភូក្រសួងទេសចរណ៍​កម្ពុជាបាន​ចូលជួប​ពិភាក្សា​ការងារផ្ទាល់ជាមួយ​ក្រសួង​ក្រោយវិបត្តិកូវីដ-១៩៕ អត្ថបទ៖ វ៉ន ដារ៉ា